Чадзӧв (Кӧсладор район)

Чадзöв Чазёво
Му:	Рочму
Статус:	грезд
ладор:	Перем ладор
район:	Кöсладор район
Медодз казьтылӧм:	1579
Инлыдпассэс:	59°53′07″ с. ш. 54°32′14″ в. д.
Веськӧтлан кыв	коми, роч
Отир лыд	297 морт (2009)
Час кытш:	UTC+5+5
Телефон нумерӧ содтӧт:	+7 34298
Почта инпас:	619451
Авто нумерӧ содтӧт:	59, 81

Чадзӧ́в — Перем ладорись Коми кытшын, Кӧсладор районас грезд (деревня), Чадзӧв посадмулöн веськöтлан шöрин.

Ним йылісь

Файл:Чадзöв веськöтлан.JPG

Чадзöв посадмуись веськöтлан керку

Файл:Чадзöв урдöлсянь.JPG

Чадзчой (дзарньöв урдöлсянь)

Файл:Поддячöв кöсöгöр.JPG

Кöсöгöр (Чадзöвö пыран)

Файл:Чадзов часовенка2.JPG

Часовенка Девята Пятница

Файл:Чадзов Томмез туй3.JPG

Виль посёлокын

Файл:Чадзöв Васöт туй2.JPG

Васöт туй

Файл:Чадзöв Ыджыт туй.JPG

Ыджыт туй

Файл:Чадзöв райпо.JPG

Райполöн лавка

Файл:Чадзöв теремок.JPG

Теремок лавка

Файл:Чадзöв школа2.JPG

Под школа

Файл:Чадзöв площадка.JPG

Площадка

Файл:Чадзöв клуб2.JPG

Клуб

Файл:Чадзöв шöрин.JPG

Шöрин

Чадзӧвсö мукöдыс шуöны дженытика Чадз. Нимыс аркмöма Чадз морт сьöрті, кöда вöлі Юксялöн зон. Важ гумагаэзын казьтывсьö Гришка Чазев, кöда натьтö вöлі Чадз пиян.

География

Чадзöвыс сулалö Чадзчой мыс вылын Кӧс посадсянь рытвылö 26 км ылынаын (автобусöн мунны 28 км 30 минута) да Кӧч посадсянь ойвыв-асыввылö 33 км ылынаын.

Чадзöвсянь рытвылас, увдöрын топ сулалö Поддячӧв грезд, колö токö лэдзчыны Кöсöгöр кузя. Татіссез шуöны, Поддячöвыс пö поздісьöма урдöлас, Чадзöвыс вердöлас.

Лунвыв-асыввылас, 3,4 км ылынаын сулалö Красинькöв грезд, ойвыв-рытвылас 5,1 км ылынаын Карчой да 6,1 км ылынаын Пеклаыб. Мунан кö рытвылö тракт кузя 7,6 км, петö Пармайыл, 11,6 км кö мунан, адззан Юксьöв, кöдна кыкнанныс Кöчладор районын ни.

Чадзöвсянь лунвывті котöртö Кыдзыс ю. Рытвывті километра етш ылынаын кывтö Кыдзыслöн шульга вож Яйва. Кыдзысыслöн мöд шульга вожыс, Нюрвис, пондöтчö самой посад дорас (асыввывлань) да котöртö Чадзöвсяняс ылынсялöмöн. Эм эшö Кричкан ю.

Кыдзыс вылын Чадзöв весьтын, Яйва уссёланьын эм Коросаыб пруд. Кыдзыс вылын вöлі уна мельнича:

• Казё́ннöй мельнича
• Капра́н мельнича
• Кузьма́ мельнича
• Кыдзыс мельнича
• Пашӧ́вскöй мельнича

Чадзöв дынын эмöсь нюррез:

• Кушню́р (Чадзöвсянь ойвылын)
• Öзы́ннюр (Чадзöвсянь ойвылын)
• Моро́шканюр
• Ӧ́льöннюр
• Тыла́дынюр

Матісь ыббез:

• Кузькӧ́зйöр
• Кузьы́брыл
• Торчи́к
• Кузьпо́спон
• Яйва́посвелдöр
• Тата́ринкулöм
• Ыджытыб

Матісь вöррез:

• Дзуа́мыс
• Пуштӧ́с
• Джынту́й
• Кöлля́мыс (мукöдыс шуöны Колья́мыс)
• Тагья́шормыс
• Изъя́лог

Янсалöм

Деревня лунвылын адззам Виль посёлок (мукöдыс бöра шуöны Колхознöй посёлок).

