Перем комиэз

Перем комиэз
Ӧтласа лыд:	125,2 сюрс морт
Олан иннез:	Перем ладор, Киров лапӧв
Кыв:	Коми-пермяцкӧй
Эскӧм:	Буркывья вичку
вуж сьӧрті матын отиррез:	Коми зыряна

Перем комиэз нето коми пермяккез – коми отир, кӧдна олӧны Перем ладорын, Киров лапӧлын да Коми Республика лун-рытвыв пельӧсын. Быдӧс этна комиэз рочӧн асьнысӧ шуӧны (нето шуисӧ ХХ век пондӧтчикӧ) пермяккезӧн.

Комиӧн баиттӧнняс перем комиэзісь быд морт нимтӧ асьсӧ коми морт.

Перем комиэсӧ, кӧдна олӧны Перем ладорись Коми кытшын веськӧтліссез тшӧктӧны шуны коми-пермяккезӧн. Коми кытш визиррез сайись перем коми анклаввезын отирыс ӧнӧдз шуӧны асьнысӧ рочӧн дзир пермяккезӧн. Унажык комиэсӧ, кӧдна олӧны Коми Республикаын, йӧзыс шуӧны коми зырянаӧн. Перем комиэз да коми зыряна лоӧны коми отир пытшыкын кык ыджыт субэтнос туйӧ.

2002 вося гижӧтӧм сьӧрті Роч Федерацияын перем комиэз олӧмась 125,2 сюрс морт, ны коласын Перем лапӧлас — 103,5 сюрс морт, ныись Коми кытшын — 80,3 сюрс морт.

XIX век помын да XX век пондӧтчикӧ перем коми отир сё содӧма, мыля отирыс горт муэзісь мунісӧ етша. 1897 годся гижӧтӧм сьӧрті перем комиэзісь 98% олӧмась асланыс муэзын. Ӧні уна том отир мунӧ аслас чужан муэзісь кошшыны буржык олан да ӧшӧ-сылӧ роччез шӧрын, сійӧн и коми отирыс Перем ладорас лоис унаись етшажык.

Перем комиэз баитӧны коми кывлӧн перем диалекттэз вылын. Коми кытшын перем комиэз лӧсьӧтӧмась тодильнӧй кыв стандарт, кӧда шусьӧ Перем комиэзлӧн лыддьӧтан кыв (рочӧнжык: коми-пермяцкӧй литературнӧй кыв). Этійӧ кыв велӧтӧны Коми кытшись школаэзын 21% мымда коми челядь коласісь. Тодильнӧй лыддьӧтан кыв (коми-язьвинскӧй кыл) Перем ладорись юраліссез ӧні лӧсьӧтӧны и Язьва дорись комиэз понда.

Ним йылісь

Медодз роччез шуӧмась быдӧс коми отирсӧ ӧтласа нимӧн – пермяна нето пермяки, пермичи, но XVII вексянь ойвыв комиэсӧ рочӧн пондісӧ гижны зырянаӧн, а лунвыв комиэсӧ – пермяккезӧн. Этнія ниммез дынӧ жагӧник велалісӧ и асьныс комиэз, да унажыкыс сідз и кутчисӧ шуны асьнысӧ, кӧр баитӧны рочӧн.

Ойвыв комиэз (зыряна) 1921 годӧ шупкисӧ роччезлісь босьтӧм нимкодьсӧ да рочӧн шуӧны асьнысӧ дзир комиэзӧн (коми народ), кӧть и наукаын коми зыряна ним кольччис, мед вежӧртны, кӧдладорись комиэз йылісь сёрниыс.

Коми кытшын олісь комиэзлӧ, кӧдна одзжык асьнысӧ шуисӧ рочӧн пермяки, а комиӧн коми, 1925 во бӧрын юраліссез тшӧктісӧ и рочӧн, и комиӧн шусьыны коми-пермяккезӧн (коми-пермяки). Коми отир татӧн дыр вермасисӧ, мед чапкыны этійӧ нимкодьсӧ, но 1937 во бӧрын сетчисӧ.

Язьва дорын олісь комиэз ӧнӧдз шуӧны асьнысӧ рочӧн дзир пермяккезӧн, а Киров лапӧлын комиэз (зюзьдінса) – пермянаӧн.

Колӧ содтыны то мый: мукӧд перем комиэз (Сыктыв йылын, Лэт йылын да Луз дорын оліссез), кӧдна рочӧн шуӧны асьнысӧ пермяккезӧн, ас кадӧ пырӧмась Коми Республикаӧ да ӧні наукаын лыддисьӧны коми зырянаӧн.

