Коми-Пермяцкöй округ

Босьтöм Википедияись
( Мӧдӧталӧма Перем ладорись Коми кытш-ись )
Коми-Пермяцкöй округ
'Коми-Пермяцкий округ Пермского края'
Вужпас
Дӧрапас
Канму Роч Федерация
Ыджытжык регион Перем ладор
Янсалӧм 1 каркытш, 6 район
Веськӧтлан шӧрин Кудымкар
Аркман кад 1925' февраль 26' лун' во
Министр Рычков Виктор
Веськöтлан кыввез коми, роч
Оліссез (2009 во) 116 177[1]
Оліссезлӧн тшӧкыта 3,9 морт/км²
Чужанвуж сьӧрті тэчас комиэз 59%, роччез 38%
Мувывтор 32 770 км²
Саридз вевдöрсянь
 - Медыджыт чут

 335 м
Коми-Пермяцкöй округ мусерпас
Кад кытш +5 (гожумнас +6)
Телефон код +7 34-260
Пошта индекссэз 619000
Автомобиль код 59,81,159
Веськöтланлöн сайт

Коми-Пермяцкöй округ (рочӧнжык Коми-Пермя́цкӧй о́круг Пе́ремскӧй кра́йын) — ассяма статуса мувывтор Роч Федерацияын, Перем ладорас. Куйлӧ Урал одзын, Кама йыввезын. Коми отирлӧн чужанін. Коми йӧзыслӧн мӧд чужан му — Коми Республика, куйлӧ Коми кытшсяняс ойвылынжык.

Коми кытшыслӧн мувывтор — 32,77 сюрс км². Оліссез — 127 сюрс морт (2009), ны коласын комиэз 60,2%. Веськӧтлан шӧринКудымкар. Кытшас 6 район: Гайна, Кӧс, Кӧч, Кудымкар, Юрла да Юсьва гӧгӧртасын. Кытшас дзир ӧтік кар — Кудымкар, ӧтік карок — Пожва, 30 посад, 66 посёлок да 590 грезд (деревня).

Кытшыс аркмӧма 1925' годӧ февраль 26' лунӧ. Медодз пырӧ вӧлі Урал (Свердловск) лапӧлӧ (областьӧ), а 1938 во бӧрын — Перем (Молотов) лапӧлӧ. 1993'-2005' воэзӧ вӧлі Роч Федерациялӧ субъектӧн, шусис Перем комиэзлӧн асъюралан кытш. 2005' годся декаб 1' лунсянь, асъюралӧмыс вӧлі вештӧма да, Коми кытшыс лоис ассяма статуса мувывторӧн вились аркмӧтӧм Перем ладорын.

Медыджыт мортӧн Коми кытшын лыддисьӧ Перемсянь иньдӧм министр. Сылӧн эм аслас веськӧтлан, рочӧн шусьӧ Перем ладорлӧн Коми кытш делоэз сьӧрті министерство. Медодзза министрӧн 2005'-2008' воэзӧ вӧлі Баяндин Валерий. Сэсся, 2008' год помсянь, Коми кытш сьӧрті уджалісь министрын пукаліс Быкариз Игорь, а 2012 во юньсянь Рычков Виктор.

Кытшыс олӧ Урал кад сьӧрті: муюгыт (Гринвидз) кад + 5 час (гожумнас + 6 час), Мӧсква кад + 2 час.

Сьӧмнас Коми кытшын лыддисьӧ роч шать (руб). 1 шать = 100 ур.

Унажык отир олӧны вӧр лэдзӧмӧн, тшак-ягӧд да йӧв-яй вузалӧмӧн, мукӧдыс уджалӧны кысъялан сфераын.

Коми кытшын абу кодя кӧрттуйез. Кудмыкарсянь кӧрттуй дынӧдз (Менделеёв нима поз дынӧдз) колӧ мунны 100 км.

