Перым кыввез

Босьтöм Википедияись

Перым кыввезурал котырись чудь-йöгра группаын кыв увтыр. Перым кыввезöн лыддисьöны коми кыв да удмурт кыв.

Мöд нёджöв сьöрті перым кыввез унажык. Коми кывсянь торйöтöны бы коми (зыряна) кыв, перем коми кыв, язьва коми кыв, изьва коми кыв. Удмурт кывсянь торйöтöны бы бесерман кыв.

Роч кан лыддьö торья кыввезöн куим перым кыв: коми (зыряна) кыв, перем коми кыв да удмурт кыв.

Ним йылісь[вильмӧтны | Вильмӧтны код]

Перым кыввез шусьöны сідз топоним Перем (ойвыв комиэз шуöны Перым) сьöрті. Одзжык Perämä-нас (Бöрму) вепссез шуöмась дорись муэз, кытöн олöмась перым отир (талуння комиэзлöн да удмурттэзлöн важайез). Ны сьöрті скандинаввез пондöмась шуны энö муэсö Bjarmaland (латыньöн Biarmia), а роччез Перемь. Сысянь петісö терминнэз нем. Biärmische Sprachen, ингл. Permian languages, роч. пермские языки.

Термин аркмöма европаись лингвистикаын XIX векын. Комиöн мийö вуджöтамö сійö кыдз перым кыввез, м.ш. босьтам зыряналісь форма перым, мыля форма перем миян вежöртасыс сьöрті зэлыта йитöм перем коми кывкöт (кöдö шуöны сідз Перем ладор сьöрті, кытöн сы вылын унажыксö баитöны), а перем коми кылыс — токо öтік юкöт перым кыввез коласын.

Кытöн баитöны[вильмӧтны | Вильмӧтны код]

Перым кыввез вылын баитіссез олöны Европа ойвыв-асыввылын, унажыксö Перем ладорын, Коми Республикаын да Удмурт Республикаын. Эмöсь нія и ордча муэзын: Киров лапöлын, Тотарстанын, Башкырмуын, Свердлов лапӧвын, Йӧгра кытшын, Ямал Яран кытшын, Яран кытшын, Мурман лапöлын.

Мымда баитісь[вильмӧтны | Вильмӧтны код]

Быдсöн перым кыввез вылын баитöны 775 сюрс морт (2002' во). Ныись 464 сюрсыс баитöны удмуртöн, а 311 сюрс морт комиöн. Медбöрья дасвоэзö перым кыввез вылын пондöмась баитны етшажык. Сідз, эшö 1989' годö öтласа лыдпас вöлі миллёнся унажык: 1 210 777 морт [1].

Перым кыввез да диалекттэз[вильмӧтны | Вильмӧтны код]

Перым кыввез аркмöм[вильмӧтны | Вильмӧтны код]

Перым кыввез история йылісь туяліссез висьтасьöны сідз.

Важ перым кыв аркмöма миян эраöдз мöд сюрсвоын, кöр одзланься чудь да меря мунöмась рытвылö, а одзланься йöграыс лунвылö. Важ перым отир кольччöмась асланыс горт муын — Кама да Ятка бассейннэзын.

Важ перым кыв разьсьöма миян эрася VII-IX веккезö, кöр мукöд перым увтыррез, булгара шогья пышшикö, мунöмась ойвылö — Сыктыв, Емва да Эжва ладорö, а мöдіккез кольччöмась овны Кама да Ятка коласын.

Ойвылас виль оліссез пондöмась асьнысö шуны коми ойтыр, а ордча чудь йöзыс перво нійö нимтöмась perämäne (бöрмуись), сысянь лоис пермяна, biarmian. Лунвылас кольччöм перым увтыррез сэсся пондöмась асьнысö шуны удмуртъёс (одморттэз), ордча йöзыс шуанöн вотяккез, аррез.

Перым отирыс эна кык группаын пондöмась жагöника баитны мöднёжа нежели одзжык и быд группаас асмоза, мыля комиэз одз пондöмась вовлісьны роччезкöт да чудьыскöт, а удмурттэз тюркиэзкöт.

Сёрöнжык мукöд комиэз, роччез шогья пышшикö, бертöмась ойвывсянь Кама ладорö, кытчö нія сьöраныс вайöмась и йöзовöй нимнысö перем. Кама ладорын комиэз аркмöтöмась Ыджыт Перем канму да аскодялöмась кыв сьöрті матын удмурттэзöс да Урал дорсянь вовлісь маньсиэзöс. Этія сорасісь Кама ладорын (öнняся Перем ладор) аркмöмась виль коми диалекттэз [2], кöднаись сэсся керöмась перем коми кыв.

Сы коста ойвылас кольччöм коми отирсö ордча чудьыс пондöма нимкодявны zyrjäne (дорись), сы сьöрті и роччез пондöмась шуны сэтісь комиэзöс зыряна. Чудьыскöт да роччезкöт вовлісьöм увья аркмöмась ойвыв коми диалекттэз: эжвагрув диалект, емва диалект, удора диалект. Ны коласын медбура аскоддьöм удора диалект.

Ойвыв коми диалекттэзісь XVI-XIX веккезö торйöтчис изьва диалект, кöда бура йылöма ойвыв муэзас, кыдз öння Коми Республикаын, сідз и ордча регионнэзын. Сійöн, мыля изьватас отирыс паськыта олöны да зорамöмась кыдз ассяма субэтнос, мукöдыс шуöны нылісь диалектнысö изьва кыы.

Сыктыв ладорись комиэз дыр вовлісьöмась Кама ладорись комиэзкöт Кай волокöт. Этасянь татісь сёрниыс (сыктывыйыв диалект, шöрöт сыктыв диалект) öддьöнжык вачкисьö перем коми басни вылö, а мукöд оліссез нельки рочöн шуöны асьнысö пермякъясöн.

