Коми-Пермяцкöй округ

Коми-Пермяцкöй округ
'Коми-Пермяцкий округ Пермского края'

Вужпас	Дӧрапас
Канму	Роч Федерация
Ыджытжык регион	Перем ладор
Янсалӧм	1 каркытш, 6 район
Веськӧтлан шӧрин	Кудымкар
Аркман кад	1925' февраль 26' лун' во
Министр	Рычков Виктор
Веськöтлан кыввез	коми, роч
Оліссез (2009 во)	116 177
Оліссезлӧн тшӧкыта	3,9 морт/км²
Чужанвуж сьӧрті тэчас	комиэз 59%, роччез 38%
Мувывтор	32 770 км²
Саридз вевдöрсянь  - Медыджыт чут	335 м
Кад кытш	+5 (гожумнас +6)
Телефон код	+7 34-260
Пошта индекссэз	619000
Автомобиль код	59,81,159
Веськöтланлöн сайт

Коми-Пермяцкöй округ (рочӧнжык Коми-Пермя́цкӧй о́круг Пе́ремскӧй кра́йын) — ассяма статуса мувывтор Роч Федерацияын, Перем ладорас. Куйлӧ Урал одзын, Кама йыввезын. Коми отирлӧн чужанін. Коми йӧзыслӧн мӧд чужан му — Коми Республика, куйлӧ Коми кытшсяняс ойвылынжык.

Коми кытшыслӧн мувывтор — 32,77 сюрс км². Оліссез — 127 сюрс морт (2009), ны коласын комиэз 60,2%. Веськӧтлан шӧрин — Кудымкар. Кытшас 6 район: Гайна, Кӧс, Кӧч, Кудымкар, Юрла да Юсьва гӧгӧртасын. Кытшас дзир ӧтік кар — Кудымкар, ӧтік карок — Пожва, 30 посад, 66 посёлок да 590 грезд (деревня).

Кытшыс аркмӧма 1925' годӧ февраль 26' лунӧ. Медодз пырӧ вӧлі Урал (Свердловск) лапӧлӧ (областьӧ), а 1938 во бӧрын — Перем (Молотов) лапӧлӧ. 1993'-2005' воэзӧ вӧлі Роч Федерациялӧ субъектӧн, шусис Перем комиэзлӧн асъюралан кытш. 2005' годся декаб 1' лунсянь, асъюралӧмыс вӧлі вештӧма да, Коми кытшыс лоис ассяма статуса мувывторӧн вились аркмӧтӧм Перем ладорын.

Медыджыт мортӧн Коми кытшын лыддисьӧ Перемсянь иньдӧм министр. Сылӧн эм аслас веськӧтлан, рочӧн шусьӧ Перем ладорлӧн Коми кытш делоэз сьӧрті министерство. Медодзза министрӧн 2005'-2008' воэзӧ вӧлі Баяндин Валерий. Сэсся, 2008' год помсянь, Коми кытш сьӧрті уджалісь министрын пукаліс Быкариз Игорь, а 2012 во юньсянь Рычков Виктор.

Кытшыс олӧ Урал кад сьӧрті: муюгыт (Гринвидз) кад + 5 час (гожумнас + 6 час), Мӧсква кад + 2 час.

Сьӧмнас Коми кытшын лыддисьӧ роч шать (руб). 1 шать = 100 ур.

Унажык отир олӧны вӧр лэдзӧмӧн, тшак-ягӧд да йӧв-яй вузалӧмӧн, мукӧдыс уджалӧны кысъялан сфераын.

Коми кытшын абу кодя кӧрттуйез. Кудмыкарсянь кӧрттуй дынӧдз (Менделеёв нима поз дынӧдз) колӧ мунны 100 км.

Ним

Перем ладорись Коми кытш рочӧнжык шусьӧ Коми-Пермяцкӧй округ Перемскӧй крайын. Татӧн олісь отирыс пыр шуисӧ и шуӧны ассиныс кытшнысӧ Коми округ. Округыс — роч вылісь кӧ вуджӧтны лоӧ кытш. Сідз и пондамӧ сійӧ сэсся шуны ас кыв вылын — Коми кытш. Юраліссез нимтӧмась кытшсӧ медодз Коми (пермяцкӧй) национальнӧй округ, 1937' год бӧрын Коми-Пермяцкӧй национальнӧй округ (комиӧн кӧ шуны, этія лоӧ Коми отирлӧн кытш), 1977' восянь, Роч муын виль Конституция лэдзӧм бӧрас, кытшыслӧн нимыс лоис Коми-Пермяцкӧй автономнӧй округ (комиӧн — Комиэзлӧн асъюралан кытш). Ӧні, асвеськӧтлӧм абу ни да, тыр нимыс кытшыслӧн лоӧ Перем ладорись Коми кытш.

Ассис нимсӧ кытшыс босьтӧма татӧн важынсянь олісь коми отир ним сьӧрті, кӧдна понда сія и вӧлі лӧсьӧтӧм.

Статус

Коми кытш дорын пас

Ӧння тодильнӧй статус Коми кытшыслӧ вӧлі пуктӧма 2007 годӧ апрель коста, кӧр Перем ладор понда туйдӧттэз лэдзись ӧксян (Законодательнӧй собраннё) пыртіс оланӧ Перем ладорлісь Устав. Сы сьӧрті Коми кытшыслӧн мувывторыс (территория) кольччӧ сы ыжда жӧ, мый ыжда вӧлі Перем лапӧвкӧт ӧтлаасьтӧдз.