Ним[вильмӧтны | Вильмӧтны код]

Перем ладорись Коми кытш рочӧнжык шусьӧ Коми-Пермяцкӧй округ Перемскӧй крайын. Татӧн олісь отирыс пыр шуисӧ и шуӧны ассиныс кытшнысӧ Коми округ. Округыс — роч вылісь кӧ вуджӧтны лоӧ кытш. Сідз и пондамӧ сійӧ сэсся шуны ас кыв вылын — Коми кытш. Юраліссез нимтӧмась кытшсӧ медодз Коми (пермяцкӧй) национальнӧй округ, 1937' год бӧрын Коми-Пермяцкӧй национальнӧй округ (комиӧн кӧ шуны, этія лоӧ Коми отирлӧн кытш), 1977' восянь, Роч муын виль Конституция лэдзӧм бӧрас, кытшыслӧн нимыс лоис Коми-Пермяцкӧй автономнӧй округ (комиӧн — Комиэзлӧн асъюралан кытш). Ӧні, асвеськӧтлӧм абу ни да, тыр нимыс кытшыслӧн лоӧ Перем ладорись Коми кытш.

Ассис нимсӧ кытшыс босьтӧма татӧн важынсянь олісь коми отир ним сьӧрті, кӧдна понда сія и вӧлі лӧсьӧтӧм.

Статус[вильмӧтны | Вильмӧтны код]

Коми кытш дорын пас
Унажык сы йылiсь видзöт: Перем ладорись Коми кытшлӧн статус

Ӧння тодильнӧй статус Коми кытшыслӧ вӧлі пуктӧма 2007 годӧ апрель коста, кӧр Перем ладор понда туйдӧттэз лэдзись ӧксян (Законодательнӧй собраннё) пыртіс оланӧ Перем ладорлісь Устав. Сы сьӧрті Коми кытшыслӧн мувывторыс (территория) кольччӧ сы ыжда жӧ, мый ыжда вӧлі Перем лапӧвкӧт ӧтлаасьтӧдз.

Перем ладор понда туйдӧттэз лэдзись ӧксянын Коми кытш нимсянь баитӧны кык морт, кӧднӧ бӧрйӧны ӧті манадата кык бӧрьян кытшын.

Коми кытшын Перем ладор юраліссезлісь шуӧммесӧ пыртӧ оланӧ Перем ладорлӧн Коми кытш делоэз сьӧрті министерство. Этія министерствонас веськӧтлӧ Перем ладорлӧн министр, кӧда лоӧ Коми кытшын юралісьӧн.

Уставись 42 параграф сьӧрті Перм ладорын канму (государство) нимсянь веськӧтлан органнэзлӧ колӧ лӧсьӧтны уджнысӧ сідз, медбы перем коми отирлӧн зорамис кыв, лов культура да этнослӧ аскодя мӧдік берся.

Перем ладорись Коми кытшын веськӧтлан кылӧн лоӧ роч кыв. Сыкӧт ӧтлаын веськӧтлан керкуэзын позьӧ баитны и комиӧн (перем коми кыв вылын).

Янсалӧм[вильмӧтны | Вильмӧтны код]

Коми кытш Перем ладорын
Унажык сы йылiсь видзöт: Перем ладорись Коми кытшлӧн янсалӧм

Перем ладорись Коми кытшӧ пырӧны квать район да ӧтік кар.

Районлӧн ним Ыджда

(км²)

Отир лыд

(сюрс морт)

Кыным

олан ин

Шӧрин
Гайна район 14928 21 51 Гайна
Кӧсладор район 3462 10 61 Кӧс
Кӧчладор район 2700 12,3 79 Кӧч
Кудымкар район 4741 29,9 295 Кудымкар
Юрла район 3831 12,2 94 Юрла
Юсьва район 3100 29,5 166 Юсьва

Ны коласын коми районнэзӧн лыддисьӧны Гайна, Кӧс, Кӧч, Кудымкар да Юсьва, сваль роч районӧн — Юрла. Ӧнісӧ коми отир лёка рочсялӧ быдлаын, сійӧн и одзза районнэсӧ оз ни позь шуны тырмӧмви комиэзӧн.