Эшö öтік "пермяцкöй" диалект зыряналаняс аркмöма Луз ю дорын да Лэт ю йылын (луза-лэтка диалект), кытöн комиэз павкöтчöмась не токö чудьыскöт да роччезкöт, но и мариэзкöт.

Эжва йылö да Печора йылö коми отир локтöмась сёр (XVII век), унажыксö Сыктывсянь да Удорасянь. Татісь диалекттэз (эжвайыв диалект да печора диалект) аркмöмась быдкодь диалекттэз сорасісь.

А Кама ладорын коми диалекттэзлöн аркмöмась нёль группа: асыввылас, рытвылас, ойвылас да лунвылас.

Перем му асыввылас перво вöлі Ыджыт Перемлöн шöрин; татісь коми диалект вöлöма статусыс сьöрті медвына. Коми öксайезöс берездöтöм бöрын, татчö локтöмась уна роччез, и комиэз XVI-XVIII веккез сьöрна рочсялöмась. ХХ век кежö Перем ладор асыввылын коми басниыс невна не быдсöн öшöма, сылісь коляссö адззам токö Язьва дорын. Этö язьва диалект, кöдаись перемшана öні керöны бы торья язьва коми кыл.

Рытвылас перем комиэз шедöмась Ятка губерняö, кытöн нія бура рочсялöмась жö (öнняся коляысыс — зюзьдін диалект).

Öнняся Коми кытшын коми кывлöн аркмöмась кык диалект чукöр, мыля татісь коми отир XVI век понсянь пондöмась овны торья уезддэзын: Чердын уездын коми оліссезлöн аркмöма кöсладор диалект, а Совкар уездын - иньва диалекттэз (вылісь иньва диалект да улісь иньва диалект).

Ойвыв-рытвылас перем комиэз павкöтчöмась зыряна комиэзкöт: кöсладор диалект XIX векöдз вöлі йитöм cыктыв диалекттэзкöт, а XIX-XX веккезö самöй ойвылас эжвайыв диалекткöт контакт увья аркмöма луп диалект.

Лунвылас коми кылыслöн ареал одзжык вевттьöма и Обва бассейн. Татöн вöлöма коми кывлöн обва диалект, кöда öні кежö öшöма нач — отирыс вокорень рочсялöмась. Токö Нердва йылісь коми басни сьöрті позьö тöдны этія диалектлісь ассямасö.

Ойвыв удмурттэзлöн сёрниыс öддьöн вачкисьö перем коми басни вылö, мыля роччез локтытöдз нія дыр вовлісьöмась ордча коми отирыскöт, кöдна нылö кыв сьöрті öтвужаöсь. Ойвыв удмурт сёрнитан аркмöма Чупчи ю пöлöн, одзжыкся Ятка губерняын.

Ойвыв удмурттэз коласын олöны бесермана. Бесермянасö лыддьöны удмуртсялöм чувашшезöн, кöдналöн аркмöма ассяма бесерман диалект.

Лунвылынжык, одззася Козань губерняын, олісь удмурттэз бура вовлісьöмась тюрки йöзкöт, перво булгаракöт, а сыбöрын тотаракöт. Эта вовлісьöм увья удмурттэзлöн аркмöма лунвыв сёрнитаннэз, кытöн öддьöн уна босьтöм тюрки кыввезісь.

Удмурт диалекттэз, кöдна Удмуртму лунвылын, шуöны лунвыв сёрнитанöн, а ордча муэзісь удмурт диалекттэз - лунвыв периферияись сёрнитанöн. Мöдас тюрки шöмыс эшö буражык тöдчö.

Удмурт кывлöн лунвыв да ойвыв сёрнитаннэз коласын аркмöмась шöрöт удмурт диалекттэз, кöднаын сорасьöмась ойвывся да лунвывся элементтэз.

Öткодьыс[вильмӧтны | Вильмӧтны код]

Сысянь, мыля торьясьöмыс аркмöма нежык важын, коми да удмурт кыввез öддьöн матынöсь и бура вачкисьöны öтамöд вылö.

Неöткодьыс[вильмӧтны | Вильмӧтны код]

Ыстісяннэз[вильмӧтны | Вильмӧтны код]

  1. Коми язык: Энциклопедия. Москва: Изд-во ДиК, 1998. С. 354.
  2. Напольских В. В. К начальным этапам этнической истории коми / Арт. 2010. №2.

Лыддьöтан[вильмӧтны | Вильмӧтны код]

  • Лыткин В.И., Гуляев Е.С. Краткий этимологический словарь коми языка. М., 1970.
  • Основы финно-угорского языкознания. Марийский, пермские и угорские языки. М., 1976.
  • Серебренников Б.А. Историческая морфология пермских языков. М., 1963.
  • Языки народов СССР. Т.ІІІ. Финно-угорские и самодийские языки. М., 1966.



Чудь-йӧгра кыввез
Йӧгра увтыр Мадьяр кыв | Маньси кыв | Ханты кыв
Перым увтыр Коми кыв (стандарттэз: зыряна | перем) | Удмурт кыв
Мари увтыр Мари кыв (стандарттэз: олык | курык)
Мордва увтыр Мокша кыв | Эрзя кыв
Чудь увтыр Фин кыв | Эст кыв | Вепс кыв | Водь кыв | Карел кыв | Лив кыв † | Ижора кыв
Саам увтыр Саам кыв (стандарттэз: анараш | давви | кильдин | колтта | оарьел | юлев)
Важын ӧшӧм кыввез Меря кыв † | Мещера кыв † | Мурома кыв
Ӧшӧм кыввез