Сійӧн, мыля дӧс этна комиэз босьтісӧ аслыныс роч ним перем шуан сьӧрті (пермяк < перем), да и унажыкыс ны колаісь олӧны Перем ладорас, ми и нимтамӧ нійӧ быдӧннысӧ комиӧнжык перем комиэзӧн (рочӧнжык – коми пермяккезӧн). Но этійӧ ми керамӧ токӧ сэк, кӧр перем комиэз (коми пермяккез) да коми зыряна казьтывсьӧны ордчӧн. Абу кӧ могыс нійӧ торйӧтны – сэк тырмӧтчамӧ дзир коми нимӧн.

Олан муэз

Унажык сы йылісь видзӧт: Перем комиэзлӧн олан муэз

Перем комиэзлӧн олан муэз куйлӧны Перем ладорын, Киров лапӧлын да Коми Республикаись лун-рытвывся пельӧсын.

Медуна перем комиэз олӧны Перем ладорись Коми кытшын, кӧда куйлӧ шӧрӧттяс и лоӧ перем коми отир понда культура шӧрин (центр). Татісь школаэзын первуись перем комиэз коласын пондісӧ велӧтны комиӧн, татісь ысталісӧ коми велӧтіссесӧ мӧділаын олісь перем комиэз дынӧ, татӧн петӧны комиӧн небӧггез, комиӧн баитыштӧ радио да телевидз. Оліссез татӧн – иньвенса да косинса.

Перем ладорись ойвыв-асыввылын, Вишера районын перем комиэз олӧны Язьва ю йыввезын. Нылӧн аскоддя диалект, вера сьӧрті нія кержаккез. Перем ладорись юраліссез нетшкӧвтӧны бы язьвинсасӧ мӧдік перем комиэз коласісь, сы понда кынымӧкӧ ны челядь коласісь пондісӧ велӧтны татісь диалектӧ, кӧдӧ томмез вунӧтӧмась ни, лэдзӧны небӧггез.

Одзджык Кама ладорыс Перемсянь ойвывланяс вӧлі сваль коми муӧн, эта йылісь баитӧны топониммез: Ныроб, Яйва, Чусва, Обва. Ӧні коми отир татісь рочсялӧмась, кӧть и ны роч сёрниын кольччӧны торья коми шуаннэз да формаэз.

Перем ладор пасьта (Коми кытш визиррез сайын) олісь перем комиэз – Коми кытшись нето Язьва дорись мунӧм йӧз. Нія олӧны унажыксӧ каррезын, медуна – Перемын.

Киров лапӧлісь Зюзьдін (Афанасьева) район – перем комиэзлӧн важ горт. Сія куйлӧ Кама катытын, ордчӧн Коми кытшкӧт асыввылын да Удмурт Республикакӧт лунвылын. Зюзьдінса лёка рочсялӧны, школаын коми кыв оз велӧтӧ.

Коми Республикаись Койгорт районын, Сыктыв ю йыввезын, олӧны перем комиэз, кӧдналӧн басни вачкисьӧ зюзьдінса сёрни вылӧ. Но этнограффез пыртӧны нійӧ коми зыряналӧн сыктывса чукӧрӧ. Лыддьӧтан кыв туйӧ татӧн лыддисьӧ зыряналӧн коми кыв, кӧда вылын уна бур небӧг гижис татісь петӧм морт Торопов Иван.

Коми Республикаись Луздор районын перем комиэз олӧны Лэт ю йыввезын да Луз ю дорын. Нійӧ туяліссез сідзжӧ лыддьӧны коми зыряна туйӧ, нылӧн челядь велӧтӧны мам кыв зыряна небӧггез сьӧрті.

Уна перем комиэз мунісӧ чужан муись кошшыны буржык олан. Сійӧн миян вужись петӧм отир олӧны ӧні омӧн Роч му пасьта. Медуна – Краснодар ладорын, Ростов да Свердлов лапӧввезын, Йӧгра кытшын.

Лыд

Унажык сы йылісь видзӧт: Перем комиэзлӧн демография, Перем комиэзлӧн лыд Роч му регионнэз сьӧрті

2002 годся гижӧтӧм сьӧрті Роч му пасьта олӧмась 125 235 перем коми морт.

Коми кытшас сія жӧ кадӧ коми отир вӧлӧмась 80 327 морт.

Перем лапӧлас, Коми кытш визиррез сайын, сія жӧ кадӧ лыддисӧ асьнысӧ перем коми отирӧн 23 178 морт (эшӧ 1148 морт шуисӧ асьнысӧ коми), ныись 900 гӧгӧр коми морт олӧмась Язьваланьын.