Ойвыв районнэз коласӧ пырӧны Гайна, Кӧс, Кӧч да Юрла увтісь муэз, лунвыв районнэзӧн лоӧны Кудымкар да Юсьва увтісь муэз.

Быд районын эм отирсянь бӧрйӧм юралісьыс да ӧксяныс. Нія лӧсьӧтӧны районлыслӧ бюджет да видзӧтӧны асланас мувывторын кӧзяйство да культура зорӧтӧм сьӧрын.

Районнэз асьныс янсалӧны поснитжык муниципал юкӧттэз — посадмуэз вылӧ .

География[вильмӧтны | Вильмӧтны код]

Перем ладорись Коми кытшыс куйлӧ Роч муподыслӧн асыввыв тор вылын, Урал керӧссэзсянь рытланьын, Кама ю йыввезын. Перем ладорсис кытшыс босьтӧ ой-рытвыв тор.

Кытш олӧ IV час отын, неӧткодьыс Мӧскваыскӧт — +2 час.

Мувывтор

Муыслӧн ыжда 32,77 сюрс км², этія лоӧ Перем ладорись 20,4%. Коми кытш ыджытжык сэтшӧм канмуэзся кыдз Албанму, Арменму нето Белгия.

Ойвывсянь лунланьӧ кытшыс нюжалӧ 280 км, рытвывсянь асывланьӧ — 180 км.

Кытшыс куйлӧ вылын паськытаэзын. Сылӧн медылісь чутоккез: ойвылын 61°04′ о. п., 52°52′ а. к., лунвылын 58°33′ о. п., 54°47′ а. к., рытвылын 69°32′ о. п., 51°47′ а. к., асыввылын 59°15′ о. п., 56°15′ а. к.

Ойвылас кытшыскӧт ордчӧн куйлӧ коми йӧзыслӧн мӧд чужан му — Коми Республика, рытвылас — Киров лапӧлісь Камакатыт да Зюзьдін районнэз, лунвылын — Перем ладорись Сива, Карагай да Ильинскӧй районнэз, асыввылын — Перем ладорись Добрянка, Усоллё, Совкар да Чердын районнэз.

Ойланься визирыс мунӧ Ойвыв мыссэз кузя, рытланься — Вятка-Перем мыссэзӧт да Камайыв вылынін кузя, лунланьсяыс — сія жӧ вылыніныслӧн мусюррезӧт да Обва-Иньва волькытін кузя. Асывланяс визирыс мунӧ Кондӧс мыссэзӧт, Кӧсва да Весляна лажмытіннэз кузя.

Му[вильмӧтны | Вильмӧтны код]

Му пытшкӧс

Роч мупод, кӧдалӧн тай асыввыв дорланяс куйлӧ Коми кытшыс, лоӧ кыксувда: улынжык — кристалл кодь топыт фундамент, вылынжык — пуксьӧссэзісь (осадочнӧй) вевтӧс. Медся уна пуксьӧссэз кольччӧмась палеозой кадся перем системасянь. Коми кытшыслісь мувывторсӧ нія тыртӧны 60% вылӧ. Коми кытш рытвыв визир пӧлӧн паськалӧмась мезозой кадся пуксьӧссэз (вевттьӧны 30% мувывторсис). Геология сьӧрті медтом — кайнозой — кадся пуксьӧссэз быдлаӧт вӧснит вевтӧсӧн шебралӧны важынжык, палеозӧй да мезозой кадӧ, пуксялӧмсӧ.