Перем ладор понда туйдӧттэз лэдзись ӧксянын Коми кытш нимсянь баитӧны кык морт, кӧднӧ бӧрйӧны ӧті манадата кык бӧрьян кытшын.

Коми кытшын Перем ладор юраліссезлісь шуӧммесӧ пыртӧ оланӧ Перем ладорлӧн Коми кытш делоэз сьӧрті министерство. Этія министерствонас веськӧтлӧ Перем ладорлӧн министр, кӧда лоӧ Коми кытшын юралісьӧн.

Уставись 42 параграф сьӧрті Перм ладорын канму (государство) нимсянь веськӧтлан органнэзлӧ колӧ лӧсьӧтны уджнысӧ сідз, медбы перем коми отирлӧн зорамис кыв, лов культура да этнослӧ аскодя мӧдік берся.

Перем ладорись Коми кытшын веськӧтлан кылӧн лоӧ роч кыв. Сыкӧт ӧтлаын веськӧтлан керкуэзын позьӧ баитны и комиӧн (перем коми кыв вылын).

Янсалӧм

Коми кытш Перем ладорын

Перем ладорись Коми кытшӧ пырӧны квать район да ӧтік кар.

Районлӧн ним	Ыджда (км²)	Отир лыд (сюрс морт)	Кыным олан ин	Шӧрин
Гайна район	14928	21	51	Гайна
Кӧсладор район	3462	10	61	Кӧс
Кӧчладор район	2700	12,3	79	Кӧч
Кудымкар район	4741	29,9	295	Кудымкар
Юрла район	3831	12,2	94	Юрла
Юсьва район	3100	29,5	166	Юсьва

Ны коласын коми районнэзӧн лыддисьӧны Гайна, Кӧс, Кӧч, Кудымкар да Юсьва, сваль роч районӧн — Юрла. Ӧнісӧ коми отир лёка рочсялӧ быдлаын, сійӧн и одзза районнэсӧ оз ни позь шуны тырмӧмви комиэзӧн.

Ойвыв районнэз коласӧ пырӧны Гайна, Кӧс, Кӧч да Юрла увтісь муэз, лунвыв районнэзӧн лоӧны Кудымкар да Юсьва увтісь муэз.

Быд районын эм отирсянь бӧрйӧм юралісьыс да ӧксяныс. Нія лӧсьӧтӧны районлыслӧ бюджет да видзӧтӧны асланас мувывторын кӧзяйство да культура зорӧтӧм сьӧрын.

Районнэз асьныс янсалӧны поснитжык муниципал юкӧттэз — посадмуэз вылӧ .

География

Перем ладорись Коми кытшыс куйлӧ Роч муподыслӧн асыввыв тор вылын, Урал керӧссэзсянь рытланьын, Кама ю йыввезын. Перем ладорсис кытшыс босьтӧ ой-рытвыв тор.

Кытш олӧ IV час отын, неӧткодьыс Мӧскваыскӧт — +2 час.

Мувывтор

Муыслӧн ыжда 32,77 сюрс км², этія лоӧ Перем ладорись 20,4%. Коми кытш ыджытжык сэтшӧм канмуэзся кыдз Албанму, Арменму нето Белгия.

Ойвывсянь лунланьӧ кытшыс нюжалӧ 280 км, рытвывсянь асывланьӧ — 180 км.

Кытшыс куйлӧ вылын паськытаэзын. Сылӧн медылісь чутоккез: ойвылын 61°04′ о. п., 52°52′ а. к., лунвылын 58°33′ о. п., 54°47′ а. к., рытвылын 69°32′ о. п., 51°47′ а. к., асыввылын 59°15′ о. п., 56°15′ а. к.

Ойвылас кытшыскӧт ордчӧн куйлӧ коми йӧзыслӧн мӧд чужан му — Коми Республика, рытвылас — Киров лапӧлісь Камакатыт да Зюзьдін районнэз, лунвылын — Перем ладорись Сива, Карагай да Ильинскӧй районнэз, асыввылын — Перем ладорись Добрянка, Усоллё, Совкар да Чердын районнэз.

Ойланься визирыс мунӧ Ойвыв мыссэз кузя, рытланься — Вятка-Перем мыссэзӧт да Камайыв вылынін кузя, лунланьсяыс — сія жӧ вылыніныслӧн мусюррезӧт да Обва-Иньва волькытін кузя. Асывланяс визирыс мунӧ Кондӧс мыссэзӧт, Кӧсва да Весляна лажмытіннэз кузя.

Му

Му пытшкӧс

Роч мупод, кӧдалӧн тай асыввыв дорланяс куйлӧ Коми кытшыс, лоӧ кыксувда: улынжык — кристалл кодь топыт фундамент, вылынжык — пуксьӧссэзісь (осадочнӧй) вевтӧс. Медся уна пуксьӧссэз кольччӧмась палеозой кадся перем системасянь. Коми кытшыслісь мувывторсӧ нія тыртӧны 60% вылӧ. Коми кытш рытвыв визир пӧлӧн паськалӧмась мезозой кадся пуксьӧссэз (вевттьӧны 30% мувывторсис). Геология сьӧрті медтом — кайнозой — кадся пуксьӧссэз быдлаӧт вӧснит вевтӧсӧн шебралӧны важынжык, палеозӧй да мезозой кадӧ, пуксялӧмсӧ.

