Кывтэчас

Кывтэчас – кык нето унажык асвына шуан, кöдна йитчöмöсь вежöртас ладорсянь да кыв лад сьöртi. Кывтэчассö велöтö-туялö синтаксис.

Быд асвына шуан кокнита йитсьö мöдiк шуаннэзкöт. Сiдз, кыв ыб позьö йитны кыввезкöт: паськыт (паськыт ыб), гöрöм (гöрöм ыб), айлöн (айлöн ыб). Кыввез паськыт, айлöн йитсикö увтыртчöны кывлö ыб.

Йитсьöм, кöр öтiк кыв видзö мöдсö ас увтын, шусьö увтыртанöн. Увтыртан йитсьöмлöн куим нёж: веськöтлöм, кышасьöм, лöсялöм.

Эттшöма йитсьöм кыввез и аркмöтöны кывтэчассэз.

Кывтэчас, кыдз и торья кыв, мыччалö кытшöмкö эмтор, керöм нето тöдчан. Но керö этö сiя утлянножык, пыдынжыка: лун и кузь лун; мича и зэв мича; мунны и мунны перыта; локны и сьылöмöн локны; мийö и мийö быдöнным.

Кывтэчасö йитчöны видзан кыв и кöртыштöм кыв, шуам: кузь лун — лун (кытшöм?) кузь; зэв мича — мича (кыдз?) зэв; мунны перыта — мунны (кыдз?) перыта; сьылöмöн локны — локны (кыдз?) сьылöмöн; мийö быдöнным — мийö (киннэз?) быдöнным.

Кывтэчассэз асланыс состав сьöртi овлöны öтпöвсаöсь и унапöвсаöсь.

Öтпöвса кывтэчас сулалö кык асвына кылiсь.

Шуам: гижис мамыслö, мунны ты дорöт

Унапöвса кывтэчас аркмö öтпöвсасö паськöтöмсянь.

Шуам: чожа гижис мамыслö, рытнас мунны ты дорöт