Му вевдӧр

Му вевдӧрыс Коми кытшын абу ӧткодь. Пуксьӧса породаэз куйлӧны топыт фундамент вылас горизонталь нёжӧнжык, сійӧн и рельефыс унажыксӧ лажмыт да волькыт. Муыс лэбӧма, саридз вевдӧрсянь кӧ лыддьыны, шӧркодяс 100-200 м вылынаӧ.

Кытшыс ойвылын да рытвылын муыс вылынжык. Татӧн сулалӧны Ойвыв мыссэз да Камайыв вылынін. Медся джуджыта муыс лэбӧма Лопва да Юм ю йыввезын, кытӧн адззӧмась и кытшыслісь медвылын чутокcӧ — 329 м.

Лажмытжык да волькытжык муэз паськалӧмӧсь Коми кытш шӧрӧттяс да лун-асыввылын: Весляна лажмытін (татӧн куйлӧны кытшись медлажмыт чутоккез — 120-130 м), Кӧсва лыжмытін, Обва-Иньва волькытін.

Асыввыв визирыс пӧлӧн Коми кытшас буракодь тӧдчӧны Кондӧс мыссэз. Кӧсва да Велва коласын ва юкан визьӧттяс нія йитчӧны Камайыв вылынінкӧт.

Мупытшся шедтассэз

Мупытшся шедтассэзісь Коми кытшын медодз колӧ казьтыштны кӧрт руда, кӧдӧ адззӧмась эшӧ XIX век шӧрын. 1856' годӧ граф Строганов осьтӧма Кува дорын металл керан завод, кӧда уджалӧма 1909 воӧдз. Эмӧсь сідз жӧ мусир (нефть), торф, бивидзан сёйез, извесь иззэз, лыа (песӧк), охра.

Коми кытш озыр и минерал ваэзӧн. Кудымкар да Юсьва районнэзын адззӧмась веськӧтчӧм понда ӧддьӧн лӧсялан ваэз: хлорида-натрияӧсь, сульфата-натрияӧсь, иода-бромаӧсь да сира-ваувтыраӧсь. Позьӧ босьтны бурдӧтчӧм могись и Майкар дорись минерал ва петаніннэз.

Мусиннэзз

Унажык сы йылiсь видзöт: Перем ладорись Коми кытшын мусиннэз

Ваэз[вильмӧтны | Вильмӧтны код]

Юэз

Коми кытшас 400-ся унажык ю. Невна не быдӧнныс лоӧны Кама бассейнын. Ачыс Кама ю кытшыс му кузя котӧртӧ рытвывсянь асывланяс, а сылӧн вожжес (притоккез) артмӧтӧны кытшыслӧ быдӧс ю везӧт (речнӧй сеть). Шульга вожжес (Весляна, Луп, Леман) ӧктӧны ва Ойвыв мыссэзісь, а веськыттэз (Иньва, Кӧсва) — Камайыв вылынінісь.

Иньва вожжезісь колӧ казьтыштны Кува, Велва, Юсьва, Исыв.

Кӧсва вожжезісь медкузьӧсь — Лолӧг, Лопва, Янчер, Онолва, Сэпӧль, Юм.

Весляналӧн медыджыт вожӧн лоӧ Сьӧдъю.

Тыэз

Тыэз Коми кытшын етшаӧсь, и куйлӧны нія ойланьынжык — Кама ольын, шульга вадӧрас.

Унажык тыыс — ю дорсяӧсь. Нія аркмӧны юыслӧн важ ӧрын, лоӧны джын тӧлісь кодьӧсь, кузьмӧса нето лента кодьӧсь. Медыджыт ны коласіь Нахты, ссээся эмӧсь Кривчи ты, Тундра ты, Улын Старича, Вылын Старича, Вежаты, Леман ты, Валаужом. Ны коддьӧм жӧ юдорся тыэз, кӧть и бура учӧтжыкӧсь панталамӧ Кӧсва, Иньва да Весляна оллезын. Медгырисьӧсь ны коласын аркмӧмась Юсьва районын, Купрӧс посад дынын.

