Пармайыл (Кӧчладор район)

Пармайыл
	Пармайыл ; Пармайлово
Му:	Рочму
Статус:	грезд
ладор:	Перем ладор
район:	Кöчладор район
Инлыдпассэс:	59°53′04″ с. ш. 54°23′59″ в. д.HGЯO
Веськӧтлан кыв	коми, роч
Отир лыд	53 морт (2009)
Час кытш:	UTC+5
Телефон нумерӧ содтӧт:	+7 34293
Почта инпас:	619327
Авто нумерӧ содтӧт:	59, 81

Парма́йыл — Перем ладорись Коми кытшын, Кöчладор районсис Юксьӧв посадмуын коми грезд (деревня) .

Ним йылісь

Файл:Пармайыл. Пыран.JPG

Пармайыл. Пыран

Файл:Пармайыл. Дорись керку.JPG

Дорись керку

Файл:Пармайыл. Пруд.JPG

Саяс — Пармайыл пруд

Файл:Пармайыл. Лавка.JPG

Костарева лавка

Файл:Пармайылын1.JPG

Туйколас

Файл:Пармайыл. Важ клуб1.JPG

Важ клуб

Файл:Пармайыл. Клуб.JPG

Пармайылын юнь

Файл:Гоша керку.JPG

Ёгор керку

Файл:Пармайыл. Куим чуд йöрын1.JPG

Нёль чуд йöрын

Файл:Пармайыл. Куим багатыр.JPG

Куим багатыр

Файл:Пармайыл. Чуд керку.JPG

Чуд керку

Пармайыл грездыслöн нимыс вежöртана, сія тэчöм кык торись: парма + йыл. Грездыс сулалöма парма йылын, кöть öні вöрсö и кералöмась.

Роччез кылісö "Пармайыл" нимын нылö вежöртанасö да гижöмась деревнясö кыдз Пармайлова.

География

Пармайылыс сулалö Важ сибир тракт дорын, Юксьöвсянь асыввылö вит километра ылынаын (веськыт линия сьöрті кö, петö 4,4 км).

Матісь грезддэз

Матісь грезддэз: лунвыв-рытвылас Митя (кык километра ылынаын) да ойвыв-асыввылас Пеклаыб (3,4 км ылынаын, туй кузя кö мунны — 4,3 км).

Матісь ландшафттэз

Пармайылсянь рытвылö 1,5 км ылынаöт котöртö Кончиви́дзшор, кöда усьö Вижайка вылö.

Ойвылас 1,5 км ылынаын куйлö Кара́иннюр.

Лунвылас туйсяняс петöны ключевинаэз, кöднаись деревня дорын лöсьöтöмась Парма́йыл пруд.

Матісь ыббез:

Кара́ин
Закаръя́г (ойвылас)
Кыдзы́скуш (вöрсялöм ни)
Баддя́инмыс (сэті мунö электролиния)
Кöчпа́льник

Кырассэз:

Па́сскöй лог (сэтчин чучкöйезлöн дзебсянін)
Вöрчо́йлог

Мыссэз:

Чукаы́бмыс (кык керöс, асыввылас)
Парма́йылмыс
Вöрчоймы́султ (Чадзöвланыьн)
Велта́с, кытöн сулалö перна

Кыкшорколас

Янсалöм

Грездыс оз юксьы поснитжык торрез вылö.

Туйез

Пармайылын куим туй ^[1]:

Коми ним	Роч ним
Ойвыв туй	ул. Северная
Сад туй	ул. Садовая
Ыджыт туй	ул. Центральная

Ыджыт туйыс — Кöсланьö тракт, сысянь ойвылöт нюжалö Сад туй, сы бöрын Ойвыв туй.

История

Пармайыл гöгöр адззалöмась чучкöй местаэз.

1872' годся роч картаын Пармайлова вöлі ни пасйöм. 1880' воэзö татісь лыддьöмась квать кöзяйство, отирыс сэк кöдзлöмась сю, пöрöтлöмась вöр, кыйлöмась вöрпöтка. 1909' годö грездын олöмась 167 морт, кöдна видзöмась 14 картавыл.

