Тима Вень
| Тима Вень | |
 | |
| Удж: | |
|---|---|
| Чужан лун: | |
| Чужан ин: | |
| Кулан лун: |
1939’ вося октяб 13’ лун[1] (49 год) |
| Кулан ин: | |
Тима Вень (рочӧнжык Чисталёв Вениамин Тимофеевич, 1890-1939) — коми гижись, поэт, коми литератураын классик. Гижис комиöн зыряна моз.
Олантуй
[вильмӧтны | Вильмӧтны код]Тима Вень чужис 1890' октяб 20' лунӧ Вӧлӧгда губерняись Сыктывдін уездын Помӧсдін посадас.
Велӧтчис перво горт школаын, сэсся помаліс Дереваннӧйись кыквося школа.
1908' годӧ экстернӧн видзис экзамен да лои велӧтісьӧн Пожӧгын. Сэк жӧ лӧсьӧтӧма быдмассэз йылісь небӧг да коми-роч кывкуд.
1914' годӧ, мортӧс босьтӧмась сар армияӧ, мир пасьта одзза война коста Тима Вень кысъялӧма Украинаын.
Октябся революция бӧрын В.Т. Чисталёв бертӧма гортӧ да дас вит во сьӧрна, 1918'-сянь 1933' годӧдз костіалыштӧмӧн велӧтіс челядьӧс горт школаын.
1920' воэз пондӧтчикӧ Тима Вень уджалыштiс Коми небӧг лэдзанінын, сы коста редактируйтӧма 16 небӧг.
1934' годӧ сія ветлӧма делегатӧн советскӧй гижиссез медодз ӧксянӧ, пантасьлӧма А. М. Горькӧйкӧт. ССРС-ись гижись котырын 1934' восянь.
Ыджыт террор коста, 1937' годӧ, гижисьӧс пуксьӧтӧмась дзескытінӧ сысянь, мыля «пропагандируйтӧма буржуазнöй идеология».
1939' октяб 13' лунӧ Тима Вень кулӧма Вылыс Чов тюрьмаын. Поэтсӧ дзебӧмась нимтӧм шойгуӧ да, дзебаніныс ӧнӧдз абу адззӧм.
1956' годӧ мортсӧ кулöм бöрас реабилитируйтӧмась.
Гижöттэз
[вильмӧтны | Вильмӧтны код]Тима Вень вӧлі стрась бур лирикӧн. Сія гижис сьӧлӧм вӧрзьӧтан кывбуррез да висьттэз асланым Комиму да коми отир йылісь.
Литератураӧ Тима Вень локтӧма поэзия вуджӧтісьӧн. Эшӧ революция одзын сія вуджӧтӧма Иван Никитинлісь «Песня бобыля» (1908) да Алексей Кольцовлісь «Песня старика» (1909) кывбуррез.
Мир пасьта война коста том В. Т. Чисталёв гижӧма сэтшӧм стиккез, кыдз «Гут да ном» (1916), «Кöнкö веж турун пöвстын» («Кытӧнкӧ виж турун коласын», 1917).
Асйӧз война бöрын сія гижис «1919-öд во» поэма, висьттэз «Шог асыв», «Тшыг во», «Сартас би улын» да мый да.
Октябся революциялӧ 10-вося юбилей кежö Тима Вень лӧсьӧтіс поэмаэз «Ленин гу дорын» (1927) да «Му вежандыр» (1927).
Мыйнӧ, эм сылӧн кыввбуррез коласын и ӧтілунся гижӧттэз, кӧднӧ сія лӧсьӧтӧма сэкся веськӧтлан идеология сьӧрті: «Кодi гöрд му понда олö?», «Дубинушка», «19-öд во», «Важ олöм колльöдöм», «Том ёртлы», «Олан да вылан, Сöвет Коми му», «Юкмöсö» и мукöд. Эттшӧм гижӧттэз унакодь.
Но историяӧ Тима Вень кольӧма аслас лирикаӧн – эна кывбуррес дженытикӧсь да небыт кылаӧсь. Коми Республикаын нійӧ тӧдӧ быд коми морт – «Менам кывъясöй» («Менам кыввезӧ»), «Потандорса» («Зыбка дорся»), «Ок, эськö» («Ок, кӧбы»).
Тима Веньлӧн кывбуррес матынӧсь отир басни дынӧ, этадз коми муын баитӧны чериаліссез, вӧраліссез, няньбыдтіссез...