Юдор тыэзся эмӧсь и сэтшӧм тыэз, кӧдна аркмисӧ му вевдӧрын важся лажмалӧммезын, кӧр кыссян йы (ледник) сылікӧ ны кузя котӧртіс ваыс. Этатшӧм тыэзӧн лоӧны Вадты да Оныл, кӧдна куйлӧны Коми кытш ой-рытвылын, Порыш да Утьва юэзлӧн ваюканінын, дзибья вӧр да нюррез коласын.

Пруддэз

Коми кытшын 70 кыным пруд. Нія не быдлаын ӧтмымдаӧсь. Медуна пруддэз Юрла да Кӧч районнэзын. Медыджыттэз коласісь лыддісьӧ сідзжӧ Кува пруд Кудымкарын. Татісь босьтӧны ва карын оліссез понда. Уна пруддэзын быдтӧны чери, мукӧдас чериалӧны, мукӧд дорас шоччисьӧны отир: тульӧтчӧны да уялӧны.

Кама вавидзанін Коми кытшланьӧ петӧ рытвыв дорнас. Татӧн аркмӧмась Иньва да Пожва курьяэз, кытӧн сулалӧны порттэз: Усть Пожва да Майкар.

Нюррез.

Сійӧн, мыля Коми кытшыс куйлӧ волькытінын, ваыс кымӧрсянь усьӧ унаӧв, а пакмӧ сія муись умӧля, татӧн и аркмӧмась ӧддьӧн уна нюррез, медуна ойланяс да шӧрӧттяс. Нюррезісь унажыкыс вевдӧрсяӧсь нето вуджанаӧсь.

Паськыт нюррез куйлӧны Важты да Онолва тыэз гӧгӧр, Утьва да Порыш ю йыввезын. Паськыт да кузь визьӧн нюжалӧны нюррез Кама шульга вадӧр пӧлӧн, Тимшор, Луп, Леман дорезын, Весляна йыввезын. Нюррезлӧн этія чукӧр шусьӧ Гайна нюррезӧн. Уна нюр эм Кама да Кӧсва коласын ва юканінын (Селиш, Солым, Булач). Нежык гырись нюррез куйлӧны Кӧсва да Лолӧг коласын, а сідзжӧ Чус, Янчер да мукӧд ю йыввезын.

Коми кытш лунвылын, кытӧн вундалӧм мыса-кыраса вевдӧрыс сетӧ вевдӧрся ваэзлӧ мымдакӧ дренируйтчыны, нюррез етшажыкӧсь. Невна не быдӧнныс — увдӧрся нюррез, васӧ кыскӧны грунтісь. Куйлӧны нія Иньва бассейнын да ыждананас абу гырисьӧсь.

Климат[вильмӧтны | Вильмӧтны код]

Унажык сы йылiсь видзöт: Перем ладорись Коми кытшын климат

Руыслӧн сям Коми кытшын небыта континентвывся: гожумыс кӧть и шоныт, а дженыт, тӧввез жӧ мукӧд воэзӧ сулалӧны ӧддьӧн ни кӧдзытӧсь. Этійӧ позьӧ вежӧртны: кытшыс куйлӧ экваторсянь зэв ылын да и океан доррезсянь абу матын. Сійӧн и руыслӧн тӧвся шонтӧгыс (температураыс) лажмытӧв, а неӧткодьыс тӧвся да гожумся шонтӧггез коласын ӧддьӧн ыджыт.