Зюзьдінса коласісь перем комиӧн шусьӧмась 351 морт.

Унаӧн перем комиэз коласісь мунӧны ылӧ чужан мусянь. 2002 вося гижӧтӧм сьӧрті медыджыт перем коми диаспораэз аркмӧмась Ханты-Манси (Йӧгра) кытшын (2704 морт), Свердловск лапӧлын (1897 морт), Ростов лапӧлын (1811) да Краснодар ладорын (1095). Унаӧн перем комиэз мунӧны и Коми Республикаӧ, татӧн нія 1118 морт.

Мымда вӧлісӧ перем комиэз важ кадӧ тӧдны сьӧкыт — сы йылісь некытӧн абу гижӧм. Тӧдны пондасӧ дзир XVIII век пондӧтчикӧ. 1710 годӧ Чердын уездісь 57 грездын (деревняын) олӧмась 3026 коми морт, Иньва ю гӧгӧр Совкар уездісь 97 грездын — 4763 коми морт (нійӧ тожно, 1702 воын, сетісӧ Строгановвезлӧ). 1745 годӧ коми отир лоасӧ ни 16 300 морт, а 1795 во кежӧ — 29 800 морт.

XIX век сьӧрна комиэз содӧмась чожжыка мӧдік кывья йӧзся. 1857-1858 годдэзӧ X ревизия (гижӧтӧм) сьӧрті коми отир вӧлӧмась 62 130 морт. Ны коласісь Совкар уездын олӧмась 45 356 морт, Чердын уездын — 15 458 морт, Оханскӧйын — 1316 морт. 1897 годӧ Роч империялӧн медодзза гижӧтӧм мыччалас Перем губернияись 92 641 коми мортӧс, ны коласын: зюзьдінса — 9320 морт, язьвинса — 3843, обвинса — дзир 62 морт.

1925 годӧ Урал муэзын олӧма 134 сюрс коми морт, ны коласісь ӧнтай аркмӧтӧм Коми кытшын — 117 300 коми морт.

Быдсӧн отирсӧ гижӧтӧммэз сьӧрті Коми кытшас оліс:

во	быдсӧн олісьыс (сюрс морт)	комиэз(сюрс морт)	комиэз( %)
1926	152,5	117,4	77%)
1959	234,2	126,7	54,1%)
1979	172,0	105,6	61,4
1989	158,5	95,4	60,2
2002	136,1	80,3	59,0
2004	134,4	78,9	58,7%

Зюзьдын районас 1950 воэзӧ коми отир вӧлӧмась 7 сюрс гӧгӧр морт, 1970 годӧ — 700, а 2002 воын татісь лыддисӧ токӧ 351 коми мортӧс, сы сьӧрті, кыдз быдсӧн районас йӧзыс олӧны 16 960-а.

Язьва дорын коми отир 1897 годӧ вӧлӧма 2,2 сюрс морт, 1926 вося отир гижӧтӧм кежӧ нія лоасӧ унажыкӧсь: татӧн олӧма сэк 3163 коми морт. А сэсся нійӧ пондасӧ гижны роччезӧн. Медбӧрья гижӧтӧм дырни комиӧн (нето перем комиӧн) асьнысӧ шуӧмась дзир 886 морт омӧн Вишера район пасьта.

Янсалӧм

Перем комиез коласын ӧні позьӧ янсӧтны нёль чукӧр: иньвенса (лунвывся перем комиэз), косинса да лупьинса (ойвывся перем комиэз), язьвинса (асыввывся перем комиэз) да зюзьдінса (рытвывся перем комиэз).

Кӧркӧся обвинсалӧн неыджыт чукӧр, кӧда олӧма Перем губернияись Оханскӧй уездын, ӧння кадӧ быдсӧн рочсялӧма.

Зюзьдынісь да Язьва дорись комиэз, кӧдна эзӧ пырӧ Коми кытш муэзӧ не Коми Республикаӧ, ӧнӧдз олӧны асланыс поверьёэз сьӧрті. Мӧділаэзісь комиэз нылӧ отсалӧмась умӧля, сысянь нія озжык кылӧ асьнысӧ коми отирӧн, но сё жӧ абу досповна ӧштӧмась ассиныс баитан коми кыв, а гижӧтчӧм коста мукӧдыс и шусьӧ коми мортӧн.

Коми кытш ойвылын да лунвылын олісь комиэз баснинаныс, культурананыс да оланнаныс невна торьясьыштӧны. Медтӧдчана неӧткодьыс ны коласын тыдалӧ л да в шыэз пыр. Кӧсва дорланьын комиэз баитӧны л шы пыр, а Иньва дорын унажык комиэз ӧштӧмась сійӧ шысӧ да пондӧмась шуны сы туйӧ в шы: (кыл — кыв).