Му вевдӧр

Му вевдӧрыс Коми кытшын абу ӧткодь. Пуксьӧса породаэз куйлӧны топыт фундамент вылас горизонталь нёжӧнжык, сійӧн и рельефыс унажыксӧ лажмыт да волькыт. Муыс лэбӧма, саридз вевдӧрсянь кӧ лыддьыны, шӧркодяс 100-200 м вылынаӧ.

Кытшыс ойвылын да рытвылын муыс вылынжык. Татӧн сулалӧны Ойвыв мыссэз да Камайыв вылынін. Медся джуджыта муыс лэбӧма Лопва да Юм ю йыввезын, кытӧн адззӧмась и кытшыслісь медвылын чутокcӧ — 329 м.

Лажмытжык да волькытжык муэз паськалӧмӧсь Коми кытш шӧрӧттяс да лун-асыввылын: Весляна лажмытін (татӧн куйлӧны кытшись медлажмыт чутоккез — 120-130 м), Кӧсва лыжмытін, Обва-Иньва волькытін.

Асыввыв визирыс пӧлӧн Коми кытшас буракодь тӧдчӧны Кондӧс мыссэз. Кӧсва да Велва коласын ва юкан визьӧттяс нія йитчӧны Камайыв вылынінкӧт.

Мупытшся шедтассэз

Мупытшся шедтассэзісь Коми кытшын медодз колӧ казьтыштны кӧрт руда, кӧдӧ адззӧмась эшӧ XIX век шӧрын. 1856' годӧ граф Строганов осьтӧма Кува дорын металл керан завод, кӧда уджалӧма 1909 воӧдз. Эмӧсь сідз жӧ мусир (нефть), торф, бивидзан сёйез, извесь иззэз, лыа (песӧк), охра.

Коми кытш озыр и минерал ваэзӧн. Кудымкар да Юсьва районнэзын адззӧмась веськӧтчӧм понда ӧддьӧн лӧсялан ваэз: хлорида-натрияӧсь, сульфата-натрияӧсь, иода-бромаӧсь да сира-ваувтыраӧсь. Позьӧ босьтны бурдӧтчӧм могись и Майкар дорись минерал ва петаніннэз.

Мусиннэзз

Ваэз

Юэз

Коми кытшас 400-ся унажык ю. Невна не быдӧнныс лоӧны Кама бассейнын. Ачыс Кама ю кытшыс му кузя котӧртӧ рытвывсянь асывланяс, а сылӧн вожжес (притоккез) артмӧтӧны кытшыслӧ быдӧс ю везӧт (речнӧй сеть). Шульга вожжес (Весляна, Луп, Леман) ӧктӧны ва Ойвыв мыссэзісь, а веськыттэз (Иньва, Кӧсва) — Камайыв вылынінісь.

Иньва вожжезісь колӧ казьтыштны Кува, Велва, Юсьва, Исыв.

Кӧсва вожжезісь медкузьӧсь — Лолӧг, Лопва, Янчер, Онолва, Сэпӧль, Юм.

Весляналӧн медыджыт вожӧн лоӧ Сьӧдъю.

Тыэз

Тыэз Коми кытшын етшаӧсь, и куйлӧны нія ойланьынжык — Кама ольын, шульга вадӧрас.

Унажык тыыс — ю дорсяӧсь. Нія аркмӧны юыслӧн важ ӧрын, лоӧны джын тӧлісь кодьӧсь, кузьмӧса нето лента кодьӧсь. Медыджыт ны коласіь Нахты, ссээся эмӧсь Кривчи ты, Тундра ты, Улын Старича, Вылын Старича, Вежаты, Леман ты, Валаужом. Ны коддьӧм жӧ юдорся тыэз, кӧть и бура учӧтжыкӧсь панталамӧ Кӧсва, Иньва да Весляна оллезын. Медгырисьӧсь ны коласын аркмӧмась Юсьва районын, Купрӧс посад дынын.

Юдор тыэзся эмӧсь и сэтшӧм тыэз, кӧдна аркмисӧ му вевдӧрын важся лажмалӧммезын, кӧр кыссян йы (ледник) сылікӧ ны кузя котӧртіс ваыс. Этатшӧм тыэзӧн лоӧны Вадты да Оныл, кӧдна куйлӧны Коми кытш ой-рытвылын, Порыш да Утьва юэзлӧн ваюканінын, дзибья вӧр да нюррез коласын.

Пруддэз

Коми кытшын 70 кыным пруд. Нія не быдлаын ӧтмымдаӧсь. Медуна пруддэз Юрла да Кӧч районнэзын. Медыджыттэз коласісь лыддісьӧ сідзжӧ Кува пруд Кудымкарын. Татісь босьтӧны ва карын оліссез понда. Уна пруддэзын быдтӧны чери, мукӧдас чериалӧны, мукӧд дорас шоччисьӧны отир: тульӧтчӧны да уялӧны.

Кама вавидзанін Коми кытшланьӧ петӧ рытвыв дорнас. Татӧн аркмӧмась Иньва да Пожва курьяэз, кытӧн сулалӧны порттэз: Усть Пожва да Майкар.

Нюррез.

Сійӧн, мыля Коми кытшыс куйлӧ волькытінын, ваыс кымӧрсянь усьӧ унаӧв, а пакмӧ сія муись умӧля, татӧн и аркмӧмась ӧддьӧн уна нюррез, медуна ойланяс да шӧрӧттяс. Нюррезісь унажыкыс вевдӧрсяӧсь нето вуджанаӧсь.