Уна во сьӧрна казялӧмась: январын шӧрӧт шонтӧгыс (температураыс) Коми кытшас -16°С, юль коста — +17°С. Сідзкӧ неӧткодьыс шонтӧгыслӧн лоӧ годнас 33°, а мукӧд воэзӧ медыджыт да медучӧт шонтӧггез коласын неӧткодьыс вермас локны 85°-ӧдз. Кӧть и кытшыс куйлӧ 3000 км-ся ылынжык Атлантика океансяняс, этія океаныс сё жӧ буракодь павкӧ сы климатыслӧ. Годыслӧн кӧдзыт кадӧ рытвыв да лун-рытвыв тӧввез вайлӧны кымӧррез, сы коста пондӧ лымьявны да шоналыштлӧ. А воыслӧн шоныт кадӧ нія жӧ тӧввез чинтӧны руыслісь шонтӧгсӧ да вайлӧны зэррез.

Быдмассэз[вильмӧтны | Вильмӧтны код]

Коми кытшын быдмӧтыс быдсяма.

Вӧрпода[вильмӧтны | Вильмӧтны код]

Унажык сы йылiсь видзöт: Перем ладорись Коми кытшын вӧрпода

Коми кытшыслӧн ыджытжык тор вӧр увтын куйлӧ, сійӧн и фаунасӧ татӧн аркмӧтӧны вӧрын олісь подаэз. Ассямаӧн лоӧ сія, мый кытшас сорасьӧны ӧтамӧдныскӧт фаунаэз Европалӧн да Азиялӧн.

Йӧлӧнвердіссезлӧн татӧн эм кынымкӧ увтыр.

Сюраэз коласісь пантасьӧны вӧрмӧс (йӧра), ойвыв кӧр, Сибирись вовлӧ косуля.

Лёквиррезӧн шусьӧны руда-гӧрд ош, кӧин, руч, вӧркань, тулан, чужмӧр, учкись, хорь, барсук, вурд, лана.

Йылӧмӧн йылӧны йирсиссез: ур, кӧч, виззяорда, ондатара, мой, быдкодь шыррез.

Гебсёйиссез шӧрись казьтыштам муканьӧс, ёжӧс, мушырӧс.

Кайпӧлӧс быдчужӧма жӧ. Вӧрын олӧны сьӧла, дозмӧр, тар, чочком да руд бадьӧг, вальдшнеп, а нысся и поснит каёккез: сера кыр, сизь, уркай, кӧк, герскан, сырчик (пичик), перк, жонь, чикыш, джыдж, пистӧг, рудкай да мӧдіккез.

Уялісь пӧткаэзӧн лоӧны быдкодь чӧжжез (уткаэз), дзодзоггез, туриэз, юссез.

Яй вылын олӧны кутш, кайварыш, шырварыш, тарварыш, сюзь, тюгуй (лунь), тупка, зобга (неясыть) да мукӧд.

Чериэз Коми кытшын 30-ся унажык берся. Мудунаӧсь карп увтырись чери: ёді, сын, кельчи, жерег, аргыш, шаклей, гов, тыпыв, пескан, линь.

Лёквиррез коласын тӧдсаӧсь сирчери, судак, муткыль, ёкыш, дарга да кин да.

Коми кытшын отир важынсянь вӧралӧны. Ӧні кыйӧны 30 мымда вид вӧрпода. Медуна уралӧны, кӧчалӧны, ручалӧны. Кучиккез понда кыйӧны ондатраӧс, туланӧс да мойӧс. Лэдзӧгыс кӧ эм, позьӧ петны и гырисьжык вöрпиэз вылӧ: кутны вӧрмӧсӧс, ошӧс, кӧинӧс. Арнас позьӧ кыйны и кай-пӧтка: тар, дозмӧр, сьӧла, уялісь кайсӧ (чӧжжесӧ).