Кывбур «Поэзия артмöм» (1921–1922) гижöма карел-фин эпос ритмöн, дженыт, нёлись куим визёка кывбурöн:
- Ог тöд, кодi менö чужтiс,
- Кодi быдтiс, вердiс-удiс,
- Сьывны-мойдны йöзö лэдзис...
- Гашкö, лöзов чöд тусь пиын,
- Быдми меöй вöр туй дорын,
- Да öктiс кудъяс ветлысь-мунысь.
- Гашкö, вöр ты пыдöс ваыс
- Вöлi меным потан пыдди,
- Чöж-пöткаыс öввö сьывлiс.
- Гашкö, вöлi лöня вöрыс...
- Меным висьтъяс йöлöгаö
- Тöлысь югöр чукöрталiс.
1929' годӧ гижисьлöн чужис «Трипан Вась» висьт – коми литератураын медбур рассказзэзісь ӧтік.
Вöр-ва серпассэз йылісь да му вылын уджаліссез йылісь гижис сэтшöм кывбурресӧ, кыдз: «Тувсов вой» («Тулысся ой», 1920), «Кайла, видзöдла» (1921), «Гожöм пом» (1922) да мый да.
Отир буракодь тӧдӧны сылісь пьесаэз "Изкар" да "Ныв сетöм".
Тима Вень олан сьӧрна уна вуджöтiс сідзжӧ роч да дӧсмирись литература.
20' воэзӧ Тима Веньлöн гижöттэз (кывбуррес, висьттэс, очерккес) неетша петавлiсӧ быдкодь ӧктӧттэзын, унажыксӧ велӧтчиссез понда лыддьӧтан небӧггезын. Шуам, 1923' вося «Выль туйöд» хрестоматияын сылӧн йӧзӧтöмӧсь 21 гижöт.
20' воэз мöд джынын да 30' воэзӧ гижись тшӧкыта публикуйтчӧма «Ордым» да «Ударник» журналлэзын. Ойвыв вöр–ва йылісь, туйвыв пасйӧттэз да некымын мукöд гижöт петiсӧ и «Вöрлэдзысь» газетаын.
Небöггез
[вильмӧтны | Вильмӧтны код]- Изкар (Важ коми олöмысь нёль торъя драма). – Сыктывдінкар: Коми нига лэдзанін, 1926
- Чисталёв Тима Веньлöн гижöдъяc. Воддза книга. Муртöса да муртöстöм лыддьöгъяс. – Сыктывдінкар: Коми нига лэдзанін,1928
- «Ыджыд висьт» гижöдысь серпасторъяс. – Сыктывдінкар, 1929
- Олöм вояс. Бöрйöмторъяс гижöд чукöрысь. Мöд том. – Сыктывкар: Коми государственнöй издательство, 1936
- Олöм вояс. Бöрйöм гижöдъяс. – Сыктывкар: Коми книжнöй издательство, 1957
- Во гöгöр кытшовтöм (велӧдчысьлы библиотека серияын). - Сыктывкар: Коми книжнöй издательство, 1959 да 1978 вояс
- Менам гора тулыс. – Сыктывкар: Коми книжнöй издательство, 1980
- Эжва йывса колип. – Сыктывкар: Коми книжнöй издательство, 2000
- Ния (1908–1929 воясся гижӧдъяс) / Отв. ред., сост., заключ. ст. В.А. Лимеровой. – Сыктывкар: Изд-во "Кола", 2010. – 592 с.
Лыддьöтан
[вильмӧтны | Вильмӧтны код]- Латышева В.А.. Программные стихотворения Вениамина Чисталёва // Литература Коми: словарь школьника. — Сыктывкар, 2007. – С. 305-309.
- Дёмин В.Н. На небе звезда ... – Сыктывкар, 1995. – С. 176-185.
- Дёмин В.Н. Чисталёв Вениамин Тимофеевич // Писатели Коми: биобиблиографический словарь: В 2-х т. – Сыктывкар, 2001. – Т. 2. – С. 407-416.
- Мартынов В.И. Вениамин Тимофеевич Чисталёв // История коми литературы: В 3-х т. – Сыктывкар, 1980. – Т. 2. – С. 195-204.
Ыстöттэз
[вильмӧтны | Вильмӧтны код]Ыстісяннэз
[вильмӧтны | Вильмӧтны код]- ↑ 1,0 1,1 Чисталёв Вениамин Тимофеевич // Большая советская энциклопедия: [в 30 т.] / под ред. А. М. Прохорова — 3-е изд. — М.: Советская энциклопедия, 1969.