Пожва (Юсьва район)
| Пожва | |
| Му: | Рочму |
| Статус: | посёлок |
| ладор: | Перем ладор |
| район: | Юсьва район |
| Инлыдпассэс: | 59°05′33″ с. ш. 56°04′57″ в. д.HGЯO |
| Ыжда: | 6,5 км² |
| Веськӧтлан кыв | роч |
| Отир лыд | 3518 морт (2009) |
| Час кытш: | UTC+5 |
| Телефон нумерӧ содтӧт: | +7 34246 |
| Почта инпас: | 619185 |
| Авто нумерӧ содтӧт: | 59, 81 |
По́жва — Перем ладорись Коми кытшын посёлок, Юсьва районісь Пожва посадмулöн шöрин.
Ним йылісь[вильмӧтны | Вильмӧтны код]
Пожванас посёлоксö шуöны Пожва ю сьöрті, кöд дорö сійö лöсьöтöмась.
Кылыс тэчöм кык торись — пож да ва. Ва формантöн помасьöны уна юэз Коми муын: Иньва, Обва, Нытва... Пож йылісь эм быдкодь версияэз: пож = коми пож, пож < коми пеж; пож < коми пожум.
География[вильмӧтны | Вильмӧтны код]
Пожваыс сулалö Кама вавизан дынын, Пожва ю паськыт уссёын (Пожва курья), кыкнан ладорас. Вадöррес коласын нюжалö тымöт (дамба), кöда кузя мунö автотуй. Тымöтся катыт аркмöма паськыт Пожва пруд.
Посёлок вылöт котöртöны юоккез: Елыманика, Ратанка, Аняшор (рочöн Анящера), Лысковка.
Пожвасянь Юсьва посадöдз (райцентр) 78 км ылына. Перемöдз веськыт визь кузя — 100 км ылына, а мунны кö автотуй кузя, петö 400 км мымда.
Пожвасянь лунвыв-рытвылö (туй кузя) 14 км ылынаын сулалö Майкар, ордча посадмулöн шöрин.
Пожва посёлок бердын куйлöны грезддэз: рытвылас Ключи, асыввылас йöзтöмöсь ни Ыджыт Мочищё да Учöт Мочищё, лунвыв-асыввылын — грезддэз Льӧмпика да Усь Пожва.
Янсалöм[вильмӧтны | Вильмӧтны код]
Пожвалöн торрез:
Туйез[вильмӧтны | Вильмӧтны код]
Öні Пожваын лыддьöны 65 туй. [1]:
| Коми ним | Роч ним |
|---|---|
| Вапöлöн туй | ул. Набережная |
| Видз туй | ул. Луговая |
| Вузасян туй | ул. Торговая |
| Гöрд Коммунаррез туй | ул. К.Коммунаров |
| Гагарин туй | ул. Гагарина |
| Герцен туй | ул. Герцена |
| Гоголь туй | ул. Гоголя |
| Горькöй туй | ул. М.Горького |
| Дача туй | ул. Дачная |
| Елыманика туй | ул. Елыманская |
| Ёртасян туй | ул. Дружбы |
| Кöрттуйдорся туй | ул. Железнодорожная |
| Калинин туй | ул. Калинина |
| Кама туй | ул. Камская |
| Керöс туй | ул. Горская |
| Киров туй | ул. Кирова |
| Комсомол туй | ул. Комсомольская |
| Космодемьянскöй туй | ул. З.Космодемьянской |
| Космонавттэз туй | ул. Космонавтов |
| Кошевöй туй | ул. Кошевого |
| Крылов туй | ул. Крылова |
| Куйбышев туй | ул. Куйбышева |
| Лазо туй | ул. Лазо |
| Ленин туй | ул. Ленина |
| Лермонтов туй | ул. Лермонтова |
| Лыскова туй | ул. Лысковская |
| Маркс туй | ул. К.Маркса |
| Матросов туй | ул. Матросова |
| Машинакериссез туй | ул. Машиностроителей |
| Маяковскöй туй | ул. Маяковского |
| Мезмöт туй | ул. Свободы |
| Мир туй | ул. Мира |
| Морозов туй | ул. П.Морозова |
| Назукин туй | ул. Назукина |
| Некрасов туй | ул. Некрасова |
| Ньыв туй | ул. Пихтовая |
| Нюр туй | ул. Болотная |
| Октябся туй | ул. Октябрьская |
| Островскöй туй | ул. Островского |
| Паськыт туй | ул. Широкая |
| Первомай туй | ул. Первомайская |
| Перем туй | ул. Пермская |
| Пионерия туй | ул. Пионерская |
| Пушкин туй | ул. Пушкина |
| Ратанка туй | ул. Ратанская |
| Сибир туй | ул. Сибирская |
| Совдор туй | ул. Усольская |
| Совет туй | ул. Советская |
| Строитчан туй | ул. Строительная |
| Судомеханика туй | ул. Судомеханическая |
| Толстой туй | ул. Л.Толстого |
| Том Коммунаррез туй | ул. Ю.Коммунаров |
| Томмез туй | ул. Молодежная |
| Транспорт туй | ул. Транспортная |
| Тымöтувт туй | ул. Подплотинская |
| Тюленин туй | ул. Тюленина |
| Чапай туй | ул. Чапаева |
| Чехов туй | ул. Чехова |
| Чкалов туй | ул. Чкалова |
| Шевченко туй | ул. Шевченко |
| Школа туй | ул. Школьная |
| Щорс туй | ул. Щорса |
| Ылісь туй | ул. Дальняя |
| Энгельс туй | ул. Энгельса |
| Ям туй | ул. Ямская |
Туйезся эмöсь кварталлэз, шуам Подстанция, Аэродром.