Паськыт нюррез куйлӧны Важты да Онолва тыэз гӧгӧр, Утьва да Порыш ю йыввезын. Паськыт да кузь визьӧн нюжалӧны нюррез Кама шульга вадӧр пӧлӧн, Тимшор, Луп, Леман дорезын, Весляна йыввезын. Нюррезлӧн этія чукӧр шусьӧ Гайна нюррезӧн. Уна нюр эм Кама да Кӧсва коласын ва юканінын (Селиш, Солым, Булач). Нежык гырись нюррез куйлӧны Кӧсва да Лолӧг коласын, а сідзжӧ Чус, Янчер да мукӧд ю йыввезын.

Коми кытш лунвылын, кытӧн вундалӧм мыса-кыраса вевдӧрыс сетӧ вевдӧрся ваэзлӧ мымдакӧ дренируйтчыны, нюррез етшажыкӧсь. Невна не быдӧнныс — увдӧрся нюррез, васӧ кыскӧны грунтісь. Куйлӧны нія Иньва бассейнын да ыждананас абу гырисьӧсь.

Климат

Руыслӧн сям Коми кытшын небыта континентвывся: гожумыс кӧть и шоныт, а дженыт, тӧввез жӧ мукӧд воэзӧ сулалӧны ӧддьӧн ни кӧдзытӧсь. Этійӧ позьӧ вежӧртны: кытшыс куйлӧ экваторсянь зэв ылын да и океан доррезсянь абу матын. Сійӧн и руыслӧн тӧвся шонтӧгыс (температураыс) лажмытӧв, а неӧткодьыс тӧвся да гожумся шонтӧггез коласын ӧддьӧн ыджыт.

Уна во сьӧрна казялӧмась: январын шӧрӧт шонтӧгыс (температураыс) Коми кытшас -16°С, юль коста — +17°С. Сідзкӧ неӧткодьыс шонтӧгыслӧн лоӧ годнас 33°, а мукӧд воэзӧ медыджыт да медучӧт шонтӧггез коласын неӧткодьыс вермас локны 85°-ӧдз. Кӧть и кытшыс куйлӧ 3000 км-ся ылынжык Атлантика океансяняс, этія океаныс сё жӧ буракодь павкӧ сы климатыслӧ. Годыслӧн кӧдзыт кадӧ рытвыв да лун-рытвыв тӧввез вайлӧны кымӧррез, сы коста пондӧ лымьявны да шоналыштлӧ. А воыслӧн шоныт кадӧ нія жӧ тӧввез чинтӧны руыслісь шонтӧгсӧ да вайлӧны зэррез.

Быдмассэз

Коми кытшын быдмӧтыс быдсяма.

Вӧрпода

Коми кытшыслӧн ыджытжык тор вӧр увтын куйлӧ, сійӧн и фаунасӧ татӧн аркмӧтӧны вӧрын олісь подаэз. Ассямаӧн лоӧ сія, мый кытшас сорасьӧны ӧтамӧдныскӧт фаунаэз Европалӧн да Азиялӧн.

Йӧлӧнвердіссезлӧн татӧн эм кынымкӧ увтыр.

Сюраэз коласісь пантасьӧны вӧрмӧс (йӧра), ойвыв кӧр, Сибирись вовлӧ косуля.

Лёквиррезӧн шусьӧны руда-гӧрд ош, кӧин, руч, вӧркань, тулан, чужмӧр, учкись, хорь, барсук, вурд, лана.

Йылӧмӧн йылӧны йирсиссез: ур, кӧч, виззяорда, ондатара, мой, быдкодь шыррез.

Гебсёйиссез шӧрись казьтыштам муканьӧс, ёжӧс, мушырӧс.

Кайпӧлӧс быдчужӧма жӧ. Вӧрын олӧны сьӧла, дозмӧр, тар, чочком да руд бадьӧг, вальдшнеп, а нысся и поснит каёккез: сера кыр, сизь, уркай, кӧк, герскан, сырчик (пичик), перк, жонь, чикыш, джыдж, пистӧг, рудкай да мӧдіккез.

Уялісь пӧткаэзӧн лоӧны быдкодь чӧжжез (уткаэз), дзодзоггез, туриэз, юссез.

Яй вылын олӧны кутш, кайварыш, шырварыш, тарварыш, сюзь, тюгуй (лунь), тупка, зобга (неясыть) да мукӧд.

Чериэз Коми кытшын 30-ся унажык берся. Мудунаӧсь карп увтырись чери: ёді, сын, кельчи, жерег, аргыш, шаклей, гов, тыпыв, пескан, линь.

Лёквиррез коласын тӧдсаӧсь сирчери, судак, муткыль, ёкыш, дарга да кин да.

Коми кытшын отир важынсянь вӧралӧны. Ӧні кыйӧны 30 мымда вид вӧрпода. Медуна уралӧны, кӧчалӧны, ручалӧны. Кучиккез понда кыйӧны ондатраӧс, туланӧс да мойӧс. Лэдзӧгыс кӧ эм, позьӧ петны и гырисьжык вöрпиэз вылӧ: кутны вӧрмӧсӧс, ошӧс, кӧинӧс. Арнас позьӧ кыйны и кай-пӧтка: тар, дозмӧр, сьӧла, уялісь кайсӧ (чӧжжесӧ).

