Митя (Кӧчладор район)

Митя Митино
Му:	Рочму
Статус:	грезд
ладор:	Перем ладор
район:	Кöчладор район
Инлыдпассэс:	59°52′09″ с. ш. 54°22′00″ в. д.
Веськӧтлан кыв	коми, роч
Отир лыд	192 морт (2009)
Час кытш:	UTC+5+5
Телефон нумерӧ содтӧт:	+7 34293
Почта инпас:	619327
Авто нумерӧ содтӧт:	59, 81

Митя́ — Перем ладорись Коми кытшын, Кöчладор районісь Юксьӧв посадмуын коми грезд (деревня).

Ним йылісь

Файл:Митя. Беспруд дорын.JPG

Беспруд дорын

Файл:Митя. Китайгорт.JPG

Китайгорт

Файл:Митя. Лавка.JPG

Лавка

Файл:Митя. Важ клуб.JPG

Важ клуб

Файл:Митя. Гуналог.JPG

Гуналог

Файл:Митя. Ыб туй.JPG

Ыб туй

Файл:Митя. Беспруд сайын.JPG

Беспруд сайын

Файл:Митя. Кыдзысйыл пруд.JPG

Кыдзысйыл пруд

Вöлöма пö морт, кöда поздісьöм эта местаö, нимыс вöлі Митя. Сідз и пондасö шуны деревнясö.

География

Митя грездыс сулалö Кыдзыс ю йыввезын, посадму шöринсянь (Юксьӧв посадсянь) асыввылö 1,6 км ылынаын да Кöч посадсянь ойвыв-асыввылö 33 км ылынаын.

Ордча грезддэз

Митя грездсянь ойвыв-асыввылö 1,4 км ылынаын сулалö Пармайыл (сэтчö эм веськыт туй), лунвыв-асыввылö 3 км ылынаын сулалö Бажöв, лунвылö 2,8 км ылынаын — Сизьöв.

Матісь ландшафттэз

Татісь отир тöдöны сэтшöм ландшафттэз:

• Велта́с
• Кання́вöр
• Кыдзысйы́л (вöр)
• Кыдзы́скуш (ыб)
• Маркопа́шня (ыб)
• Пожумья́ин
• Пыжья́ин
• Сидöрмыс
• Чига́нöвскöй вöр

Грезд дынын, Кыдзыс ю вылас, эмöсь унакодь пруддэз:

• Кыдзы́с пруд
• Бе́спруд
• Кара́сь пруд
• Кання́вöр пруд
• Бажӧ́вскöй пруд

Ордча вöррезын олöны кӧин, руч, кӧч да быдкодь кайез.

Янсалöм

Митя грездлöн торрез:

• Баддя́лог, урдöлас, асыввывся 3 керку
• Гунало́г, урдöлас, рытвыв
• Кита́йгорт, велдöрас, рытвыв
• Ло́гина (?)
• Осёлкурья́, вердöлас, асыввывся 4 керку

Туйез

Митя грездын куим туй :

Коми ним	Роч ним
Урдöл туй	ул. Набережная
Вердöл туй	ул. Луговая
Ыб туй	ул. Полевая

Эм отаин (площадь) Бар дынын .

История

Эм археологгезöн адззöм Митядорись шойна.

1880' воэзö Митяын вöлі 18 картавыл. Отирыс кöдздöмась сю, заптöмась вöр, вöравлöмась.

1909' во кежö татöн вöлі кык мельнича (мутовка). Олöмась 115 морт, кöдна видзöмась 27 горт.

Митяыс сэк вöлі Чердын уездісь Юксьӧв волосьын, 1924' во бöрын Кöсладор (1926' годсянь Кöчладор) районісь Юксьӧв сельсоветын.

Советтэз дырни Митяас лоис «За коммунизм» колхоз. Сэсся лоис «Юксьӧвскӧй» совхоз, митинчи уджалöмась совхозыс первöй отделеннёын. Вöлі ферма.

1970' во пондöтчикö Митяын олöмась 241 морт.

Веськöтлан

Ӧні Митяыс пырӧ Юксьӧв посадмуӧ, 2006' воöдз вöлі Юксьӧв сельсоветын. Грездын эм староста, полициялöн урядник вовлö Юксьöвись.

Отир

Отирыс шусьöны ми́тинчи (öтік морт — митя́ись).

Митинчи гишшöны унажыкыс Утробин. Эм и мöдік фамиллёэз — Юркин, Сизов.

2009' во пондöтчикö грездын олöмась 192 морт, кöдна видзöмась 59 горт.

Отирыс — комиöсь, баитöны комиöн.

Ордча грездын Митяын оліссесö нимкодялöны упа́ддезöн.

Торья отирыслöн эм нимкоддез: Арбуз Петь, Санко Вань, Паша Валь, Зинко Лёнь, Öнись Лёнь, Гоб Ныр, Одуванчик, Сьöд Иван, Гöрд Иван.

Кöзяйство да быт

Ыджыт уджаиннэз грездын абуöсь. Отирыс быдтöны пода да карч, туруналöны, ягöдалöны, тшакьялöны, вöралöны.

Туйез грездас умöльöсь. Токö Юксьöвлань туйыс вевттьöм асфальтöн. Ветлö автобус, кöть тодильнöй сувтчаныс и абу. Джын отирлöн эм ас машинаэз.

Митинчи вермöны видзöтны телевизор, а радио кынымкö во кыдз ни орöтöмась. Эмöсь телефоннэз, а мобильниккез озö кутö.

Эм кык лавка, кытöн вузалöны берсятор. Öт магазиныс шусьö Бар.

Шырсьыны да мый да отирыс, öддьöн колö кö, ветлöны Кöчöдз.

Эм аптека, медматісь медпункт — Юксьöвын.

Кулöм отирöс Митровчи дзебöны Юксьöвас жö.

Культура

Челядьсад грездісь пöдналöмась. Челядь велöтчöны Юксьöвись школаын. Сэтöн жö медматын культура керку. Одзжык вöлöма асланыс клуб, керкуыс öнöдз сулалö.

Митяын берся гажöтаннэз чулöтлöны öддьöн шоча.

Отирыс медыджыт празьник туйö пуктöны Спас. Митяын да Пармайылын сія — асланыс вежалун. Этія лунö быд во матісь видззез вылын овлöны Спас коссез, кöр Кöчладорись да Кöсладорись том отир тышкасьöны öтамöдныскöт.

Порйöтöны сідзжö Стречалун, Ыджытлун, Василей рыт, Масленича.

Медматын вичку (киссьöм ни) — Юксьöвын.

Казьмöтаннэз да сингажöтаннэз

• Беспруд, сійö лоöсьöтöмась сельсоветісь пред Бесов Николай Семёнович вöзйöм сьöрті

Берся

• Митя грезд — Юксьöв понда курорт, уна пруддэза да.

Лыддьöтан

• Коми-Пермяцкий национальный округ. Москва-Ленинград, 1948.
• Кочевский район: прошлое и настоящее / сост. Н. М. Коваль, С. Н. Пыстогова. Пермь, 2006. 464 с. ISBN 5-88009-020-5
• Утробина И. Г. Гижöм. Перем, 2011.