Унайыла сёрникузя

Босьтöм Википедия вылiсь
Перейти к навигации Перейти к поиску

Унайыла сёрникузя (сложносочинённӧй предложеннё) – сэтшӧм унапӧвса сёрникузя, кӧдаын ӧтпӧвса сёрникузяэс абу увтыртӧмӧсь ӧтамӧдныслӧ и йитсьӧны ёрталан йитӧссэзӧн.

Унайыла сёрникузяын ӧтпӧвсаэс ӧтамӧд дынісь янсӧтсьӧны бӧжокӧн.

Кӧр и да да йитӧссэза унайыла сёрникузяэзын эм ӧтласа паськӧтан юкӧт, кӧда кышасьӧ кыкнан ӧтпӧвса сёрникузяыс дынӧ, сэк бӧжокыс оз сувтӧтсьы. Школьнӧй вечер вылын кыліс музыка и кинкӧ горӧн сьыліс. Деревняын ӧзйисӧ биэз да жагӧника лӧньсисӧ быдкодь шыэз.

Унайыла сёрникузяэз вежӧртас сьӧрті да йитӧссэз сьӧрті янсалӧны куим группа вылӧ:

1. И, да (и вежӧртасын), сідзжӧ, тожӧ, не ... не ӧтлаӧтан йитӧссэза унайыла сёрникузяэз. Шуам: Фимка макнитіс кинас, и нія Антипкаыскӧт шупыта чеччӧвтісӧ йӧр вевдӧрӧт. Игорь любитіс лыддьӧтны книгаэз природа йылісь, сідзжӧ сія интересуйтчис фантастикаӧн. Ӧтлаӧтан йитӧссэза унайыла сёрникузяэзын ӧтпӧвса сёрникузяэс мыччалӧны ӧтдруг нето сьӧрсьӧн-бӧрсьӧн керӧммез да сулалӧммез.

2. А, но, да (но вежӧртасын) паныт керӧтан йитӧссэза унайыла сёрникузяэз. Шуам: Луншӧрӧн отир уджалӧ ыббез вылын, а деревня эта коста шоччисьӧ, узьӧ. Рыт ни локтіс, но вӧлі эшӧ совсем югыт. Паныт керӧтан йитӧссэза унайыла сёрникузяэзын ӧтік овлан сулалӧ мӧдіклӧ паныт.

3. Либо, нето, то ли ... то ли, то ... то, или янсӧтан йитӧссэза унайыла сёрникузяэз. Шуам: Либо тэ пырав школаас, либо ме ачым ветла ӧні жӧ. То ли горӧтлӧ кинкӧ, то ли эшӧ кытшӧмкӧ шы нія кылӧны. Янсӧтан йитӧса унайыла сёрникузяын мыччассьӧ: кык или унажык овлан коласісь вермас лоны кӧдакӧ ӧтыс или овланнэс вежласьӧны, вежӧны ӧтамӧднысӧ.