Отир

Кытӧн олӧны

Мый керӧны

История

Миян эраӧдз I в. – миян эралӧн XII в.

Коми-пермяккез – Прикамьелӧн йӧз коласын медваж йӧз. 150-130 сюрс во сайын медодззаись морт шедіс Чусовой да Кама юэз дорӧ. Кытӧнкӧ миян эраӧдз 9 сюрс во гӧгӧр пондісӧ аркмыны Евразиялӧн финно-угорской йӧззэз. Нія аркмӧтісӧ оланіннэз, нуӧтісӧ хозяйство – Кама да Волга гӧгӧр чужис ӧтласа финноязычнӧй котыр – ананьинской, кӧда сэсся миян эраӧдз мӧдӧдз тысячелетиеын вуджӧ пьяноборскӧй да гляденовскӧй археологическӧй культураэзӧ. Натьтӧ, нылӧн племёэз и лоисӧ Приуральеись да Поволжьеись ӧнняся финноязычнӧй йӧзлӧн предоккезӧн. Сыбӧрын эта котыр разсис учӧтжык торрез вылӧ, ны коласын вӧлісӧ и коми-пермяккезлӧн предоккез: ломоватовской, неволинской и родановской археологической культураэзлӧн племёэз. Ломоватовской и родановской культуралӧн памятниккез (V-XV вв.), кӧднӧ, натьтӧ, колисӧ кӧркӧся коми-пермяккез, адззӧмӧсь ойвыв ладорын Камско-Печорско-Вычегодской пограничьесянь лунвыв ладорын Чусовой юӧдз, Камалӧн пондӧтчӧмсянь Ураллӧн предгорьеӧдз. Территорияыс лӧсялӧ ӧнняся Перемскӧй крайлӧн да Кировской обласьтлӧн восточной торлӧн территориякӧт.

Медшӧр уджӧн отирлӧн сэк вӧлі вӧралӧм, чериалӧм, быдкодь ремеслоэз, а сыбӧрын му вылын да солӧн удж. Коми-пермяккез велалісӧ уджавны кӧртӧн, пондісӧ кужны керны вӧрпи вылӧ да быдкодь ассяма морттэз/чуддэз вылӧ вачкисяна украшеннёэз оловоись да медись, нія лоисӧ тӧдсаӧсь быдӧс Россия пасьта «пермский звериный стиль» ним увтын.

1920-ӧт воӧдз шусисӧ пермяккезӧн (пермиччезӧн, пермянаӧн), а сэсся аркмис этноним «коми-пермяки». Кыв «коми», лингвисттэз сьӧрті, медодзза ним йӧзлӧн и вежӧртсьӧ кыдз «ас родвужлӧн, ас племёлӧн морт».

Коми-пермяккез торйӧтчӧны нёль этнографическӧй группа вылӧ:

• иньвенской (южнӧй/лунвывся, Иньва юсянь, медыджыт группа, коми-пермяккезлӧн медшӧр тор);
• косинско-камской (северной/ойвывся, Коса да Кама юэзсянь);
• верхнекамской (зюздинской, Сюзьва юсянь);
• язьвинской (Язьва юсянь)

Ойвывся да лунвывся комиэз торйӧтчӧны не только кыв сьӧрті, но и хозяйственной да культурно-бытовӧй ассямаэз сьӧрті.

Коми Пармаын вӧлӧмась археология сьӧрті сэтшӧм культураэз:

• Ананьинса
• Гляденса (м.э.о. II вексянь м.э. III векӧдз)
• Ломоватовса (IV-IX веккезӧ)
• Родановса (IX-XV веккезӧ)

XII-XV вв.

Коми-пермяккезлӧн этнической ӧтлаӧтсьӧмлӧн кад. Перем Великаялӧн (коми-перм. Ыджыт Перем ӧксуму) Кама, Вишера, Колва да Язьва вылын зорамӧм.

Эта кадӧ Перемскӧй муэз вӧлісӧ Новгородской республика пытшкын и 1471 воӧдз ӧтлаын Югракӧт шусьӧны кыдз новгородской «волосттез». Тӧдса, мый перемскӧй муэз, кыдз и югорскӧйес, XII векын ни вештісӧ Новгородлӧ дань.

Верхньӧй Прикамьеись коми-пермяккез пыр вузасисӧ Поволжьекӧт и прикаспийской регионісь странаэзкӧт, кытчӧ Камаӧт да Волгаӧт муніс веськыт туй.

Отир веритіс язычествоӧ. Тӧдса уналӧ Чердыньын да Искорын святилищеэзӧн.

1472 во

ХѴ век шӧрын Москваись княззез пондісӧ сувтӧтны Перем Великаяӧ ассиныс юраліссезӧс, а 1472 воӧ муэс пырисӧ Роч государствоӧ. XVIII век помӧдз муніс коми-пермяккезлӧн ӧтлаӧтсьӧм.

Сэк жӧ чулӧтчис отирлӧн пыртӧм. Но комиэз дыр кежӧ эшӧ кольччисӧ язычниккезӧн. Эта йылісь висьталӧ пермская деревянная скульптура или «пермские боги» - Енлӧн да вежаэзлӧн (святӧйезлӧн) объёмной изображеннёэз.

