Пеклаыб (Кӧсладор район)

Босьтöм Википедия вылiсь
Перейти к навигации Перейти к поиску
Пеклаыб
Му:  Рочму
Статус:  грезд
ладор:  Перем ладор
район:  Кӧсладор район
Инлыдпассэс:  59°54′40″ с. ш. 54°26′20″ в. д. / 59.911111° с. ш. 54.438889° в. д. (G)
Веськӧтлан кыв коми, роч
Отир лыд  26 морт (2009)
Час кытш:  UTC+5
Телефон нумерӧ содтӧт:  +7 34298
Почта инпас:  619451
Авто нумерӧ содтӧт:  59, 81

Пекла́ыбПерем ладорись Коми кытшын, Кӧсладор районісь Чадзӧв посадмуын грезд (деревня).

Ним йылісь[мöдкодьсьöтны | править код]

Файл:Пеклаыблань иньдöтан.JPG
Пеклаыблань кежöтан
Файл:Пеклаыблань туй.JPG
Пеклаыблань сибöтчикö
Файл:Пеклаыб шöр.JPG
Грезд шöрöт туй

Пеклаыб грездлöн нимыс кокнита вежöртана Пекла + ыб, м. ш. Пеклалöн ыб.

Кöр отирыс чожа баитöны, этія нимсис ы-ыс öшö нето пöртчö а-ö; сідз сы туйö, мед висьтавны Пекла́ыбсянь, шуöны Пекла́бсянь нето Пекла́абсянь.

География[мöдкодьсьöтны | править код]

Пеклаыб сулалö Вижайка ю дорын, Чадзöвсянь ойвыв-рытвылö 5,8 км ылынаын, Юксьöвсянь ойвыв-асыввылö кыкьямыс километра ылынаын.

Грездыс поздісьöма Кöсладор да Кöчладор коласісь визир бердын.

Пеклаыбкöт ордча грезддэс: Пармайыл лунвыв-рытвылö куим километра ылынаын, Карчой ойвыв-асыввылö кык километра ылынаын, Поддячöв — лунвыв-асыввылö 4,5 км ылынаын.

Вежайка ю котöртö Пеклаыб шöрöтяс асыввывсянь рытвылö. Медшöр туйыс мунö Пеклаыб пырйöт меридиан пöлöн да поперегалö юсö. Асыввылас поссянь аркмöма пруд, кöдö 2011' гожумнас мöдöны бурмöтны.

Пос сайын, грезд самой шöрын сулалö лисвень — талун паса объект оліссез понда, сы сьöрті тöдöны погоддя.

Ойвылас грездсяняс ландшафтыс шусьö Па́льникмыс, лунвылас Яйва́йыл. Асыввылас куйлöны ыббез (турунсялöмöсь ни), кытöн сулалö енöвтöм ферма. Рытвылас Пекла́ыббез, а ойвыв-рытвылас — Ту́пöсямыс.

Янсалöм[мöдкодьсьöтны | править код]

Туйез[мöдкодьсьöтны | править код]

Öні Пеклаыбын лыддьöны куим туй [1]:

Коми ним Роч ним
Виж туй ул. Зеленая
Мир туй ул. Мира
Пруд туй ул. Прудная

История[мöдкодьсьöтны | править код]

Талуння Пеклаыбсö овмöтöмась отир Поддячöвись 1880' воэзö, кöр татöн лыддьöмась кык гортвидзан. Отирыс кöдзлöмась сю, видзöмась пода. 1909' во кежö сю пондіс артмыны етшажык. Мужиккезлö ковсис пöрöтны вöр, вöравны да чериавны, шочыника кыскалöмась вовлісь йöзсö доддезöн. Грездын уджалöма куим мельнича (мутей). Гортвидзаннэз сэк вöлöмась даса, оліссез 75-а. Пруд дорас сулалöма часовня.

1924' воöдз пеклаыбчи олöмась Чердын уездісь Юксьӧв волосьын, сыбöрын лоисö Коми кытшись Кöсладор районын, Чадзӧв сельсоветас (веськыт туй кузя сэтчö коліс мунны вит километра, öння туй кузя кыкьямыс километра).

1926' вося гижöтöм дырни татöн олöмась 132 морт, кöдна видзöмась 21 картавыл.

1929' ародзын Пеклаыбас лöсьöтöмась «Краснӧй звезда» колхоз (23 гортвидзан, 131 няньсёйись).