Туйез

Чадзӧвын öні лыддьöны квать туй :

Коми ним	Роч ним
Васöт туй	ул. имени Высоцкого
Виль туй	ул. Молодежная
Девятков туй	ул. имени Девяткова
Ыджыт туй	ул. Центральная
Ойвыв туй	ул. Северная

Медшöр туйöн лыддисьö Ыджыт туй. Сылö параллель нёжöн мунöны: ойвылас Девятков туй да Ойвыв туй, лунвылас Васöт туй да Виль туй.

Ота́инöн лыддьöны клуб да школа коласісь площадка. Татöн чулöтлöны öксяннэз, спорт вермасьöммез.

История

Чадзöв ладорын отирыс олöмась важынсянь. Чадзöвсяняс лунвылö вит километра ылынаын, Кыдзыс ю дорын адззöмась родановсалісь оланін Важ Чадзӧв. Öні сэтöн сулалö перна, пöрись отир ветлöны сэтчö юрбытны. Висьтавлöны, сэтчин пö дзебöмöсь Юкси, Пукси, Чадз да Бач, кöднö вийöмась Сера Пёдор вовлікö.

Роччез медодз казьтылöны грезд йылісь 1579' годö, кöр Яхонтов Иванлöн отир Ыджыт Перемись муэз гижалікас шуöмась сійö починок Чазев. Кайсаров Михаил 1623' годö фиксируйтöма ордчöн Чадзöвыскöт и Поддячöвсö.

1935' годö татчö осьтöмась Крупскöй нима колхоз, кöдö 1950' воэзö гырисьмöтасö да пондасö шуны перво «Ма́ленков» нимöн, 1957' юльсянь «Путь к коммунизму», 1961' восянь – «Путь Ильича». 1970' нояб 27' лунö колхоз туйö лöсьöтöмась «Чадзöвскöй» совхоз.

2006' январöдз Чадзöвын вöлі Чазёвскöй сельсоветлöн шöрин.

Веськöтлан

Одзжык Чадзöв посадмуöн веськöтліссез пукалöмась ордча Поддячӧв грездын, öні кайöмась вевдöрас, Чадзöвö.

Посадмуын юралö Кучев Николай Степанович. Сійö бöрйöмась 2007' декаб 2' лунö 366 морт (быдсöн бöрйиссез вöлöмась 956-я). Сылöн конкурент Рудова Мария Алексеевна понда сетöмась сэк кипаснысö 248 морт.

Кан нимсянь сідзжö уджалöны:

• Рочму почталöн юкöт №619451.
• Рочму сбербанклöн юкöт.
• Полициялöн урядник.

Отир

Олöны Чадзöвас чадзӧ́вчи, öтік айка мортöс шуöны чадзӧ́веч, инька мортсö чадзӧ́вка, тöдчанним чадзӧ́вскöй нето чадзӧ́вись.

2009' годö грездын олöмась 297 морт. Отир лыдыс чинö (2002' годö Чадзöвын вöлöмась 340 морт, 1926' годö – 334 морт).

Татісь важ памиллёэс Батуев да Мартынов. Отирыс гишшöны сідзжö Рудов (Гайна ладорись), Ильиных да Кучев (Бачманов ладöрись), Никонов (Пармайылісь), сёрöнжык локтіссез Грачов, Варганов.

Кöзяйство да быт

Деревняын эм кынымкö асторья уджаин.

• ООО "Чадзöвскöй" (важ совхозлöн коляс, "куим мöс видзиссез", шуöны отирын
• Вит вöрпилитан (ИП Варганов,...)

Йöзыс быдтöны мöссэз, вöввез, баляэз, порссез, нимöввез, курöггез.

Мусö озö ни гöрö, буди галяэз понда.

Вöралісь эм быд керкуын. Мед вöравнытö, колö «Удачнöй» вöркöзяйстволісь ньöбны лэдзöг.

Туйез быдкодьöсь, Ыджыт туйыс гравия. Сы кузя ветлöтöны машинаэз Юксьöв да Кöс коласын.

Уна отирлöн эм ас машина.