Унавося олан роччезкот ордчӧн сідзжӧ пуктіс пай коми-пермяккез культураӧ и быто: аркмисӧ ӧткодь семейной обычайез, календарной обряддэз да вежалуннэз. Но язычество, ассяма торрез кӧдалӧн ӧнӧдз эшӧ пантасьӧны, да религия аркмӧтісӧ мӧдкодь, невачкисяна дзарньӧв олан вылӧ да сы вылӧ, мый гӧгӧртӧ йӧзсӧ.

Коми-пермяккез гортӧн кӧркӧ (XVII век помӧдз) вӧлісӧ уна районнэз Перем крайись (Чердынской, Соликамской, Усольской, Карагайской, Ильинской), ӧні жӧ сэтчин етша ни позьӧ пантавны кинӧскӧ комиэзісь.

XVI-XIX вв.

1558 воӧ муэз Камаӧт Соликамсксянь Чусовойӧдз сетісӧ Строгановвезлӧ. Сэксянь лунвывся коми-пермяккезлӧн муэз вылын (Соликамскӧй уезд) аркмӧ крепостничество. Ойвывся коми-пермяккез (Чердынскӧй уезд) кольччӧны государственнӧй крестьянаӧн. Нія вештісӧ налоггез казнаӧ да нуõтісӧ государственной удж строитісӧ Московско-Сибирской тракт, кӧда муніс Перем Великая муззот.

ХVІІІ век пондӧтчӧмын коми-пермяккез олісӧ унажык Чердынской уездлӧн 4 погостын (Гайнской, Косинской, Юксеевской да Верх-Язьвинской) да Соликамской уездлӧн 9 погостын (Кудымкарской, Майкорской, Кылосовской, Егвинской, Георгиевской, Богородской, Николаевской, Юсьвинской, Купросской). Сэк эшӧ аркмӧм территория кольччис ӧння кадӧдз (неыджыт вежсьӧммезӧн). Сія жӧ кадӧ лӧсялісӧ муэз и коми- пермяккезлӧн медшӧр этнографической группаэзлён.

1795 вося ревизия сьӧрті Верхньӧй Кама вылын (1797 восянь Перемскӧй губерния) оліс 29800 мымда коми-пермяк. 1897 воӧ Медодзза Россия пасьта перепись висьталӧ 92461 коми-пермяк йылісь Перемскӧй губернияын.

Бура отсалісӧ зорамны коми-пермяккез хозяйстволӧ да культуралӧ осьтӧм XVIII-XIX веккезӧ Пожваын (1754), Майкорын (1812) да Куваын (1856) заводдэз. Пожвинской завод коста 1799 воӧ аркмис ӧння Коми-Пермяцкӧй округлӧн территория вылын медодзза школа. Грамотность содтӧмлӧ уна отсалісӧ земствоэз: XIX веклӧн медбӧрья воэзӧ нія осьтісӧ дасся унажык школа.

Уна морт Иньвенскӧй крайын вузасисӧ няньӧн. Медшӧр – Кудымкарын да Юсьваын. Быдмис дон верхнекамскӧй, косинскӧй да иньвенской вӧррезлон Уралын горной да горнозаводской промышленностьлӧн зорамӧм коста. Медшӧр удж, кӧдӧн позис судзӧтны сьӧм крепостной право мунӧм бӧрын, вӧлі руда да пес заводдэз вылӧ новйӧтӧм да совлӧн промыселлэз. Судостроеннё зорамӧм увья Косаӧт XIX век шӧрын быд во кылӧтісӧ уна вӧр, сідз кыдз Прикамьелӧн совлӧн промышленнность вӧлі древесиналӧн медыджыт потребительӧн.

Медшӧр кустарной промыселлэзон вӧлісӧ кузнечной, скорняжной и красильной удж.

Сы коста округлӧн территория вӧлі сэтшӧм административно-территориальной образованнёэзын:

• ХV веклӧн мӧдік тор - 1708 г. - Перем Великая (Чердынскӧй княжество) составын;
• 1708-1727 воэзӧ - Сибирской губерния составын;
• 1727-1781 воэзӧ - Казанской губерния составын; - 1781-1923 воэзӧ - Перемскӧй губерния составын.

1919 во

1919 воӧ, Гражданской война коста, Пётр Иванович Субботин-Пермяк вӧлі Наркомпрослісь изобразительной искусствоэзлӧн Коллегияын уполномоченной статусын и кужис аркмотны Перемын и Кудымкарын (сэк Кудымкор село) художественной мастерскойез. Нія лоисо регионлӧн культурной центрӧн, кытӧн велӧтісӧ живописьӧ, графикаӧ, керамикаӧ, пукӧт уджӧ и мӧдік ремеслоэзӧ, а сідзжӧ чулӧтісӧ выставкаэз, лекцияэз да спектакллез. Субботин-Пермяк да сы инь Евстолия Ивановна отсӧтӧн мастерскӧйез пондӧтісӧ округлісь искусство, образование да культура зорӧтӧм, именно нысянь недыр мыйись аркмисӧ музеез, школаэз, училищеэз да театр.

1921 вося июль 30 лунӧ Кудымкарын вӧлі осьтӧм П. И. Субботин-Пермяк нима краевӧй национальной музей.