Пармайылчи перво олöмась Юксьӧв волосьын, 1924' во бöрын Юксьӧв сельсоветын.

Коллективизируйтікö Пармайылас лоис «За коммунизм» колхоз. Вöлі ферма, кытöн видзöмась порссез, куканнез да мöдік пода. Токö вӧввез вöлöмась 200-а. Сэсся лоис «Юксьӧвскӧй» совхоз.

Советтэз киссьöм бöрын совхозыс разьсис. Отирыс пондöмась видзны кöзяйство торйын. Унаöн пондöмась кодавны да кулöмась, мукöдыс мунöмась овны мöділаö.

1995' воэз шöрсянь Пармайылсö пондöмась паськыта тöдны татісь чучкöй мыгöррез увья, кöднö перестройка кадсянь эшö лöсйö пуись татісь зарникиа морт Утробин Ёгор (Гоша).

2006' восянь, виль роч туйдöттэз сьöрті сельсоветтэсö вежöмась да, Пармайылчи пондісö овны Юксьöв посадмуын.

Веськöтлан

Пармайылыс öні пырö Кöчладор районісь Юксьӧв посадмуӧ. Пармайылчи бöрйöны депутаттэзöс Кöчладор районісь Земство öксянö да Юксьӧв посадмуись депутаттэз советö. Сетöны кипаснысö район да посадму юраліссез понда.

Отир

Олöны Пармайылас парма́йылчи. Татісь айка мортöс шуöны парма́йылэч, инька мортсö парма́йылка. Тöдчаннимыс парма́йылскöй нето парма́йылісь.

2009' во пондöтчикö гумагаэз сьöрті татöн оліссезöн лыддисьöмась 53 морт, кöда видзöмась 18 горт. Былись олöны 40 гöгöр морт (советтэз дырни вöлі 100-ся унажык), керкуэз 15-а (важынжык 20-öдз сулалöмась).

Медваж памиллёыс Пармайылас Юркин. Отирыс гишшöны сідзжö Андров, Сизов, Сидоров, Утробин.

Пармайылчи комиöсь, баитöны комиöн.

Пармайылын оліссезöс ордча грезддэзісь йöзыс нимкодялöны масьля́ккезöн.

Кöзяйство да быт

Öні Пармайылас ыджыт уджаиннэз абуöсь. Сю озö кöдзö. Ыббез турунсялöны да вöрсялöны. Отирыс ас йöрын быдтöны карч, видзöны пода (мӧссэз, пороззэз, порссез, курӧггез).

Ветлöны вöравны, чериалöны Лолог вылын.

Кöсладорö туйыс буркодь. Машинаэз абу уна, трактор эм.

Кöсладорся автобус сувтчö быд ойлун öтпыр. Телевизор видзöтöны, радио орöтöмась. Мобильник оз кут.

Лавка деревняын öтік — ИП Костарева.

Быт службаэз абуöсь.

Медматын веськöтчанін — Юксьöвын (ФАП), сэтчин жö шойна.

Культура

Одзжык Пармайылын вöлі челядьсад да клуб, кытöн уджаліс фольклор коллектив. Öні быдöс пöдналöм.

Отир пасйöны Яблочнöй спас — август 19' лунö. Сійö видзöны ас вежалун туйö Пармайыл да ордча Митя грездын оліссез. Этія лунö быд во матісь видззез вылын овлöны Спас коссез, кöр Кöчладорись да Кöсладорись том отир тышкасьöны öтамöдныскöт.

Отирыс Пармайылас öнöдз чучкöйöсь, Кристосö не Иеговаö озö веритö, кöть ортодокссэз да баптисттэз тшöка вовлöны миссионеритны.

Пармайыл нимыс бура горалö Рочму пасьта Пуовöй мыгöрреза музей увья. Энö чуддэсö лöсьöтöма да сувтöтöма ас керкукöт ордчöн татісь морт Педöр Гоша.