Перем ладорись Коми кытшлӧн статус

Босьтöм Википедияись
Коми кытшлӧн вужпас
Перем ладорлӧн вужпас

Перем ладорись Коми кытш — ассяма статуса мувывтор Рочму Федерацияись Перем ладорас.

Ӧння статус Коми кытшыслӧ вӧлі пуктӧма 2007 годӧ апрель коста, кӧр Перем ладор понда туйдӧттэз лэдзись ӧксян (Законодательнӧй собраннё) пыртіс оланӧ Перем ладорлісь Устав. Коми кытш йылісь Уставас баитсьӧ VIII да IX юкӧттэзын.

Уставись 35 параграф сьӧрті Коми кытш пырӧ Перем ладорӧ, кыдз мувывторӧн веськӧтлан юкӧт, кӧдалӧ сетӧма тодиль статус.

Коми кытшыслӧн мувывторыс (территория) кольччӧ сы ыжда жӧ, мый ыжда вӧлі Перем лапӧвкӧт ӧтлаасьтӧдз.

Перем ладор понда туйдӧттэз лэдзись ӧксянын Коми кытш нимсянь баитӧны кык морт, кӧднӧ бӧрйӧны ӧті манадата кык бӧрьян кытшын.

Коми кытшын Перем ладор юраліссезлісь шуӧммесӧ пыртӧ оланӧ Перем ладорлӧн Коми кытш делоэз сьӧрті министерство.

Сы одзын пуктӧмӧсь сэтшӧм моггез:

а) Кытшын кӧзяйство да социаль сфера зорӧтӧм, отирыслӧ бур олан лӧсьӧтӧм.

б) Кытшын канму (государство) юраліссезлісь шуӧммесӧ оланӧ пыртан органнэзлісь удж ӧтувтӧм.

в) Перем ладорлӧн юралан да Кытшись муниципал юкӧттэзлӧн асвеськӧтлан органнэз коласын ӧтласа удж ӧтувтӧм.

г) Кытшын Федерация да Перем ладор нимсянь лэдзӧм программаэсӧ оланӧ пыртікӧ отсасьӧм.

д) Роч му Федерация да Перем ладор туйдӧттэз сьӧрті мӧдік моггез тыртӧм, кӧдна павкӧны Коми кытшыс тодиль статуслӧ.

Коми кытш делоэз сьӧрті министерствонас веськӧтлӧ Перем ладорлӧн министр, кӧда лоӧ Коми кытшын юралісьӧн. Мортыс пырӧ Перем ладорӧн Веськӧтланӧ (правительствоӧ). Вежны сійӧ вермӧ Перем ладорлӧн губернатор, Веськӧтлансӧ юралісь вӧзйӧм сьӧрті. Кытшын министрыс вермӧ уджавны ӧтік восянь вит воӧдз.

Уставись 42 параграфын гижӧм: Перм ладорын канму нимсянь веськӧтлан органнэз колӧ лӧсьӧтны уджнысӧ сідз, медбы перем коми отирлӧн зорамис кыв, лов культура да этнослӧ аскодя мӧдік берся. Эта понда министерстволӧ сетӧмӧсь сэтшӧм уджжез:

- лӧсьӧтлыны да пыртлыны олӧмӧ канмулісь тодиль программаэз перем коми этнос видзӧм понда, коми отирлісь кыв да культура зорӧтӧм понда;

- ловзьӧтны да зорӧтны коми отирын басӧк берся да кипод уджжез керны кужӧм;

- керны сідз, медбы зорамисӧ комиӧн паськыта юӧртан везӧттэз, медбы коми отирлӧ Роч му туйдӧттэзӧн лӧсьӧтӧм ыждаын позис кывзыны-лыддьӧтны да паськӧтны юӧррез ас кыв вылын;

- керны сідз, медбы аркмисӧ да уджалісӧ канму нимсянь ладорыслӧн велӧтан да культура керкаэз, кӧдна видзӧны да зорӧтӧны коми отирлісь аскылӧм, да отсавны ны уджжезлӧ Роч му Федерация да Перем ладор туйдӧттэз сьӧрті.

Перем ладорись Коми кытшын веськӧтлан кылӧн лоӧ роч кыв. Сыкӧт ӧтлаын веськӧтлан керкуэзын позьӧ баитны и комиӧн (перем коми кыв вылын).