Экология[вильмӧтны | Вильмӧтны код]

Унажык сы йылiсь видзöт: Перем ладорись Коми кытшын экология

Отир[вильмӧтны | Вильмӧтны код]

Кытӧн олӧны

Мый керӧны

История[вильмӧтны | Вильмӧтны код]

Унажык сы йылiсь видзöт: Перем ладорись Коми кытшлӧн история

Парма медважся кадӧ

Унажык сы йылiсь видзöт: Коми Парма медваж кадӧ

Коми Пармаын вӧлӧмась археология сьӧрті сэтшӧм культураэз:

Коми Парма роч саррез увтын


Коми кытш аркмӧтӧм


Коми кытш Советтэз дырни


Коми кытш субъекталікӧ


Коми кытш 2000-ӧт воэзӧ

Политика[вильмӧтны | Вильмӧтны код]

Кӧзяйство[вильмӧтны | Вильмӧтны код]


Берся керӧтӧм (перерабатывающӧй промышленность)


Видз-му уджалӧм (сельскӧй кӧзяйство)


Вӧр лэдзӧм


Строитчанторрез керӧм


Транспорт да йитчан (связь)


Вузасьӧм


Бытын отирлӧ отсасьӧм


Сьӧм бергӧтӧм (финанссэз)


Керкаэз видзан (жилкомхоз)


Учӧт уджбергӧтӧм (малӧй предпринимательство)

Культура[вильмӧтны | Вильмӧтны код]

Видзӧт сідзжӧ: Коми отирлӧн важся культура


Важ поверьёэз


Серӧтӧм


Паськӧм


Театр

Небӧг лэдзӧм


Библиотекаэз


Архиввез

Музейез

Культура шӧриннэз

Кино

Религия[вильмӧтны | Вильмӧтны код]

Унажык сы йылiсь видзöт: Перем ладорись Коми кытшын религия

Коми кытшын унажык отирыс важынсянь, XV сугӧдсянь эшӧ, эскӧмась-веритӧмась Иисус Христослӧ, кӧть и чучкӧй (языческӧй) нёж юрбытӧм абу жӧ нач вунӧтӧма. 1894' воын ӧння Коми кытш му вылын вӧлӧма 24 вичку да 1 монастыр. Советтэз дырни унажык йӧзыс ентӧмалӧм, вичкуэз пӧднассьӧмась. Мукӧдыс Ентӧг олӧ и ӧні. Но 1990' воэз бӧрын Христоса вичку бӧра пондіс кыскыны ас дынӧ йӧзсӧ.

Медуна отирыс пыртчӧмӧсь Роч буркывья вичку велӧтӧм сьӧрті. Этія вичкулӧн оссьӧмась 12 юрбытан керку: Кудымкарын (Микола вичку), Карпов посадын да мукӧдлаын.

Мӧднёжа эскиссез коласын эмӧсь адвентисттэз (Христосаэзлӧн Сизимӧт лун видзчисян вичку), витдасӧтлунняэз (Христосаэзлӧн «Виль Йитӧт» вичку), баптисттэз (Христосаэзлӧн «Бур юӧр сьӧрті» вичку). Коми кытш ойвылын ӧті-мӧділаын олӧны и кержаккез.

Перем коми кыв вылӧ Бур юӧр (Евангеллё) медодз вӧлі вуджӧтӧма 1823' годӧ (небӧгсӧ гижӧма Йӧг посадісь поп Любимов Феодор), сэсся вежа небӧггез комиӧн печатайтлӧмась XIX век помын — XX век пондӧтчикӧ Казаньын. Ӧння кадӧ Коми кытш понда Ен гижӧт лэдзӧны Финн муын, сэтчинісь öкмыс коми небӧг ни вайӧмась Христос велӧтӧм сьӧрті.

Медбӧрья кадӧ Перем ладорись юраліссез мӧдӧны лӧсьӧтны Коми кытшын чучкӧй нёж юрбытан шӧрин, мыля комиэз коласын бура видзсьӧ и чучкӧй лолыс.

Юӧртан везӧт[вильмӧтны | Вильмӧтны код]

Коми кытшын петӧны сизим газета. Ны колысын омӧн округ пасьта мунӧны «Парма» да «Парма-Новости». Вит районын сідз жӧ эм асланыс газетаӧн. Шочыника лэдзӧны челядь понда журнал, «Силькан» нимаӧ, öні Перем лэдзö челядь понда мöд журнал «Сизимок».