Иньвенса

Унажык сы йылісь видзӧт: Иньвенса, Нердвинса

Лунвылынжык олісь перем комиэзісь унажыкыс олӧны Иньва ю да сыӧ усян юэз пӧлӧн (сійӧн и шусьӧны – иньвенса). Сія ладорись комиэз торьясьӧны нёль неыджыт чукӧр вылӧ, кӧдна олӧны Иньва кывтытын, Иньва катытын, Ӧнь дынын да Нердва ю йыввезын.

Нердва йылын да Ӧннезын оліссез лоӧны коляссэз нія коми йӧзісь, кӧдна олӧмась кӧркӧ Обва ю да сы вожжез пӧлӧн. Ӧні унажыкыс обвинса рочсялӧмась, а Нердваись да Ӧннезісь комиэзӧс видзӧтӧны ӧтлаын иньвенсакӧт.

Нердва дорын олісь комиэс торьясьӧны мӧдіккезсянь асланыс басниӧн. Уна годдэз сьӧрна роччезкӧт ӧтлаын олӧмыс пыртӧма ны оланӧ роччезлісь поверьёэз. Ӧньын отирыс невна не быдӧнныс рочмӧмась ни.

Кудымкар район пасьта да Юсьва район рытвылын олісь комиэзлӧн аскодьӧм басни да культура, ордча комиэз нійӧ шуӧны батюррезӧн.

Иньвенса шедтӧмась сёянсӧ гӧрӧмӧн да кӧдзӧмӧн. Иньва ю пӧлӧн керкуэсӧ сувтӧтӧмась вит бокаӧсь, картавывсӧ абу вевттьывлӧмась. Керкуэсӧ лэбтӧны вӧлі невылына. Паськӧмсӧ вурлӧмась мурӧма да сьӧдрӧма пестрӧдись, вежалунся дубассэз вӧлӧмась набойнӧй дӧраись. Инькаэс новйӧмась юр выланыс шамшураэз.

Коми иньвенса тӧдӧны космогония висьт сы йылісь, кыдз Ен да Куль аркмӧтісӧ мусӧ, висьтасьӧны Кудым Ош йылісь важся легенда.

Косинса

Унажык сы йылісь видзӧт: Косинса, Лупьинса

Ойвылісьжык перем комиэсӧ этнограффез ӧтувтӧмӧн шуӧны косинса. Коми отирлӧн этія чукӧрӧ пыриссез важынсянь олӧны Кама да сыӧ усян Кӧсва (рочӧн – Коса) ю пӧлӧн. Коркӧ нылӧн муэз вӧлісӧ Перем губернияись Чердын уездын, сійӧн татісь комиэсӧ сэк нимтӧмась чердынскӧй пермяккез). Ӧння кадӧ нылӧн оланіннэз пырӧны Коми кытшись Кӧч, Кӧс да Гайна районнэзӧ.

Ойвывся перем комиэз коласын торьялӧны Луп йылісь да Нӧрысісь комиэз, кӧдна олӧны Гайна районын. Нія асланыс этнокультураӧн вачкисьӧны коми-зыряналань, но асьнысӧ шуӧны рочӧн пермяккезӧн. Туяліссез нійӧ шуӧны лупьинса.

Гортся поверьёэз да кыв торьялӧны и Кӧч районісь комиэсӧ, кӧдна косинса коласісь лоӧны медгырись чукӧрӧн. Мукӧд туяліссез Кӧч ладорись комиэсӧ лыддьӧны косинса да иньвенса коласын вуджан чукӧрӧн (кочовса нимаӧн).

XIX-XX веккезся туяліссез косинса дынӧ ӧтлаӧтлісӧ Юрла районлӧн ой-асыввыв муэзын олісь комиэзӧс, кытӧн мӧддэс олісӧ роччез коласын. XX сугӧд пондӧтчикӧ Юрла районсис комиэс быдсӧн рочсялісӧ. Дзир оланіннэзлӧн, ыббезлӧн, видззезлӧн да мыссэзлӧн топониммез да одззася коми нимкоддезсянь аркмӧм гишшаннэз (фамиллёэз) мыччалӧны отирыслісь коми йӧзісь петӧм-аркмӧмсӧ.

Ойвыв районнэзісь коми отирыс кӧркӧ вӧлӧмась кан (государство) вылӧ уджалісь крестьянаӧн.

