Чомор

Чомор (диал. чомӧр нето чомер) – коми мифологияын олісь чуд. Важ комиэз понда чоморыс вӧлі натьтӧ мупытшк видзисьӧн. Сылӧн культ павкӧ кык быдкодь сфералӧ. Ӧткӧ – чомортӧ пыртӧны лёк (мупытшкся) чуддэз коласӧ, а мӧдкӧ – йитӧны сю-турун воӧмкӧт. Перем ладорын комиэз талун сійӧ унажыксӧ тӧдӧны мун чомору! кывсер сьӧрті.

Вежалун

Емва дорын, Эжва кывтытын, Эжва йылын, Сыктывдінын да шӧрӧт Сыктыв дорын коми отир шуӧны чомӧрнас нето чомернас гаж, кӧдӧ порйӧтлӧны воӧм сюсӧ дзимлялӧм бӧрын нето ытшкан ештӧтӧм бӧрын. Сідз жӧ нимтӧны и тодильнӧй сёян, кӧдӧ лӧсьӧтӧны этія лун кежӧ: тэсись нето идовӧй пизись, виӧн пӧжалӧмӧ. Кӧр пым уджыс чулалас, Сыктывдінын горӧтчасӧ: но тай чомӧр шеді нето шедӧдім тай чомӧртӧ. Лэт ю дорын чоморнас шуӧмась гаж, кӧдӧ сурӧн, йӧктӧмӧн да сьылӧмӧн чулӧтлӧмась вартан бӧрын.

Ритуал понда пуана сэтшӧм жӧ кодь сёян йылісь тӧдлісӧ и ордча йӧз. Сідз татара шуӧны чумарӧн кӧвдӧммезӧн шыд, удмурттэзлӧн чумер – кӧвдӧммезісь сёян, а мокшалӧн цёмара – рузӧговӧй пельняннез.

Нимыс йылісь

Мукӧдыс чайтӧны, коми отирыс пӧ чомортӧ одзӧстӧмась роччезлісь: кулӧмгортса роч диалектын эм и кыв чомор – сідз шуӧны вӧрисьӧс. И коми мортыт, кӧр мезмӧтчӧ бы дозыляйтісьыс шогья, шуыштас: мун чомору, чомор кывсӧ роч датив формаӧ пуктӧмӧн.

Но и роч кылас чоморыс понда ӧтвужа шуаннэс эд абуӧсь. Нійӧ адззисӧ айран (иранскӧй) йӧз сёрниись. Сідз, ирон (осетин) кылісь чаммар ‘сэрп, нёштӧм’, чумур ‘нятьӧсь, сӧс’, тюрк чамур, курд чамур ‘нять’ да м. д. ӧддьӧн лӧсялӧны мупытшк видзисьӧс мыччалӧм понда. Сэтісь натьтӧ и петіс сэсся коми чоморыс мупытшк ен туйӧ – сійӧ и порйӧтӧны зыряналаньын.

Ойвывся роччез сэсся коми енкоддьӧмсӧ пондасӧ вӧрись (лешак) туйӧ видзны, а сэсся лунвыв комиэз роччезлісь ни одзӧстасӧ чомор вылӧ эттшӧм нёджӧвсӧ. Сідз и аркмис фраза мун чомору! ‘мун лешак дорӧ!’, кӧдӧ тӧдӧны унажыксӧ комиэз Иньва ладорын, но, шуам, и шӧр Сыктыв дорись Чуклӧмын чомӧру – видчан кыв.

Лэт ладорын (Порошева грездын) мортӧс, кӧда кӧлысь (свадьба) бӧрын пондіс овны тесь керкуын, нимкодялӧны чомур (чомурӧ мунны – инь ордӧ овмӧтчыны). Мукӧдыс, бӧра, лыддьӧны, чомурнас пӧ татӧн тесь шусьӧ.

Чомӧр туиснас Сыктывдінын шуӧны и учӧтик симӧтовӧй доз, кӧдаын вайлӧмась сёян ичмоньлӧн ай-мам ордӧ гаж порйӧтікӧ. Мордінын, чужас кӧ ныв, шуӧны чомер туис чужи.

Оланін

Перем комиэз сьӧрті, чомор олӧ ыб шӧрись расын, аслас керкуокын. Этійӧ керкусӧ мортлӧ оз позь адззывны: сія нач тырӧм понульӧн, жельнӧгӧн, понсэтӧрӧн да жовпуӧн, ёгтурунӧн. Кӧть и тӧрӧтчас мортыс тэлляинас, Чоморыс керкуок дынӧ, сы дынӧдз сё оз сибав: тэльыс пӧртчас куштывкаӧ, кӧда кузя котӧртӧ руч, а ӧмас видзӧ мыйкӧ сьӧдӧ – этӧ Чоморыс нӧбӧтӧ ассис гортсӧ, медбы сувтӧтны сійӧ мӧділаӧ.

Оланнёж

Чоморыс – гожумся олісь, тӧв кежӧ сія пырӧ му пытшкӧ да узьӧ сэтчин тулысӧдз. Саймӧтӧ сійӧ ыбшар.

Мывкыд

Чомортӧ тӧдӧны сюа ыббез додзирайтісь туйӧ. Сія абу лышкыт. Лэт дорись Абьячойын чоморнас нимкодялӧны надз мортӧс. Отирыслӧ чоморыт отсалӧ гусьӧн и мыччасьӧ токӧ сэк, кӧр кинкӧ казьмӧтас сылісь нимсӧ. Вермӧ йӧртлыны аслас гортӧ челядьӧс, кӧр ай-мам асьныс «иньдӧтасӧ» нійӧ этія ыб чуд дынӧ.

Чомор фольклорын

Зонка пырас суслонӧ да пӧрӧтас сійӧ. Мамыс лӧгасяс, видас зонсӧ: «Мун чомору, эн дзуг уджӧс!» Рытнас кытсӧвтас зонсӧ – абу. Казялас суслон дорись воньтор. Пондас лэбтыны – воньыс муас пырӧма. «Эта эд зонӧлӧн!» И вежӧртас: зонсӧ тай Чоморыс дынӧ иньдӧтіс.

Ашынас зонсӧ ыб вывсис адззас. «Тэ кытӧн вӧлін?» – «Менӧ тоша старик гортас нуӧтліс. Тшӧктіс сёртни керны. Ме кери, а сэсся пышши». – «Кыдз нӧ бӧр туйсӧ адззин?» – «Пыртӧнням воньӧ пӧрччасис, да нинкӧмӧ ыбӧсас кольччис. Сы сьӧрті и адззи...»

Чомор литератураын

Перем ладорын коми челядьыс тӧдӧны чомор йылісь чожабаитан:

Чочком чомор олӧ чомын. Чочком лым чочкоммӧ омӧн. Чочком ном лэбалӧ чом дын, сылӧ колӧ чочком чомор. Кӧть и чочком чочком чом, но чочкомжык чочком ном…

Ӧшмӧссэз

• Абаев В.И. Историко-этимологический словарь осетинского языка. Т. I. М.-Л., 1958. С. 329
• Климов В.В. Олан вужжез. Коми-пермяккез йылісь пассэз. Кудымкар, 2007. ISBN 5-87901-110-0
• Лыткин В.И., Гуляев Е.С. Краткий этимологический словарь коми языка. Москва, 1970. С. 309
• Сравнительный словарь коми-зырянских диалектов. Сыткывкар, 1961.
• Фасмер М. Этимологический словарь русского языка. Электрон версия