1925 вося февраль 26 лунӧ

1925 вося февраль 26 лунӧ Всероссийской центральной исполнительнӧй комитетлӧн (ВЦИК) постановленнёсянь Уральскӧй областьын вӧлі аркмӧтӧм Коми-Пермяцкой национальной округ. Эта вӧлі СССР-ын медодзза национальной округ, кӧда сьӧрті сэсся аркмисӧ и мӧдік национальной округгез том Советскӧй странаын. Экономической причинаэз увья Москваын ВЦИК-ись Президиумлӧн Комиссия лыддис, мый буржык аркмӧтны округ Уральской областьын (кӧркӧся Перемскӧй, Екатеринбургской, Челябинскӧй да Тюменской губернияэз). Жагӧна округӧ пырисӧ аркмӧтӧм 1926 вося сентябрь 15 лунӧ Кочевскӧй да Гайнской районнэз, а 1941 вося январь 13 лунӧ – Белоевской район. Национальной округлӧн аркмӧтӧм коста вӧлі пыртӧм кыв «Пермяцкой», мый висьталӧ йӧз йылісь, кӧда олӧ сэтӧн. Сыбӧрын Уральской облисполком решитіс шуны округ «Коми-Пермяцкойӧн».

Коми-Пермяцкой округ аркмӧтӧм отсаліс коми-пермяккез культура зорамӧмлӧ. Чулӧтсис радио- и электрофикация. 1927 воӧ пондіс уджавны округын медодзза ГЭС, лоӧ сельскохозяйственной техника, медодззаись мыччассьӧ кино, оссьӧны культуралӧн да образованнёлӧн учрежденнёэз, округӧ пондісӧ локны квалифициованной специалисттэз, аркмӧ национальной, политической, трудовой и культурной элита.

2000-от воэз

2005-ӧт вося декаб 1 лунӧ Коми-Пермяцкой автономной округ да Перемскӧй область йитсисӧ да аркмӧтісӧ Перемскӧй край, кӧдаын Коми- Пермяцкиӧй округ лоис ассяма статуса административно-территориальной единицаӧн.

Округын экономическӧй ситуация увья эта вӧлі колана процесс. Йитӧм одзын 2003 вося декаб 7 лунӧ чулаліс референдум, кӧда вылын кыкнан регионісь унажыкыс голосуйтіс ӧтласа субъект понда.

Эта одзын 2003 вося октябӧ Коми-Пермяцкой округӧ вовліс Россиялӧн Президент - В.В. Путин.

Коми-Пермяцкой округ пуктӧ пай Перемской крайлон быд олан торо, содто ассямасӧ аслас культураӧн.

Оні Коми-Пермяцкой округ куйлӧ Перемской крайлӧн северо-западын, сылӧн ыждаыс 32,7 сюрс км2 мымда (20% быдӧс регионлӧн территориясянь), отирлӧн лыд 101,6 сюрс морт 01.01.2024 кежӧ, мый лоӧ 4% Перемской крайись быдӧс населеннёсянь.

Коми-пермяккезлӧн лыд 2020-2021 воэзся медбӧрья перепись сьӧрті 50163 морт (50% округлӧн населеннёсянь). Коми-пермяккез – лыд сьӧрті куимӧт йӧз Перемскӧй крайын. Сы коста коми-пермяцкӧй кыв кыдз чужан кыв Прикамьеын перепись сьӧрті лыддьӧ 38,2 сюрс мымда морт. Кыв сідзжо лоб куимӧтӧн лыд сьӧрті Перемской крайын. Ордчон коми-пермяккезкӧт округын олӧны роччез, кӧдна аркмӧтісӧ ассиныс ареаллэз (Юрлинской муниципальный округ).

Кӧзяйство

Берся керӧтӧм (перерабатывающӧй промышленность)

Видз-му уджалӧм (сельскӧй кӧзяйство)

Вӧр лэдзӧм

Строитчанторрез керӧм

Транспорт да йитчан (связь)

Вузасьӧм

Бытын отирлӧ отсасьӧм

Сьӧм бергӧтӧм (финанссэз)

Керкаэз видзан (жилкомхоз)

Учӧт уджбергӧтӧм (малӧй предпринимательство)

Культура

Видзӧт сідзжӧ: Коми отирлӧн важся культура

Важ поверьёэз

Серӧтӧм

Паськӧм

Театр

• Перем коми отирлöн театр (М. Горькӧй нима)

Небӧг лэдзӧм

Перем муын олісь комиэз понда 1921' восянь пондісӧ лэдзны небӧггез молодцов анбурӧн, в 1932' восянь вуджисны коми латыньӧ. Латыньсис енӧвтчисӧ 1937' арнас. 1927' во шӧрӧдз небӧггез лэдзисӧ в-а диалект вылын, а сыбӧрын пыртісӧ в/л вежласьӧм. Библиотекаэз

• Перем коми отирлӧн медшӧрӧт библиотека (М. П. Лихачёв нима)
• Перем коми челядь понда медшӧрӧт библиотека (А. Н. Зубов нима)

Архиввез

• Перем коми кытшись архив

Музейез

• Перем коми асладор музей (П. И. Субботин-Пермяк нима)
• Субботин-Пермяклӧн керку-музей

Культура шӧриннэз

• Перем коми этнокультура сьӧрті шӧрин

Кино

Религия

Коми кытшын унажык отирыс важынсянь, XV сугӧдсянь эшӧ, эскӧмась-веритӧмась Иисус Христослӧ, кӧть и чучкӧй (языческӧй) нёж юрбытӧм абу жӧ нач вунӧтӧма. 1894' воын ӧння Коми кытш му вылын вӧлӧма 24 вичку да 1 монастыр. Советтэз дырни унажык йӧзыс ентӧмалӧм, вичкуэз пӧднассьӧмась. Мукӧдыс Ентӧг олӧ и ӧні. Но 1990' воэз бӧрын Христоса вичку бӧра пондіс кыскыны ас дынӧ йӧзсӧ.