Комиэс татӧн унажык вӧралӧмась, кыйӧмась чери, мукӧдлаас гӧрлывлӧмась ректассэзын муэз. Горт гӧгӧр уджын нылӧн вӧлісӧ няридззез. Грезддэзас (деревняэзас) керкуэс вӧлӧмась етша, сулалӧмась нія ордчӧн. Керкуэс вӧлісӧ вылынӧсь, ӧтлаӧтӧмӧсь кыксувда чомӧн. Керку вевттэсӧ баситлӧмась подачужӧма берсянас. Инькаэс унажык новйӧмась гӧрд дубас да кокошник.

Вӧраліссез новйӧмась паськӧмыс вевдӧрын лузан. Лов культураас татісь комиэслӧн вӧлісӧ аскодьӧм сьыланкыввез, висьтттэз да орсаннэз. Нія висьтасьӧмась Пера богатырь йылісь, кеймӧмась пода видзись да вӧралӧмын отсалісь еннэзлӧ. Уна тӧдісӧ Висьӧв йылісь висьттэз. Кӧрткыввез да модяннэз, ны сьӧрті, отсавлӧны вӧралӧмын да черикыйӧмын.

Язьвинса

Унажык сы сылісь видзӧт: Коми-Язьвинса

Перем му асыввылын эм комиэзлӧн тӧдчана чукӧр — Язьва комиэз нето, рочӧнжык кӧ шуны, язьвинса. Нія олӧны Язьва ю катытын. Эна муэс пырӧны Перем ладорись Вишера районӧ, а одзжык вӧлӧмась Чердын уездісь Верх-Язьва волостьӧн. Асьнысӧ язьвинсаыс рочӧн шуӧны пермяккезӧн.

2002 годся гижӧтӧм сьӧрті Вишера районас перем комиэзӧн (коми пермяккезӧн) шусисӧ дзир 198 морт, а 688 морт шуисӧ асьнысӧ комиэзӧн. Эшӧ 20 морт нимтісӧ асьнысӧ язьвинскӧй пермяккезӧн, этія под вылын Перем ладорись юраліссез тшӧктӧны лыддьыны Язьва дорись комиэзӧс торья отирӧн, лӧсьӧтӧны ны понда торья лыддьӧтан кыв, лэдзӧны небӧггез, видзӧны уна сьӧм.

Язьва комиэз сёрниын уна неӧткодьыс мӧдік комиэз басникӧт. Но этія сёрниыс (баитіссез 200 морт кыным) сё жӧ лоӧ коми кыв понда диалектӧн, кӧдӧ позьӧ пыртны коми кывлӧн асыввывся перем сёрнитанӧ (восточно-пермяцкӧй наречиёӧ).

Коми отирлӧн асыввывся перем чукӧрыс Кама ладорас аркмӧма да зорамӧма IX-XV веккезӧ Кама, Колва да Вишера юэз пӧлӧн. Роччезлӧн Ыджыт Перемӧ локтӧмыс уна мый сорлаліс, сійӧн XVII сугӧд шӧрын Перем му асыввылісь комиэс невна не быдсӧн ӧшӧны. Ны чукӧрсиныс дзир неыджыт тор, кӧда муніс Язьва ю пӧлӧт катытас, видзис ассис баитан кывсӧ да аскодьӧм культурасӧ. Сія и аркмӧтас ӧння торья чукӧр.

XVIII век помын – XIX век пондӧтчикӧ натьтӧ и аркмис язьвинсалӧн чукӧрныс. Сія кадӧ Кама ладорас паськыта ветлӧма кержаккезлӧн велӧтӧм (Христослӧ важ нёжа эскӧм), сы сьӧрті отирыс и ӧтлаасясӧ ӧтік чукӧрӧ да пондасӧ видзсьыны ӧтамӧд бердӧ. Буржыка сорласясӧ рочческӧт Язьва дорись нія комиэс, кӧдна ветлісӧ буркывья вичкуӧ. 1897 годӧ язьвинсаыс вӧлӧмась 2,2 сюрс морт. Комиэзӧн нійӧ медбӧрьяись гижисӧ 1926 вося гижӧтӧм коста, сэк татӧн вӧлі 3163 коми морт. Одзланься гижӧтӧммез дырни татісь коми отирсӧ гижӧтлісӧ роччезӧн ни.

Советтэз дырни Язьва дорись комиэс эзӧ пырӧ нія муэзӧ, кытӧн ӧксисӧ ӧтлаӧ унажык коми отирыс: ни Перем комиэзлӧн асвужья кытшӧ, ни Коми АССР-ӧ. Язьва дорись коми отир ӧнӧдз озӧ вермӧ вежӧртны, кытшӧм чукӧрӧ пырны, шуӧны асьнысӧ коми-язьвинсаӧн, коми-пермяккезӧн, комиэзӧн, пермяккезӧн, нельки роччезӧн. Унаӧн озӧ вермӧ висьтавны, киннэз нія чужанвуж сьӧрті.