История[вильмӧтны | Вильмӧтны код]
Пожва ладорыс öтлаын быдöс Ыджыт Перемнас вуджöма роч кан кипод увтö XVI нэм помын, а 1564’ годö Гым Иван козьналöма эна муэсö Строганов купечлö.
Роччез первуись гижöмась Пожва йылісь 1629’ годö, но сэк басниыс мунöма токö ю йылісь, кöда гöгöр осьтöмась кöрт рудаэз.
1715’ годö Гагаринлöн гижöтан небöгын казьтывсьöны «Орёл присудісь кык учöтичок грезд Усь Пожва да Верх Пожва, но сэтчин сизим гортвидзансис нёльыс вöлöмась отиртöг, а кыкас олöмась кориссез.
Пожва ю дорын слободка пондас быдмыны чугунсылöтан да кöрткеран завод бердын, кöдö Н.Г. Строганов тшöктöм сьöрті кутчöмась лэбтыны 1754’ годö да лэдзöмась 1756’ март коста. 1758’ восянь 1786’ воöдз Пожва заводын сылöтлöмась и ыргöн.
Сёрöнжык, 1773’ годö, заводыс вуджöма сенатор В. А. Всеволожскöй киэзö, а 1796 сылöн Всевлод очазонлö. Мöдыс вуджöтöма перемскöй именнёлісь веськöтлансö Совдорись Пожваö.
Посадсö бура планируйтöмась. Эшö 1785’ годö татчö лэбтöмась мöдік пуовöй вичку (одззаыс сотчöма 1778’ воын). ХІХ век пондöтчикö Пожваын лыддьöмась 414 керку ни. 1809–1812’ воэзö татöн уджалöмась архитекторрез А. М. Заправскöй да П. Д. Шретер. Бура баситöмась посаднысö и крепоститöм архитекторрез Вяткин Андрей да Мальцев Лука Степанович.
1815’–1817’ воэзö заводын уджалöма тöдчана туялісь металлург да сыбöрся Петербургись Академиялöн член-корреспондент П. Г. Соболевскöй (1782–1841). Сы кипод увтын 1817’ годö лэдзöмась Кама ва вылö кык медодзза пароход да первуись Рочмуын пондылöмась пудлингуйтны кöрт.
1839’ февральын татöн керöмась паровоз «Пермяк» – паськыт колея понда медодзза паровоз Рочмуын. 1876’ юнь 28’ лунö Пожваын осьтомась потребитіссез котыр, кöда сідзжö вöлöма медодззаэзын империяаным.
1847’ годö пондöмась лэбтыны изовöй вичку (важыс сотчöма чарöтöм шогья 1828’ гожум пондöтчикö). Виль вичкусö вежаöтöмась 1865’ сентяб 12’ лунö.
1861’ годся реформаэз бöрын заводыс Пожваас жебмас, чугунсö кисьтны дугдасö, пондасö лэдзны токö вевттян кöрт.
1900’ годö, Пожваись заводсö небöма князь С. Е. Львов, кöда тшöктöма заводас керны отирлö колана берся: металлісь бекöр-пань, му-видз уджалан струмент да мый да. Уджаиныс лоас бöра рентабельнöй.
