Пешнигорт (Кудымкар район)

Пешнигорт
	Пешнигорт
Му:	Рочму
Статус:	посад
ладор:	Перем ладор
район:	Кудымкар район
Медодз казьтылӧм:	1647
Инлыдпассэс:	58°57′58″ с. ш. 54°34′17″ в. д.HGЯO
Веськӧтлан кыввез	роч, коми
Отир лыд	898 морт (2009)
Час кытш:	UTC+5
Телефон нумерӧ содтӧт:	+7 34260
Почта инпас:	619545
Авто нумерӧ содтӧт:	59, 81, 159

Пешни́горт — Перем ладорись Коми кытшын, Кудымкар районісь Степановчи посадмуын коми посад.

Ним йылісь

Файл:Пешнигорт (Вуровчисянь).JPG

Пешнигорт (Вуровчисянь)

Файл:Пешнигорт Иньва3.JPG

Иньва ю Пешнигорт дынын

Файл:Пешнигорт пос ю сайö.JPG

Пешнигортісь пос

Файл:Пешнигорт Юсай старица3.JPG

Старица дорын

Файл:Пешнигорт ДК.JPG

Культура керку

Файл:Пешнигорт магазин Туй дорын.JPG

Туй дорын лавка

Файл:Пешнигорт почта.JPG

Почта керку

Файл:Пешнигорт ФАП.JPG

Веськöтчан керку

Файл:Пешнигорт школа2.JPG

Шöрöт школа

Файл:Пешнигорт сельсовет.JPG

Сельсовет керку

Файл:Пешнигорт яг.JPG

Пешнигортісь яг

Пешнигортлісь нимсӧ йöзыс вежöртöны быдмоз:

Сія тэчöм кык кылісь: пеш ‘кӧзъяин’ + горт;
Овлӧмась пӧ Пешков памиллёа отир (Пешковвез ӧні татӧн абуӧсь);
Вӧвлӧма пӧ поп, кӧда татöн чучкӧйесӧ Кристос вераö пыртікö ветлӧтлӧма подӧн (пешком).

География

Пешнигорт посад сулалӧ Иньва ю дорын, Кудымкар шöринсянь рытвылӧ 6,7 км ылынаын (автобусöн кö мунны, 15 минутаöн локтан). Посадсяняс Кудымкарыс бура тыдалö.

Ордча оланіннэз

Пешнигортыскӧт ордчӧн куйлӧны сэтшӧм грезддэз: ойвыв-рытвылын – Вуровчи да Чикув, ойвылын – Баран, асыввылын – Юковчи да бокынжык Сергина, лунвылын – Сопрон, лунвыв-рытвылын – Сопонко, Борисовчи да Амон.

Ландшафт

Мувевдöрыс лажмыт да волькыт, токö юланьö муыс пöліньтчöм. Муыс кöс, нюррез абуöсь.

Местаыс осьтöм, невна не быдладорас куйлöны ыббез да видззез. Ордча деревняэз бура тыдалöны.

Иньва юыс öддьöн чуклясьö да, аркмöмась быдкодь старицаэз (шуам, Заречнöй старица), кытöн олö сякöй чери.

Посад кузя котöртö Чукыляшор (сійö эшö шуöны Никулинскöй речка). Эм кык вежа ключ, кöднö отирыс обикодитöны: Кротас да Паськыт пожум увтын. Эм эшö ключ могильник дынын, а почтаын ключыс косьмöм.

Посад дорын садитöмась кык лисвеня яг да суспуа яг. (Ягнас татісь отирыс шуöны керöс). Пешнигортісь яггез бура быдмöмась ни да öддьöн басöксьöтöны пейзажсö.

Посад гöгöр быдмöны и мöдік пуэз: кӧз, кыдз дмд. Лёка йылö понуль (верӧс).

Посад ладорын пантасьöны ошшез да кӧиннэз.

Янсалöм

Пешнигорт посад тэчӧм кынымкö торись. Иньва ю сайын куйлö Заречнöй Пешнигорт (кöдö гумагаэзын лыддьöны торья грездöн), ю веськыт вадöрын куйлö ачыс Пешнигорт, туй вевдöрын – Никулина, туй увдöрын – Прокина да Починок, сэсся эмöсь Крот, Паськыт Пожум, Ключ да Тепляк.