1936' годö Пеклаыбын лыддьöмась 145 морт (30 картавыл), грездас вöлі 1' ступеня школа, колхозісь дорсянін, пöжаланін, МТФ, СТФ, КрТФ.

Ыджыт война коста грездын вöлі ыджыт бишог. Сотчисö быдöс керкуэз. Бур кöть урожайыс артмöма.

«Краснöй звездаас» пеклаыбчи уджалöмась öтлаын карчойчикöт 1959' воöдз, кöр колхозсö гырисьмöтасö — содтасö Чадзöвись да Поддячöвись кöзяйствоэз, а шöринсö вуджöтасö Чадзöвö. Этія гырись «Краснöй звездасö» 1960' годö ни нимтöмась «Путь Иллича», а 1970' годö керисö сыись «Чадзöвскöй» совхоз.

1959' вося гижöтöм коста Пеклаыбас олöмась 100 морт, кöдна видзöмась 27 кöзяйство. Строеннёэз вöлöмась 25-а, уджалöма пондöтчан школа. Колкозниккез лöсьöтöмась мöсвидзан, балявидзан, порсьвидзан, курöгвидзан.

1970' во пондöтчикö грездын лыддьöмась 128 мортöс. Мöдігод татöн адззöмась 26 кöзяйство, пельшöрпункт, челядьсад, пондöтчан школа, МТФ.

1990' воэзö деревня мöдпырся сотчис. Ыджыт лёкби кушöдз сотöма 16 керку.

2005' годсянь, кöр виль роч туйдöт сьöрті сельсоветтэсö вежисö, Пеклаыб грезд пондіс лыддисьны Чадзӧв посадмуын.

2007' во пондöтчикö Пеклаыбын вöлі 15 гортвидзан да 30 олісь. Уджаліс асторья вöрпилитан, но соцкультбыт öшис нач. Медбöрья вöлі ФАП, кöдö пöдналöмась 2007' годö.

Веськöтлан[мöдкодьсьöтны | править код]

Ӧні Пеклаыбыс пырӧ Кӧсладор районісь Чадзӧв посадмуӧ, отирыс бöрйöны депутаттэзöс районісь Земство öксянö да посадмуись депутаттэз советö. Сетöны кипаснысö район да посадму юраліссез понда.

Отир[мöдкодьсьöтны | править код]

Пеклаыбын олöны пеклаыбчи /шусьö пекла́бчи/. Мужик мортыс пеклаыбеч /пекла́беч/, инька мортыс пеклаыбка /пекла́бка/. Тöдчаннимыс пекла́ыбись нето пеклаыбскöй /пекла́бскöй/.

Отирыс комиöсь, баитöны комиöн.

Гумагаэз сьöрті 2009' во пондöтчикö Пеклаыбын олöмась 26 морт, кöдна видзöмась 14 горт. Былись олöны етшажык, 12 морт.

Унажык отирыс гишшöны Батуев. Эм сідзжö Вилесов, Пустоев.

Пеклаыбын оліссезöс нимкодялöны кара́ссез.

Кöзяйство да быт[мöдкодьсьöтны | править код]

Олöны Пеклаыбас унажыксö пенсионеррез. Отир быдтö карч, вöдитö пода.

Эм асторья вöрпилитан.

Öтік кöзяйствоын видзöны мошшез, вузалöны ма.

Магазин не мый грездын абу.

Кулöм отирсö пеклаыбчи дзебöны Чадзöвö.

Культура[мöдкодьсьöтны | править код]

Культура керку да мöдік берся Чадзöвын.

Грездын вежалун вöлі Петырлун — вöв празьник. Отирыс пыралöмась сы коста ваö.

Казьмöтаннэз да сингажöтаннэз[мöдкодьсьöтны | править код]

  • Вежа лисьвень
  • Коммерсант керку

Лыддьöтан[мöдкодьсьöтны | править код]

  • Коми-Пермяцкий автономный округ на рубеже веков. Кудымкар, 2000. ISBN 5-87901-051-1
  • Коми-Пермяцкий национальный округ. Москва-Ленинград, 1948.
  • Мартынов М. Е. Селения Косинского района. Справочно-статистический материал. Кудымкар, 2009. ISBN 978-5-87901-127-2
  • Шаги времени. К 80-летию образования Косинского района / редактор-составитель О. П. Кучева. Пермь, 2004. ISBN 5-93683-030-X.

Ыстісяннэз[мöдкодьсьöтны | править код]

  1. Вот öктіссез сайтісь