XX нэм пондöтчикö Пожваын оліссезлöн сулалöмась 600 мымда керку, а господалöн — 20. Посадын вöлі зонкаэз да нывкаэз понда велöтчаніннэз, кык изовöй вичку (мöдыс — шойна дынын), почта, телеграф, веськöтчан комплекс.
Пожваыс вöлі Пожевскöй волосьлöн шöрин.
1918’ во пондöтчикö заводсö князьыслісь мырддьöмась, сія лоас канлöн. 1922’ да 1927’ годдэзö Пожвасис завод кыкись пöднавлöмась. 1928’ восянь 1939’ воöдз уджаиныс вöлöма промысёл керан «Молот» нима кооперируйтöм артельлöн, кöдö сэсся сетасö Кыдззакарись химкомбинат кипод увтö. Заводыс Пожваын уджалöма 1954’ годöдз, сэсся сійö демонтируйтöмась Кама вавидзан лоöм шогья.
1931’ годö Пожваын пансьöма Назукин нима колхоз, кöдö 1951’ январ 20’ лунö гырисьмöтöм бöрын (сэк öтувтчöмась нёль сельхозартель) пондöмась шуны «Путь к коммунизму». Этія колхозыс олас 1966’ май 12’ лунöдз, кöр татчö лöсьöтасö совхоз, 1969’ годö совхозыслісь веськöтлансö вуджöтöмась Майкарö.
1940’ юль 26’ лунö Пожвалісь статус лэбтöмась карокöдз, но ХХ век помын сія бöра лоас посёлокöн.
1940’ воэзö, Ыджыт косясян коста, посёлокö вайöтöмась уна эвакуируйтöм отирсö. Пожваас лöсьöтöмась туберкулёзöн висись челядь понда санаторий. Война бöрын оліссез бöра лоасö этшажык.
1955’–1956’ годдэзö, вавидзан шогман кежö, Пожваын олöмась 3000 морт, сулалöмась 699 öтісувдаа да 95 кыксувдаа керку, вöлі шöрöт школа, клуб, куим челядьсад, больнича, аптека, почта, кык магазин, вичку, суд, веськöтлан керкуэз. Унажык керкуэсö ва шогья вуджöтöмась тодиль аркмöтöм виль микрорайонö.
1958’ декаб 16’ лунö важ завод туйö лэдзöмась судомеханика сьöрті завод, кöда сэсся пондас шусьыны «Лесосплавмаш» да пырас Перемись «Коммунар» öтувтчöмö. Талун сія — ОАО «Пожваись машинакеран завод»).
1918’ восянь 2005’ воöдз Пожваын юралöма посёлковöй совет, муыс шусис "Пожвинскöй поссовет" нето "Пожвинскöй сельсовет". 1924’–1931’ воэзö Пожваись поссоветыс лыддисьöма Майкар районын, сыбöрын – Чормöс районын, а 1959’ нояб 4’ лунсянь — Коми кытшись Юсьва районын. 2006’ годö виль роч туйдöт сьöрті Пожва поссовет туйö вöлі лöсьöтöм Пожва посадму.
Веськöтлан[вильмӧтны | Вильмӧтны код]
Öні Пожваыс пырö Перем ладорись Коми кытшö, Юсьва районас, кытöн сія — Пожва посадмулöн шöрин (2006' восянь). Посадмуын эм юралісь да депутаттэзлöн совет. Öні посамуын юралö Попов Петра Дмитриевич.
Канму сідзжö Пожваын видзö:
- полициялöн юкöт, 21 морт, ыждалісьыс капитан И. В. Данин.
- кусöтчан юкöт №56
- Роч почта юкöт №619185
Отир[вильмӧтны | Вильмӧтны код]
Пожваын оліссез шусьöны пожевля́на. 2009' во пондöтчикö нія вöлöмась 3518 морт. Отирыс баитöны роч кыв вылын.
Кöзяйство да быт[вильмӧтны | Вильмӧтны код]
- ОАО «Пожваись машинакеран завод»
- Иньва рейдлöн кылöтан юкöт
- «Майкар» совхозлöн юкöт
- Майкарись ЛТУ
- МУП «Предприяттё ЖКХ»
- рабкооп
- Городищёись вöрпромкозлöн вöрпункт
- Пожваись вöрвидзан
- чери кыян кöзяйство
- ветеринар юкöт
Лысинвидзан[вильмӧтны | Вильмӧтны код]
- Пожва юкöтісь больнича
- аптека № 27
- округ понда профилакторий
- пöрись отир понда керку
Велöтан[вильмӧтны | Вильмӧтны код]
- Пожваись шöрöт школа №1
- Пожваись шöрöт школа №2 [2]
- челядь понда музыка сьöрті школа
- Томмез понда кужöттэз керку (одзжык Пионер керку),
- челядьсаддэз: «Колосок», «Чебурашка», «Берёзка».
