Синтаксис

Синтаксис – кывтэчас да сёрникузя йылісь велӧтӧм.

Кыввез йитсьӧны ӧтамӧдныскӧт туйдӧттэз сьӧрті и аркмӧтӧны кывтэчассэз да сёрникузяэз. Нылӧн неӧткодьыс тыдалӧ вежӧртасын и тэчӧмын.

Кыв йылісь наукалӧн тор, кӧда велӧтӧ кывтэчассэзлісь и сёрникузяэзлісь тэчӧмсӧ да вежӧртассӧ, шусьӧ синтаксисӧн.

Синтаксис пыдына йитсьӧ морфологиякӧт, кӧда велӧтӧ кыввезлісь вежласьӧм. Синтаксис да морфология ӧтлаын аркмӧтӧны грамматика (кыв лад велӧтӧм).

Синтаксискӧт тшӧтш велӧтсьӧ пунктуация — туйдӧттэз, кӧдна сьӧрті сёрникузя шӧрын да сы помын сувтӧтсьӧны косталан пассэз.