Чиж (орсан)

Чиж - орсан, кӧдӧн орсӧны коми-пермяккез Юсьвинскӧй районын.

Колӧ дорны муас майӧжок, медбы чуть тыдаліс, кытчӧ пуктӧны чижок. Чижок керӧны пуись, ӧтік ладорыс ровнӧй, а вевдӧрись ладорыс круглӧй. Ровнӧй ладорнас пуктан майӧжок вылас. Сэтчӧ колӧ лыйлыны палкаӧн. Палкасӧ керан гортын волькытӧ, аккуратнӧйӧ. Пондан мунны орсны, босьтан сьӧрат. Локтан ӧтлаӧ, грудитчан и лыддяс ӧтік колассиным считалочка «Атики, батики, си колесо, атики-батики кнопка». Кин вылын сувтчас считалка, сія и пондӧтӧ орсны.

Палкаокнас шентас, чижокас оз инмы, палкаыс бокӧттяс лэбзяс, визира сайӧ. Мӧдік шентас, бӧра оз инмы, куимӧт, а сія инмас, мӧддэс котӧртӧны , тэрмасьӧны босьтны палкасӧ. Кин первӧй босьтас да петас визираыс сайӧ, сія и вийӧ чижоксӧ, а кин петіс визирасис медбӧрын, играись петӧ, сэссэ сія оз орс. А кин эз ешты перво орсны, сія сувтӧ играӧ. Вот сідз одзлань. Кытчӧдз он мыдз, сэтчӧдз и орсам. (Гижӧм Юсьвинскӧй районын)