«Парма» газетаын недель вылас ӧтчид петӧ коми кыв вылын листбок «Коми говк». Иньва районісь «Иньвенскӧй край» нима газетаын тӧлісьнас ӧтпырись петӧ комиӧн нёль полосаа содтӧт «Кама кытшын». 2010' март 5' лунсянь «Кама кытшын» лыддиссьӧ торья газетаӧн, тӧлісь вылас петӧ кык нумерыс.

Кудымкарын кык радио шӧрин. Ӧтыс — «Всеросcийскӧй» телерадиокомпания бердын «Перем» филиалыслӧн юкӧт. Мӧдыс — аспондасис уджалан «Союз-FМ-Кудымкар» радиопоз, кӧда лэдзӧ эфирӧ программаэз ультрадженыт гыэз пырйӧт.

Телевидз лӧсьӧтӧ сія жӧ «Перем» филиал.

Комиӧн телевизорӧт баитӧны «Перем» юкӧтсянь лун вылас джын час, радиӧт — 10 минут гӧгӧр. Радио «Союз-FМ-Кудымкар» пыр мукӧд коста кылӧ жӧ коми сёрниыс.

Отирӧс велӧтӧм[вильмӧтны | Вильмӧтны код]


Лысин видзӧм[вильмӧтны | Вильмӧтны код]

Коми кытшын уджалӧны сэтшӧм лысин видзаніннэз:

  • кытш понда больнича (Кудымкар)
  • кар понда поликлиника (Кудымкар)
  • пиньвеськӧтан поликлиника (Кудымкар)
  • синвеськӧтан диспансер (Кудымкар)
  • туберкулёзвеськӧтан диспансер (Кудымкар)
  • кучик да венерология сьӧрті диспансер (Кудымкар)
  • физкультура сьӧрті диспансер (Кудымкар)
  • инькаэз понда консультация (Кудымкар)
  • челядь понда консультация (Кудымкар)
  • кытш понда санитария-эпидемиология сьӧрті поз (Кудымкар)


Спорт[вильмӧтны | Вильмӧтны код]

Унажык сы йылiсь видзöт: Перем ладорись Коми кытшын спорт

Видзӧт сідзжӧ[вильмӧтны | Вильмӧтны код]


Ыстісяннэз[вильмӧтны | Вильмӧтны код]

  1. http://www.gks.ru/free_doc/new_site/population/demo/perepis2010/svod.xls
  2. Перем коми архивлöн сайт
  3. Перем коми асладор музейлöн сайт

Ыстöттэз[вильмӧтны | Вильмӧтны код]

  • Коми кытш делоэз сьӧрті министерстволӧн сайт: [1]
  • «Парма-новости» газеталӧн сайт: [2]
  • «Парма» газеталӧн сайт: [3]
  • Коми кытшись сайт «kudymkar.org» = «komiperm.ru» [4]
  • Коми кытшлӧн важ сайттэз: [5], [6], [7]
  • Чудь-йӧграэзлӧн юӧртан шӧрин: [8]

Ӧшмӧссэз[вильмӧтны | Вильмӧтны код]

  • Бачев Г.Т., Зубов Ю.П. Страницы истории Коми-Пермяцкого автономного округа. Пермь, 1995. ISBN 5-88-9-008-6.
  • География Коми-Пермяцкого автономного округа. Пермь, 1992. ISBN 5-7625-0162-0.
  • Коми-пермяккез. Кудымкар, 2008. ISBN 978-963-9876-09-05.
  • Коми-Пермяцкий автономный округ. Страницы истории. Кудымкар, 1988. ISBN 5-7625-0178-7.
  • Коми-Пермяцкий автономный округ на рубеже веков. Кудымкар, 2000. ISBN 5-87901-051-1.
  • Коми-Пермяцкий национальный округ. Москва-Ленинград, 1948.