Зюзьдінса

Унажык сы йылісь видзӧт: Зюзьдінса

Рытвылынжык олісь перем комиэз коласын медматынӧсь Коми кытш дынӧ лоӧны Кама йыввезісь (Зюзьдінісь) комиэз. Нія олӧны Киров лапӧлісь Зюзьдін (Афанасьева) районын. Одзжык эта вӧлі Вятка губерняись Глазов уезд.

Зюзьдінса этноним лоис, натьтӧ, Сюзьва ю нимсянь, кӧда усьӧ Кама юӧ веськыт ладорсянь (Зюзьдін < Сюзь дін, дін кывлӧн вежӧртас лоӧ ‘уссё’). Этія ю уссё гӧгӧр, тыдалӧ, и олісӧ татісь комиэзлӧн важ ай-маммез.

Асьнысӧ татісь комиэз рочӧн шуӧны пермянаӧн, пермяккезӧн.

Уна век сьӧрна зюзьдінса олӧмась торйӧн коми этнос шӧриннэзсянь, ӧтлаын роччезкӧт. Сійӧн Зюзьдын комиэслӧн важынсянь лоӧма аскодьӧм рочсялӧм олан культура. Рӧдвуж отир дынсянь торйӧн олӧмыс, нация зоралӧмсянь да коми отирлӧн ӧтлаасьӧмсянь торьялӧм, Коми кытшись да Коми Республикаись комиэзкӧт экономика да культура йитӧттэзын етша пантасьлӧм, унажыксӧ и сорлаласӧ Зюзьдынісь комиэсӧ рочческӧт.

1950 воэзӧ Зюзьдын районас коми отир вӧлӧмась 7 сюрс гӧгӧр морт, 1970 годӧ — 700 морт. А 2002 во кежӧ татӧн кольччасӧ 351 коми морт, сы сьӧрті, кыдз быдсӧн районас олӧны 16 960 морт.

Зюзьдынісь комиэс баитан кыв да горт олан сьӧрті торйӧтчӧны кык чукӧр вылӧ. Ойвыв зюзьдинсаыс вачкисьӧны унажыксӧ Гайна гӧгӧрись комиэзлань, лунвывсяэс — Иньва дорись комиэзлань.

Ой-рытвылын, ылынкодь Коми кытшсянь олӧны перем комиэз, кӧднӧ пыртӧмась зыряна коласӧ, этӧ Сыктывйывса, Лэт ю дорись да Луз ю дорись комиэз.

Кыв

2002 вося гижӧтӧм сьӧрті Роч муын перем комиӧн баитӧмась 94,3 сюрс морт, ны коласын 3,5 сюрсыс – мӧдік вужжезісь отир. Перем комиэзісь ассиныс кыв тӧдӧны 72,6%. Этія лыдпас вежсьӧ сы сьӧрті, кытӧн коми мортыс олӧ. Шуам, Коми кытшын чужан кыв вылын баитӧны 83,1% комиэз коласісь; Перем ладорын (кытш визиррез сайын) - 60,7%; Перем ладорсянь ылын олісь перем комиэзісь мам кыв тӧдӧны токӧ 46,4%.

Перем комиэзлӧн эм асланыс кыв стандарт – перем комиэзлӧн лыддьӧтан кыв (рочӧнжык коми-пермяцкӧй литературнӧй кыв), кӧда вӧлі лӧсьӧтӧм татісь коми диалекттэз под вылын. Коми кытшись школаэзын лыддьӧтан кывнысӧ да перем коми литература 2008/09 воын велӧтӧмась дзир 20,5% коми челядь коласісь (2931 морт); а садиккезӧ, кытӧн челядёкыскӧт баитӧны коми кыв вылын, ай-маммез сетӧмась сія жӧ годӧ токӧ 848 кага (этія лоӧ 14,3% быдӧс дошкольниккез коласісь).

Диалекттэз

Унажык сы йылісь видзӧт: Перем коми диалекттэз

Перем комиэз олӧны паськыта, сійӧн и кыв нылӧн абу быдлаын ӧткодь. Позьӧ торйӧтны нёль ыджыт сёрнитан (наречие): ойвывся, лунвывся, рытвывся да асыввывся. Коми кывлӧн перем сёрнитаннэз невна не пыр лӧсялӧны коми отирлӧн торья перем чукӧррезкӧт.