Медуна отирыс пыртчӧмӧсь Роч буркывья вичку велӧтӧм сьӧрті. Этія вичкулӧн оссьӧмась 12 юрбытан керку: Кудымкарын (Микола вичку), Карпов посадын да мукӧдлаын.

Мӧднёжа эскиссез коласын эмӧсь адвентисттэз (Христосаэзлӧн Сизимӧт лун видзчисян вичку), витдасӧтлунняэз (Христосаэзлӧн «Виль Йитӧт» вичку), баптисттэз (Христосаэзлӧн «Бур юӧр сьӧрті» вичку). Коми кытш ойвылын ӧті-мӧділаын олӧны и кержаккез.

Перем коми кыв вылӧ Бур юӧр (Евангеллё) медодз вӧлі вуджӧтӧма 1823' годӧ (небӧгсӧ гижӧма Йӧг посадісь поп Любимов Феодор), сэсся вежа небӧггез комиӧн печатайтлӧмась XIX век помын — XX век пондӧтчикӧ Казаньын. Ӧння кадӧ Коми кытш понда Ен гижӧт лэдзӧны Финн муын, сэтчинісь öкмыс коми небӧг ни вайӧмась Христос велӧтӧм сьӧрті.

Медбӧрья кадӧ Перем ладорись юраліссез мӧдӧны лӧсьӧтны Коми кытшын чучкӧй нёж юрбытан шӧрин, мыля комиэз коласын бура видзсьӧ и чучкӧй лолыс.

Юӧртан везӧт

Коми кытшын петӧны сизим газета. Ны колысын омӧн округ пасьта мунӧны «Парма» да «Парма-Новости». Вит районын сідз жӧ эм асланыс газетаӧн. Шочыника лэдзӧны челядь понда журнал, «Силькан» нимаӧ, öні Перем лэдзö челядь понда мöд журнал «Сизимок».

«Парма» газетаын недель вылас ӧтчид петӧ коми кыв вылын листбок «Коми говк». Иньва районісь «Иньвенскӧй край» нима газетаын тӧлісьнас ӧтпырись петӧ комиӧн нёль полосаа содтӧт «Кама кытшын». 2010' март 5' лунсянь «Кама кытшын» лыддиссьӧ торья газетаӧн, тӧлісь вылас петӧ кык нумерыс.

Кудымкарын кык радио шӧрин. Ӧтыс — «Всеросcийскӧй» телерадиокомпания бердын «Перем» филиалыслӧн юкӧт. Мӧдыс — аспондасис уджалан «Союз-FМ-Кудымкар» радиопоз, кӧда лэдзӧ эфирӧ программаэз ультрадженыт гыэз пырйӧт.

Телевидз лӧсьӧтӧ сія жӧ «Перем» филиал.

Комиӧн телевизорӧт баитӧны «Перем» юкӧтсянь лун вылас джын час, радиӧт — 10 минут гӧгӧр. Радио «Союз-FМ-Кудымкар» пыр мукӧд коста кылӧ жӧ коми сёрниыс.

Отирӧс велӧтӧм

• Кудымкарын Удмуртскöй государственнöй университетлöн Филиал

Лысин видзӧм

Коми кытшын уджалӧны сэтшӧм лысин видзаніннэз:

• кытш понда больнича (Кудымкар)
• кар понда поликлиника (Кудымкар)
• пиньвеськӧтан поликлиника (Кудымкар)
• синвеськӧтан диспансер (Кудымкар)
• туберкулёзвеськӧтан диспансер (Кудымкар)
• кучик да венерология сьӧрті диспансер (Кудымкар)
• физкультура сьӧрті диспансер (Кудымкар)
• инькаэз понда консультация (Кудымкар)
• челядь понда консультация (Кудымкар)
• кытш понда санитария-эпидемиология сьӧрті поз (Кудымкар)

Видзӧт сідзжӧ

• Коми Республика
• Перем ладор
• Коми отир
• Коми кыв

Ыстöттэз

• Коми кытш делоэз сьӧрті министерстволӧн сайт: [1]
• «Парма-новости» газеталӧн сайт: [2]
• «Парма» газеталӧн сайт: [3]
• Коми кытшись сайт «kudymkar.org» = «komiperm.ru» [4]
• Коми кытшлӧн важ сайттэз: [5], [6], [7]
• Чудь-йӧграэзлӧн юӧртан шӧрин: [8]

Ӧшмӧссэз

• Бачев Г.Т., Зубов Ю.П. Страницы истории Коми-Пермяцкого автономного округа. Пермь, 1995. ISBN 5-88-9-008-6.
• География Коми-Пермяцкого автономного округа. Пермь, 1992. ISBN 5-7625-0162-0.
• Коми-пермяккез. Кудымкар, 2008. ISBN 978-963-9876-09-05.
• Коми-Пермяцкий автономный округ. Страницы истории. Кудымкар, 1988. ISBN 5-7625-0178-7.
• Коми-Пермяцкий автономный округ на рубеже веков. Кудымкар, 2000. ISBN 5-87901-051-1.
• Коми-Пермяцкий национальный округ. Москва-Ленинград, 1948.