Гортлуд (Кӧсладор район)
| Гортлуд | |
| Му: | Рочму |
| Статус: | грезд |
| ладор: | Перем ладор |
| район: | Кӧсладор район |
| Инлыдпассэс: | 59°50′30″ с. ш. 54°36′05″ в. д.HGЯO |
| Веськӧтлан кыв | коми, роч |
| Отир лыд | 72 морт (2009) |
| Час кытш: | UTC+5 |
| Телефон нумерӧ содтӧт: | +7 34298 |
| Почта инпас: | 619451 |
| Авто нумерӧ содтӧт: | 59, 81 |
Гортлу́д — Перем ладорись Коми кытшын, Кӧсладор районісь Чадзӧв посадмуын грезд (деревня).
Ним йылісь[вильмӧтны | Вильмӧтны код]
Гортлуд грездлöн нимыс вежöртана — гортся луд, кытöн лудыс — туруна кушин.
География[вильмӧтны | Вильмӧтны код]
Гортлудыс сулалö Кöсладор район асыввылын, Бачман ладорын, Чадзöвсянь лунвыв-асыввылö 5,2 км ылынаын да Кӧс посадсянь лунвыв рытвылö 24,5 км ылынаын (веськыт линия кузя).
Ордча оланіннэз[вильмӧтны | Вильмӧтны код]
Гортлудсяняс ойвыв-рытвылас километра етш ылынаын сулалö Красинькӧв, ойвыв-асыввылö 1,5 км ылынаын Бачманöв, сы сайын Чоййыл да Пыдöс.
Красинькöвсянь гортлудчи лэдзчöны, Бачманöвö кайöны.
Асыввылас Гортлудсяняс 2,5 км ылынаын кöркö сулалöма Тылавыл грезд, квать километра ылынаын Чаняыб грезд.
Ландшафттэз[вильмӧтны | Вильмӧтны код]
Маті котöртö Бе́рег шор, ывтіжык Ю́динскöй шор. Кыкнан шор вылын зм пруд.
Нюррез грезсянь ылынöсь
- Кушню́р
- Öме́льнюр
- Пузы́мнюр
Матісь видззез:
- Гладьви́дзувт
- Ыбса́й
Матісь ыббез:
- Дра́нич кочӧ́м (кочны — орлавны нитш пуртöн)
- Кульура́
- Новина́
- Пили́пшин
- Сёйгу
- Тöззя́
- Че́кас па́льник
Янсалöм[вильмӧтны | Вильмӧтны код]
Грездас эм Урдöл да Вердöл, а сідзжö Виль посёлок.
Туйез[вильмӧтны | Вильмӧтны код]
Öні Гортлудын лыддьöны токö öтік туй [1]:
| Коми ним | Роч ним |
|---|---|
| Гортлуд туй | ул. Гортлудская |
Былись ту туйез грездас куима: öтік ыджыт туй да сысянь петан учöт туйез.
История[вильмӧтны | Вильмӧтны код]
Гортлуд гöгöр адззöмась чучкöй берсяторрез. Сідзкö комиэз овлöмась татöн важынсянь.
Öнняся грездыс аркмöма 1880' воэзö, кöр татчö локтöмась йöз Бачманöвись. 1886' годö татöн вöлöма кык гортвидзан. Гортлудын сэк олöмась комиэз, кöдна быдтывлöмась нянь, кылöтлöмась вöр, уравлöмась, кыйлöмась пöтка (сьöла), чериавлöмась.
1910' во кежö татöн лоис 8 горт, кытöн олöмась 48 морт.
1924' восянь 2005' воöдз Гортлудыс олöма Чадзӧв сельсоветын.
1926' годö татöн лыддьöмась 100 мортöс, кöзяйствоэз вöлöмась 16-я.
Коллективизируйтöм коста, 1930' во, Гортлудсö пыртöмась «Ленин» колхозö (шöриныс Бачманöвын). 1934' годö öтлаын Красинькöвкöт да Тылавылкöт гортлудчи лöсьöтöны торья «Комсомол» колхоз, кöдö 1957' во öтлаöтöмась Бачман ладорись öтласа колхозö «Путь Иллича». Мöдсö 1960' годö гырисьмöтасö, шöринсö керасö Чадзöвö. 1966' годö этія суперколхозісь Бачман ладорись грезддэз петöны, аслыныс торья «Искра» колхоз лöсьöтікö. Но торйöн олöмась недыр: 1968' годö нійö кöрталöны «Кöсинскöй» совхоз бердö Бачманöвскöй отделеннёöн, а 1971' восянь этійö отделеннёсö вуджöтöмась «Чадзӧвскӧй» совхозö.
Веськöтлан[вильмӧтны | Вильмӧтны код]
Ӧні, 2006 во пондöтчöмсянь, Гортлудыс пырӧ Чадзӧв посадмуӧ.
Отир[вильмӧтны | Вильмӧтны код]
Олöны Гортлудас гортлу́дчи, öтік айка мортöс шуöны гортлу́деч, инька мортöс гортлу́дка; тöдчанним гортлу́дскöй нето гортлу́дісь.
Гумагаэз сьöрті 2009' во пондöтчикö Гортлудын олöмась 72 морт, кöдна видзöмась 21 горт.
Оліссезлӧн лыд воэз сьöрті:
| 1909 | 1926 | 1936 | 1959 | 1970 | 2007 |
|---|---|---|---|---|---|
| 48 | 100 | 112 | 92 | 130 | 72 |
Отирыс комиöсь, баитöны комиöн.
Медваж гишшаныс Кучев. Мöдік фамиллёэз: Ильниных, Мартынов, Конохов, Калашников.
Кöзяйство да быт[вильмӧтны | Вильмӧтны код]
Öні грездас öтласа кöзяйство абу. Отирыс торйын видзöны пода, быдтöны карч.
Ньöбöны вöрвидзанісь делянкаэз да пöрöтöны вöр.
Продукция вузалöны ньöбсиссезлö, кöдна вовлöны татчö камаззэзöн. Паныт босьтöны сакар, сов да пизь.
Отирлöн эмöсь ас машинаэз. Автобус ветлö токö школьнöй.
Мобильник кутö UTEL.
Эм райполöн лавка. Асторья магазин банкротитчис.
ФАП-ö колö мунны Бачманöвöдз. Сэтчин жö шойна.
Велöтчан[вильмӧтны | Вильмӧтны код]
1989' восянь Гортлудын вöлі челядьсад. Öні сійö пöдналöмась.
Велöтчынытö челядь ветлöны Бачманöвö.
Культура[вильмӧтны | Вильмӧтны код]
Гортлудын эм клуб, кытöн уджалö фольклор сьылісь коллектив.
Гортлудчи порйöтöны Бачман ладорись быдöс вежалуннэз:
Гора нима отир[вильмӧтны | Вильмӧтны код]
- Нилогов Леонид Егорович, коми гижись
Казьмöтаннэз да сингажöтаннэз[вильмӧтны | Вильмӧтны код]
Лыддьöтан[вильмӧтны | Вильмӧтны код]
- Коми-Пермяцкий автономный округ на рубеже веков. Кудымкар, 2000. ISBN 5-87901-051-1
- Коми-Пермяцкий национальный округ. Москва-Ленинград, 1948.
- Мартынов М. Е. Селения Косинского района. Справочно-статистический материал. Кудымкар, 2009. ISBN 978-5-87901-127-2
- Шаги времени. К 80-летию образования Косинского района / редактор-составитель О. П. Кучева. Пермь, 2004. ISBN 5-93683-030-X.
Ыстісяннэз[вильмӧтны | Вильмӧтны код]