Посадын туйез

Пешнигорт посадын öні лыддьöны 23 туй ^[1]:

Коми ним	Роч ним
Амонов туй	ул. Амоновская
Бабушкин туй	ул. Бабушкина
Борисов туй	ул. Борисовская
Вапöлöн туй	ул. Набережная
Видз туй	ул. Луговая
Виж туй	ул. Зеленая
Вöр туй	ул. Лесная
Голев туй	ул. Голева
Иньва туй	ул. Иньвенская
Инькалун туй	ул. 8 Марта
Керöсвыв туй	ул. Нагорная
Медицина туй	ул. Медицинская
Мир туй	ул. Мира
Мичурин туй	ул. Мичурина
Никулин туй	ул. Никулина
Отир туй	ул. Народная
Парк туй	ул. Парковая
Пушкин туй	ул. Пушкина
Строитіссез туй	ул. Строителей
Томмез туй	ул. Молодежная
Четин туй	ул. Четина
Школа туй	ул. Школьная
Ыб туй	ул. Полевая

Медшöр туйнас лыддьöны Голев туй.

Тодильнöй ота́иныс посадас абу. Колö кö öксьыны, отирыс чукöртчöны магазин дорö.

История

Пешнигорт гӧгӧрись археологгез адззӧмась VII–IX да VIII–XI веккезся куим казьмӧтан.

Пешнигортлісь нимсö роччез первуись казьтыштӧмась 1647' во (деревня Верх Инвы реки на Пешнигорте).

Посадӧн сія лоöма 1896' годӧ, кӧр татчӧ лэптöмась Стефан нима пуовӧй вичку (пӧдналӧм 1930' воэзӧ). Сія жӧ восянь татӧн пондöмась овны монашкаэз (медодз общинаӧн), а 1905' годö оссяс инькаэз понда Стефан нима быдса монастыр, кӧдӧ пӧдналасӧ советтэз пуксьӧм бӧрын.

1926' во посадас осьтöмась Коми кытшын медодзза челядьсад. 1933' годö татчӧ лӧсьӧтöмась челядькерку № 1, а 1941' во – школаодзся челядь понда керку (сэсся № 2).

1929' восянь Пешнигортас уджалöма колхоз «К заветам Ленина» («Ленинскӧй завет», «Заветы Ленина»), кӧда 1951' январ 29' лунӧ вӧлі гырисьмӧтӧм (ӧтлаӧтісӧ кык сельхозартель), а сёрӧнжык сійö пыртӧмась «Россия» колхозӧ (öні СПК «Рочму»).

Одзжык Пешнигортын вӧлі Пешнигорт сельсоветлӧн шӧрин, сэсся сельсовет вештöмась Кекурö, а 2006' во пондöтчикö, виль роч туйдöт сьöрті, вöлі аркмöтöм Степановчи посадму, кытчö Пешнигортыс талун и пырö.

Веськöтлöм

Талун Пешнигортыс лыддисьö Перем ладорись Коми кыштшын да пырö Кудымкар районсис Степановчи посадмуö.

Влась нимсянь посадас баитö Степановчи посадмуись главнöй специалист Хозяшева Раиса Валентиновна.

Посадын эм асланыс мумеряйтісь.

Кудымкарсянь кынымиськö недель вылас кайлö полицияись участковöй.

Пешнигортын уджалö Роч почталöн юкöт №619545 да Роч сбербанклöн сберкасса.

Отир

Олöны Пешнигортын пешни́гортса. Татісь öтік мортöс шуöны пешни́гортісь нето рочöнжык пешни́гортскöй.

1834' годӧ Пешнигортын оліссез вöлöмась 293-а, 1926' годӧ – 604-а. Сэсся отирыс лоисӧ унажык. 2009' во пондӧтчикӧ Пешнигортын лыддьöмась 898 мортöс, кöдна видзöмась 301 горт. Эта дырни Заречнöй Пешнигортсö лыддьöмась торйын (67 морт, 28 горт).

Пешнигортын оліссез комиöсь, баитöны комиöн. Роччез эмöсь жö, но етша. Öні том отирыс велöтöны челядьнысö баитны токö рочöн.

Пешнигортсалöн гишшаннэз:

Эмӧсь сэтшӧм увтыррез:

Кöзяйство да быт

Медыджыт уджаин посадас — СПК «Рочму»лöн юкöт. Эм ферма, кытöн видзöны высьтан мӧссэз. Кöдзöны сортовöй сю. Отирыс асьныс видзöны пода. Кöркö мöссэс вöлöмась 130 юр, а 2010' во кежö кольччöмась токö 33 юр. 2011' годö мöссэсö бöра пондöмась видзны унажык — 40 юр. Отирыс быдтöны карч, тшакьялöны, ягöдалöны.