Культура[вильмӧтны | Вильмӧтны код]
- Пожваись культура керку, кытöн эм
- Роч отир интсрументтэзöн орсан оркестр (аркмис 1932’ воын, а 1971’ годö сылö сетöмась гора ним «народнöй»)
- Мыччалан коллектив «Акробаттэз» (аркмöтöм 1970’ воын)
- библиотека, челядь понда библиотека.
- №1-а школаын уджалö асладор история сьöрті музей, кöда вöлі öсьтöм 1985’ май 8’ лунö
- Уджалö вичку, кытöн 1965’ гожумсянь попалö отеч Иоанн
Казьмöтаннэз да сингажöтаннэз[вильмӧтны | Вильмӧтны код]
- Асйöз косясянын вийöммезöс казьтыланін
- Ыджыт косясянын усьöммезöс казьтыланін
- Вежа Куима нима вичку, лэбтöмась 1847’–1865’ воэзö А. В. Всеволожскöй сьöм вылö
- важ заводлöн домна цеххез (öні сэтчин культура керку)
- Пожва заводлöн тымöт (плотина)
- князь керку (öння профилакторий)
- князьлöн сад
Гора нима отир[вильмӧтны | Вильмӧтны код]
Пожваын шогмисö:
- Балашов Сергей Михайлович (*1903), РСФСР-ись отир артист, басöка баитны кужись
- Зеров Николай Петрович (1920–1977), капитан, Социализм Уджлöн Герой (1971 во)
- Турунтаев Владимир Владимирович (1912–1978), генерал-полковник
Пожва история понда уна керис
- Казанцев Павел Максимович, асладор туялісь
Ордча ландшафттэз[вильмӧтны | Вильмӧтны код]
Берся[вильмӧтны | Вильмӧтны код]
- Пожваын посёлокнысö порйöтöны юнь 30' лунö, кöр пожевляна лöсьöтлöны посадлун.
- Кöть Пожваыс некöр эз вöв карöн, сія 2010' годöдз официальнöя пырöма Рочмуись история каррез коласö [2].
- Пожевляна озö радейтö Юсьва посад да Коми кытш, мыля ны сьöрті Пожваыс пö «киссьöма» сы бöрын, кöр оланіннысö пыртöмась Юсьва районö [3].
- Пожваись отеч Ионан 2010' восянь лыддисьö Юсьва районлöн символöн [4]
- Öні пожевляна бöрйöны аслыныс дöрапас да вужпас [5].
Ыстісяннэз[вильмӧтны | Вильмӧтны код]
- ↑ Вот öктіссез сайтісь
- ↑ Роч Википедия сьöрті
- ↑ То шуам, татöн: [1]
- ↑ Парма-Новости. 2010.03.03
- ↑ .В Пожве проходит конкурс на лучший эскиз герба и флага
Лыддьöтан[вильмӧтны | Вильмӧтны код]
- Зыкин А. Берег левый – берег правый: [Из истории поселков Пожва и Майкор] // Парма-новости. 1997. 28 февр.;
- Казанцев П. М. На старом уральском заводе. Пермь: Кн. изд-во, 1966. 123 с.: ил.;
- Казанцев П. М. Пожвинский завод: Ист.хроника. 1754–2004 / Материалы подгот.: О. В. Германович, Н. Ф. Исакова. Кудымкар: Коми-Перм. кн. изд-во, 2004. 421 с.: ил.;
- Наследие Пармы. Наш край, 9 выпуск: материалы Свода памятников истории, архитектуры и монументального искусства Коми-Пермяцкого автономного округа. Сост. О. В. Попова. Кудымкар, 2005. ISBN 5-87901-088-0
- Шумилов Е. Н., Степанов М. Н. Пожва // Материалы по Перм. обл. к Урал. ист. энцикл. Пермь, 1994. Вып. 1. С. 104-105.
- Шумилов Е. Н., Степанов М. Н. Пожва // Уральская историческая энциклопедия. 2-е изд., перераб. и доп. Екатеринбург, 2000. С. 426.;
Ыстöттэз[вильмӧтны | Вильмӧтны код]