Чадзöвын эм автобус сувтчан, автобусыс грезд пырйöт мунö кыкись ойлуннас:

• Перем ладорö — 00:30
• Кöс ладорö — 10:00

Этася Чадзöвись школалöн ПАЗ ветлö куим маршрут кузя:

• шöрлунö: Чадзöв—Сосновка—Кöс
• ?: Чадзöв—Бачманöв—Кöс
• витöдзлунö: Чадзöв—Кöс

Чадзöвчи вермöны видзöтны телевизор, а радиоись нійö орöтöмась. Грездын позьö йитчыны телефон пыр, кöть и линияыс важмöм. Эм таксофоннэз, но карточкаэзöн öнджакерны отирыс абу на велалöмась.

Мобильник кутö öті-мöділаын (UTEL).

Эм куим магазин:

• Кöсісь Райпо
• ИП Теремок
• ИП Костарева (Поддячöвын)

Быт сфера абу зорöтöм, шырсьыны да мый да ветлöны Кöсöдз.

Не шöрись шонтан, не вавайöтан, не канализация Чадзöвын абуöсь.

Эм ФАП, медматын больнича Кöсын.

Шойнаыс куйлö Чадзöвсяняс лунвыв-асыввылö 1,5 км ылынаын. Чадзöвчися сэтчин дзебсьöны Поддячöвчи, Пеклаыбчи да Карчойчи.

Велöтан

Школа понда медодзза керку сувтöтöма 1901' годö Батуев Öсип Павлович. Эта понда сылö сарсянь вöлі сетöм эзысь медаль.

Öні челядьыс велöтчöны кык керкуын:

• дöсвелöтан под школа (45 велöтчись)
• челядьсад (20 кага) да пондöтчан школа (20 велöтчись), кöдна тöрöтчöны мöдік керкуö, сэтчин жö школаись верданін. 2011/12 велöтчан во кежö абу адззöмась челядь 1' класс понда.

Культура

Культура грездас видзöны Чадзчойын. Школася татчö поздісьöны:

• клуб, кытöн эмöсь порйöтан зал, тренажёрзал, спортзал, биллиарда пызан.
• библиотека

Клуб да школа класын эм площадка.

Грездын вежалун вöлі Девята пятница.

Чой вылас жö сулалö часовенка Девята пятница. Кöркö матын вöлі быдса часовня, сы местö сэсся лэбтöмась клуб. Татöн жö вöлі шойна. Öнняся клуб, площадка, школаэз да веськöтлан керку сулалöны важ шойна вылын.

Увдöрын, Поддячöвын, сулалö часовенка Пролавер, сэтчин важынся кадö вöлі дюттян, чулалöмась гулянкаэз да орсаннэз (лапта дмд).

Отирыс порйöтöны и мöдік вичкуся празьниккез, шуам, стречалун, кöдö татöн шуöны трöича.

Посадлун озö чулöтö.

Казьмöтаннэз да сингажöтаннэз

Чадзчой вылын сулалö часовенка Девята Пятница.

Мемориаллэз не казьмöтаннэз Чадзöвын абуöсь.

Археологгез адззöмась харинсалісь кык важ шойна:

• Чадзöв I
• Чадзöв II

Гора нима отир

• Девятков Артемий Петрович (1885-1934), велöтісь

Берся

Чадзöв да Поддячöв öні позьö лыддьыны öтік грезд туйö ни, кöть одзжык нія пыр öтамöдныскöт вермасьöмась, быдыс ыджытжыкö бы вöлі пуксьö. Кöркö Чадзöвын олöмась етшажык отирыс, а öні быдса 2/3 вердöлын олöны, и токö 1/3-ыс урдöлын. Да и сельсоветлöн керкуыс дыр кад сьöрна абу жö чой йылас сулалöма...

Лыддьöтан

• Коми-Пермяцкий национальный округ. Москва-Ленинград, 1948.
• Коми-Пермяцкий автономный округ на рубеже веков. Кудымкар, 2000. ISBN 5-87901-051-1
• Мартынов М. Е. Селения Косинского района. Справочно-статистический материал. Кудымкар, 2009. ISBN 978-5-87901-127-2
• Шаги времени. К 80-летию образования Косинского района / редактор-составитель О. П. Кучева. Пермь, 2004. ISBN 5-93683-030-X.