Койгорт район

Койгорт район Коми Республикаын

Койгорт район (рочöнжык – Койгородскöй район) – веськöтлан юкöт Коми Республикаын, республикалöн 15 районiсь öтiк.

Веськöтлан шöрин – Койгорт посадын. Койгортсянь Сыктывкарöдз 196 км.

Районыс аркмöтöм 1949 годö, июнь 7 лунö.

География

Койгорт районыс 10.415,7 км² ыжда. Сiя куйлö Коми Республика лунвыв-рытвылын, Сыктыв ю катытын. Койгорт мукöт межаасьöны асыввылын – Перем ладорись Коми кытш, лунвылын – Киров лапöв, рытвылын – Луздор район, ойвылын – Сыктыв да Сыктывдiн районнэз.

Невна не быдöс муыс вöрсялöм.

Колана шедтассэз: сотчан сланеччез, фосфориттэз, торф, керамзит да кирпич сёйез, строитчан да кварца лыаэз, муувтся ваэз. Эм мымдакö зарни да алмаззэз. Öнi кошшöны газ да мусир.

История

Медваж оланiннэз – посаддэз Ужга (1490), Койгорт (1586) да Грива (1586). Этiя оланiннэз аркмсö öнiя Койгорт район му вылын XII-XIII веккезö. Рочму дынö öтлаöтöм бöрын перво вöлi лöсьöтöма Ужга волось, сэсся Койгорт да Грива лоисö торья волоссезöн.

1757 годö осьтöмась домна вылын уджалан заводдэз Кажымö да Нюдзпоскаö, кöднö подналiсö 1923-24 воэзö.

1929 годö Койгорт пырö виль осьтöм Сыктыв районö, а 1949 июнь 7 лунö РСФСР-ись Медвылiсь Советлöн Президиум аслас указöн аркмöтöма Койгорт район.

Район аркмöм бöрын кöзяйствоыслö подöн пыр вöлi вöрлэдзöм. 1936 годö лöсьöтiсö вöрпромхоз Койгортö, а 1942 – Кажымö. 1970 годö нiйö öтувтiсö, лоис öтласа Койгорт вöрпромхоз, кöда 1998 октябсянь шусьö ООО "Койгорт вöркомбинат".

1949 во кежö му-видз уджалöмын ноксисö 25 жебиник колхоз. 1959 январ 1 лунö нiйö öтлаöтiсö да лöсьöтiсö «Койгорт» совхоз, кöда 2002 январ 1 лунсянь шусьö СПК «Койгорт».

Отир

Олöны 9,3 сюрс морт. 2002 вося гижöтöм дырни олiссез коласын татöн вöлi 48,0% роччез, 40,0% комиэз, 4,3% украинса, 2,8% немеччез да 1,0% беларуссэз. Йöзыслöн тшöкыта 1,1 морт/км². Томмез (14-сянь 30-öдз годдэзсяöсь) районас 2,5 сюрс морт.

Политика да веськöтлöм

Район вылын юралiсьыс – Тебеньков Михаил Леонидович (1997 мартсянь). Веськöтланыслöн адрес: 168170, Койгорт район, Койгорт посад, Мир туй, 7. Факсыс (82132) 914-00.

Янсалöм

Койгорт район öнi янсöтöма 10 посадму вылö:

Посадму	Кыным оланiн	Веськöтлан	Факс	Юралiсь
Грива	3	168191, Грива посад, Сöвет туй, 37	(82132) 941-40	Игошина Людмила Сергеевна
Кажым	2	168181, Кажым посёлок, Сöвет туй, 28	(82132) 922-91	Сычугова Светлана Игнатьевна
Койгорт	1	168170, Койгорт посад, Сöвет туй, 30	(82132) 951-75	Перепаденко Юрий Алексеевич
Койдін	1	168183, Койдін посёлок, Берегвыв туй, 26	(82132) 913-07	Дружинин Валерий Евграфович
Ком	2	168174, Ком посёлок, Шöр туй, 9	(82132) 944-24	Коблов Игорь Борисович
Кузьёль	1	168172, Кузьёль посёлок, Смоленск туй, 15	(82132) 946-27	Широкова Ирина Николаевна
Нюдзпоска	1	168197, Нюдзпоска посёлок, Шöр туй, 20	(82132) 943-23	Самыйлов Андрей Борисович
Подз	4	168193, Подз посёлок, Сöвет туй, 9	(82132) 931-54	Башманов Владимир Александрович
Турунъю	2	168181, Улыс Турунъю п-к, Гöрд Армия т., 7	(82132) 985-19	Череватенко Евгения Александровна
Ужга	4	168190, Ужга посад, Ягдор туй, 9	(82132) 945-30	Володина Лима Валентиновна

Одзжык посадмуэз туйö вöлiсö сельсоветтэз.

Оланiннэз

Öнi Койгорт районын 21 оланiн: куим посад, куим грезд (деревня) да посадчужöма 15 посёлок.