Ойвывся да лунвывся сёрнитаннэз куйлӧны шӧрӧттяс, ны под вылын вӧлі аркмӧтӧм перем комиэзлӧн лыддьӧтан кыв – перем коми кыв.

• Ойвыв перем сёрнитаныслӧ аскодя то мый: татӧн л шыыс некӧр оз ӧш, ёнжыка шусьӧ медодзза слог, уна кыввез, структураэз и формаэз зыряна сёрниын кодьӧсь. Зыряна коктуй сьӧрті ойвыв сёрнитанісь янсӧтӧны Луп да кӧсладор диалекттэз. Луп диалектын зыряна басни вылӧ вачкисян чертаэз оддьӧн ни уна. Этія и вежӧртана, эд лупьинса пыр вовлісьӧмась эжвайывсакӧт, кӧдна комиӧн баитӧны зыряна нёж. Кӧсладор диалектісь мукӧд туяліссес торйӧтӧны Кӧчладор баснисӧ, сія пӧ лунвывся сёрнитан вылӧ буражык вачкисьӧ.
• Лунвыв перем сёрнитаныс бӧра абу ӧткодь. Кык диалектын – Улісь Иньва дорын да Вылісь Иньва дорын л шыыс ӧшӧм начӧдз. Сы туйӧ шуӧны в нето нем озӧ шуӧ. Этна диалекттэз ӧтамӧднысӧкӧт торьясьӧны шы вынсьӧтанӧн. Вылісь Иньваланьын унажыксӧ ёнжыкӧсь овлӧны мукӧд торья содттассэз, а Улісь Иньваланьын одззза слогись куим тыргора шы (у, ы, и) ӧштӧны вынсьӧтаннысӧ. Нердва диалектын л шыыс кольччӧма, кыдз и ойвывся сёрнитанын. Сія жӧ шыыс олӧ и Ӧнь диалектын, кӧть ачыс диалектыс ӧнія кадӧ ӧшӧ ни.
• Рытвыв перем сёрнитанӧ велалӧмась пыртны дзир ӧтік диалект – зюзьдінсалісь. Татӧн мукӧд формаэз зыряна басни вылӧ вачкисьӧны (шуам, унаӧ лыддян -яс). Диалектыс бура рочсялӧма. Сэтшӧм жӧ серпас ми адззам и Сыктыв йылын да мымдакӧ Луза-Лэтка диалектын, кӧднӧ ӧні пыртӧны зыряна диалекттэз коласӧ.
• Асыввыв перем сёрнитан медбура торьясьӧ мӧдік коми диалекттэзісь. Татӧн мийӧ адззам ӧтік диалект – язьвинсалӧн. Язьва диалектын эм ассяма шыэз (шуам, небытӧсь о и у), шы вынсьӧтан система матын Улісь Иньваланьын шы вынсьӧтӧм дынӧ, лексика – ойвывся перем коми кывйӧр дынӧ, а кыв ладас ӧддьӧн уна ӧтласа мукӧд зыряна диалекттэзкӧт.

Лыддьӧтан кыв

Унажык сы йылісь видзӧт: Перем коми кыв

Перем комиэзлӧн лыддьӧтан кыв аркмӧма коми кывлӧн лунвывся да ойвывся перем сёрнитаннэз под вылын.

Первуись бумага вылӧ перем коми кыввез-шуаннэз лоисӧ личкӧтлӧмӧсь-печатайтӧмӧсь 1756 годӧ Г.Ф. Миллер уджын, мортыс босьтӧма нійӧ ойвыв сёрнитанісь. 1785 во кежӧ вӧлі дась (готов) медодзза коми грамматика да ыджыткодь кывкуд, лӧсьӧтісьыс – Попов Антоний. Сэсся перем сёрнитаннэзісь лоасӧ ӧктӧмӧсь эшӧ кык ыджыт кывчукӧр – Чечулин Георгийлӧн да Волегов Федотлӧн. 1823 воын первуись вуджӧтӧны перем коми кыв вылӧ Бур юӧр (Евангеллё). Этійӧ керӧма Йӧг посадісь поп Любимов Феодор.