Медшöр туйыс Пешнигортас асфальта, мöдіккез гравийнöйöсь нето куш му. Уна отирлöн эм асланыс машина. Тшöкыта ветлöны автобуссэз. Эм кык сувтчан да нёль маршрут — 115, 155т, 188, 121. Кудымкарöдз мунны 15 минут.

Пешнигортса видзöтöны телевизор, радио абу. Интернет эм школаын, но оссьö умöля.

Посадсянь позьö баитны мобильникöт (МТС, UTEL дмд). Эм гортся да öтласа телефоннэз.

Пешнигортын эм нёль лавка. Берся вузалан магазиннэз куима:

Альянс
Удача
Туй дорын

Öтік лавкаын вузасьöны хозтоварöн —

Малахит

Быт службаэз абуöсь. Шырсьыны да мый да отирыс ветлöны Кудымкарöдз.

Посадыс эм ФАП. Карсянь вовлöны терапевт да педиатр.

Шойнаыс пешнигортсалöн лöсьöтöм ас посад да Юковчи коласын. Кырасöн шойна янсöтöм кыкö: Важ могильник (матынжык Пешнигорт дынö) да Виль могильник (Юковчиланяс).

Велöтан

Öні Пешнигортын эм шöрöт школа (осьтöм 1885' годö ^[2]) да сылöн филиаллэз: челядьясли да челядьсад. Кöркöся пондöтчан школа посадісь пöдналöмась.

Одзжык школаын вöлісö классэз А (коми) да Б (роч), сэсся, челядьыс лоисö етшажык да, классэз öтлаöтöмась. Неважын шöрöт школаын нач дугдöмась велöтны коми кыв, мыля аймамыс пондöмась сетны челядьнысö Кудымкарись школаэзö, мед не велöтны комисö. 2011/12' восянь мöдöны осьтны коми кыв сьöрті факультатив.

Посадын эм челядькерку (кытöн видзöны и поснит челядьсö).

Культура

Пешнигортын эм

культура керку
библиотека (Белоёв библиотекалöн филиал).

Чулöтаннэз:

Тöдлун – ародз 1' лун
Мамлун – арпомын
Вильво – во помын
Ёрттэзлöн пантасьöммез (спорт) – тöвпом 23' лун
Инькалун + Валентинлун – март пондöтчикö
Ваклун – апрель 1' лун
Верманлун – май 9' лун
Войналун – юнь 22' лун

Апрель вылын овлö Голев нима эстафета. Сэк жö пасйöны школалун.

Юнь помын чулöтöны посадлун.

Одзжык посадас сулалöма вичку, кöдö 1930' воэзö пöдналöмась, а неважын разьöмась. 2011' май 9' лунö сы местаö сувтöтöмась перна да шуöмась лэптыны вичку вились.

Отирыс порйöтöны Розосво, Масленича да Стречалун.

Казьмöтаннэз да сингажöтаннэз

Посадісь парк
Мезмöтісь воинöс казьмöтан да плитаэз, кытчö гижöмöсь ниммез 450 пешнигортсалісь, кöдна усьöмась Совет му дорйикö
В. Д. Хозяшевöс казьмöтан.
Видззез вылас могила.

Археология сьöрті казьмöтаннэз (ломоватовсалöн да родановсалöн культураэз):

Пешнигортісь дзебанін (VII–XI нн.)
Пешнигортісь I овмӧтчан (VIII–XI нн.)
Пешнигортісь II овмӧтчан (VIII–XI нн.)
Пешнигортісь III овмӧтчан (VII–XIII нн.)

Гора нима отир

Голев Леонид Дмитриевич (1925–1980), Советскӧй Союзлöн Герой
Климов Василий Васильевич (*1927), коми гижись.
Хозяшев В. Д. (1913–1933), комсомолісь активист
Четин Геннадий Тихонович (*1943), сьöкыт атлетика сьöрті мирись чемпион (1971).

Микротопониммез

Ӧшмӧссэз

Аксёнова О.П. Кипонісь гижӧм материаллэз. Кудымкар, 2009.
Коми-Пермяцкий национальный округ. Москва-Ленинград, 1948.
Пешнигорт йылісь Перем ладор энциклопедияын (рочӧн)

Ыстісяннэз

Степановчи посадмуись оланіннэз

Ӧння оланіннэз:

Кӧркӧся олан иннэз:

[1] Вот öктіссез сайтісь

[2] Пешнигорт школалöн сайт

[1]

[2]