Коми ним	Роч ним	Статус	Кыным морт (2007)	Индекс	Посадму
Вежью	Вежъю	посёлок	393	168196	Ужга
Воктым	Усть-Воктым	посёлок	102	168174	Ком
Вылыс Турунъю	Верхний Турунъю	посёлок	59	168180	Турунъю
Грива	Грива	посад	397	168191	Грива
Гуж	Гуж	посёлок	21	168180	Кажым
Зимовка	Зимовка	посёлок	374	168192	Подз
Иванчомъя	Иван-Чомъя	посёлок	143	168170	Подз
Кажым	Кажым	посёлок	1019	168181	Кажым
Карвуджöм	Карвуджем	грезд	7	168191	Грива
Койгорт	Койгородок	посад	2986	168170	Койгорт
Койдiн	Койдин	посёлок	1466	168183	Койдiн
Ком	Ком	посёлок	81	168174	Ком
Кузьёль	Кузьёль	посёлок	333	168172	Кузьёль
Мырпонаыб	Мырпонаыб	грезд	0	168190	Ужга
Нюдзпоска	Нючпас	посёлок	244	168197	Нюдзпоска
Подз	Подзь	посёлок	1033	168193	Подз
Сьöдтыдор	Седтыдор	посёлок	317	168195	Ужга
Тыбъю	Тыбъю	посёлок	1	168193	Подз
Ужга	Ужга	посад	206	168170	Ужга
Улыс Дав	Нижние Березники	грезд	2	168191	Грива
Улыс Турунъю	Нижний Турунъю	посёлок	155	168180	Турунъю

Экономика

Районын пасйöма 136 уджаин да аркмöтöмин. Эшö 124 уджбергöтiсь олöны туйдöтвывся чужöм аркмöттöг.

Берсяторресö лэдзöны 48 кöзяйствуйтан субъект (35% öтласа лыдiсь), кысъялан сфераын – 88 (65%). Медуна уджаиныс пасйöма вузасянын да отир верданын (16%), му-видз уджалан да вöрлэдзан кöзяйствоын – 14 (10%), берся керöтöмын – 14 (10%).

Береся керöтан сферасö аркмöтöны пукерöтан да сёян лöсьöтан, шоныт да ва лэдзан, нуан да янсöтан юкöттэз.

Вöрлэдзöм пыр вöлi и эм районас кöзяйстволö подöн. Уджалöны вöрвидзаннэз Койгортын и Кажымын.

Культура

Койгорт районын öнi уджалö Асдор музей, 5 киномыччалан, 12 клуб, 16 библиотека да 27 лыддьöтанiн.

Библиотекаэз уджалöны Койгорт ЦБС борд увтын. Медбурöн лыддисьö Челядь понда шöрöт библиотека Койгортын.

Быд год лöсьöтöны гажжез: «Иллялун», «Зымгыштам», «Карвуджöмись стречалун», «Роч кыдз». Район чужан лун кежö чулöтöны музыка сьöртi фестиваль «Койгорт гожум», эм торья фестиваль челядь понда.

Фольклор видзан группаэз коласiсь медбура тöдсаöсь «Гора Ань» (Гриваись), «Сударушки» (Подзись)

Велöтан

Койгорт районын эм 11 школа, кытöн велöтчöны 1066 и велöтöны 151 морт.

Шöрöт школаэз куима, под школаэз – сизима, пондöтчан школа – öтiк.

Учöтжык челядь олöны 11 челядь садын да яслиын.

Эм и содтöт велöтан куим керку, ны коласын Челядь понда музыка сьöртi школа Койгортын.

Спорт

Койгорт районын 12 спортзал да 14 спортыб. Эм быдса спорткомплекс Койгорт посадын. Быд год районас лöсьöтöны 30-ся унажык вермасьöм быдкодь спорт юкöтын. Республика тшупöтын медбур результаттэз шедтiсö медбöря годдэзö гирялэбтiссез, волейболöн орсiсь ныввез да шахматисттэз.

Ужгаись спорт сьöртi мастер Турышев Александр Михайлович – бура тöдса гирялэбтiсь, спортасьö 1976 годсянь. Сiя 10-iсь лоис Коми Республикаын чемпионöн, шедтiс «Ладöг кубок», куимись босьтлiс приза места Рочму тшупöта вермасьöмын посадiсь спортсменнэз коласын, кимись вöлi призёрöн Рочму Ойвыв-Рытвыв чемпионатын.

Öшмöссэз

• Койгорт районiсь веськöтланлöн сайт
• Койгортлöн сайт parma.ru сервер вылын
• Койгорт отирлöн сайт
• Афанасьев А. П. Топонимия Республики Коми. Сыктывкар: Коми кн. изд-во, 1996 ISBN 5-7555-0554-3
• Жеребцов И. Л. Где ты живёшь: Населённые пункты Республики Коми. — Сыктывкар: 2000.
• Историко-культурный атлас Республики Коми. — М: Дрофа, 1997. ISBN 5-287-00027-8
• Республика Коми. Энциклопедия в 3-х томах. — Сыктывкар: Коми книжное издательство, 1997, 1998, 1999. — Т. I, II, III. ISBN 5-7555-0617-5

Коми Республика веськöтлöм могись янсалöм
Канкар: Сыктывкар Каркытшшез: Вöркута • Инта • Сыктывкар • Уква • Ускар Районнэз: Вуктыл • Емва • Емдiн • Изьва • Койгорт • Кöрткерöс • Кулöмдiн • Луздор • Мылдiн • Печора • Сöснагорт • Сыктыв • Сыктывдiн • Удора • Чилимдiн