1860 годӧ Питерын печатайтӧмась перем коми грамматика, а 1868 годӧ – кывчукӧр. Кыкнан небӧгсӧ лӧсьӧтӧма Рогов Миков. 1866 воын Лондонын петӧ медодзза печатайтӧм небӧг быдсӧн перем комиӧн, «Матьвей сьӧрті Бур юӧр», кӧдӧ вуджӧтӧма Попов Ӧврамий. Челядьӧс велӧтӧм понда медодзза небӧг петӧ 1894 годӧ, гижис сійӧ Попов Ермов. XIX век помын – XX век пондӧтчикӧ Казаньын лэдзӧны перем коми кыв вылын букваррез да унакодь вичкося небӧг. Сійӧ уджсӧ артмӧтіс Камасинісь Шестаков Яков (сія вӧлі поп Кудымкарын). Вуджӧтіссез коласын тӧдса Седегов И.В., кӧда ки увтісь петіс «Вежа история» (1901 во) да мд. Быдсӧн 1917 воӧдз перем комиӧн печатайтӧмась 26 мымда небӧг. Роч муын юралӧмсӧ мӧдӧртӧм бӧрын коми небӧггес пондасӧ петны бура унажык.

1927 годӧдз небӧггесӧ лэдзӧмась ойвывся да лунвывся сёрнитаннэз вылын торйӧн. Сэсся шуасӧ лӧсьӧтны ӧтласа перем коми кыв. Сы понда пыртасӧ л/в вежласьӧм. Кыв лоас буражык нормируйтӧм. Сія кадӧ перем комиэзлӧ лыддьӧтан кыв лӧсьӧтӧмась Лихачёв Микаль, Питю Ӧньӧ, Онтон Пёдор, Ёгор Пёдор, а томжыккез коласісь Нечаев Григорий, Грибанов Спиридон, Василь Миков, Иву Стёпко. ХХ веклӧн 20-30 воэз сьӧрна перем коми кыв вылын вӧлісӧ лэдзӧмӧсь велӧтан небӧггез алгебра, геометрия, физика, химия, география, ботаника да зоология сьӧрті, уна небӧг вуджӧтасӧ роч кыв вылісь. Аркмӧтласӧ асвужья терминология. Сія жӧ кадӧ не ӧтпыр вежсьылӧма коми кывлӧн графика (гижӧт): перво вӧлӧма Молодцов анбур (1921-1932), сыбӧрын коми латынь (1932-1937), сэсся татісь комиэсӧ вуджӧтасӧ роч азбука вылӧ, а 1939 годсянь пыртасӧ ӧння коми алфавит.

Стандарт туйӧ перем коми кыв вӧлі кодифицируйтӧм август тӧлісьӧ 1938 годӧ. Но эшӧ 1937 восянь коми кывсӧ пондӧмась Коми кытшын быднёж дзескӧтны. Перво шупкасӧ коми теминология (Мошегова Анна, Спорова Анна), сэссся жагӧнік пичкасӧ сійӧ школаись, веськӧтлан керкуэзісь, газетаись. Медбӧрьяись газета быдсӧн коми кыв вылын петӧма 1958 годӧ. Историяӧ велӧтан медбӧрья небӧгсӧ печатайтӧмась 1962 воын, математикаӧ - 1975 воын. Быдӧс этіясянь лыддьӧтан коми кыв ӧштас ассис дон, и кольччас коланаӧн токӧ ны понда «кинлӧ этӧ интересно».

Ӧні коми кыв вылын лэдзӧны недель вылыс ӧтпыр «Коми говк» нима листбок «Парма» газетаын. Телевизор пырья комиӧн баитӧны джын час, а радиоӧттяс дас минут быд уджалан лун. Перем коми кыв сьӧрті медбӧрья ыджыт кывчукӧр (роча-коми) петіс 1985 годӧ, орфография кывчукӧр – 1992 воын.

Ӧння кадӧ отир мӧдӧны бӧра весӧтны коми терминология. Виль велӧтан небӧггезӧ пыртӧны ни сэтшӧм вунӧтӧм кыввез, кыдз шыпас (буква туйӧ), кывбур (стихотвореннё туйӧ) да мӧдіккез.

Перем коми кыв понда ассямаӧн лоӧны:

• Шы вынсьӧтансӧ пыр видзӧны мукӧд содтассэз – ӧт, ас, ӧг да мд. (лыддьӧт, шебрас, курӧг);
• Шума -т шыыс содтассэз помын кольччӧ гортӧмӧн (пемыт, велӧтны);
• Содтас помись сь одзын шусьӧ и, а не ы: вурунісь, каньлісь;
• Унаӧ лыддянсӧ мыччалӧ -эз/-ез содтас (му-эз, пожумм-ез);
• Эм кӧрталан содтас -ся (вӧв пон-ся вылынжык);
• Эм небзьӧтан содтас -ок (керку-ок);
• Кадакыввезын кывзісьлісь унасялӧм вылӧ мыччалӧны -т / -тӧ вежанӧн (муна-т, сёйи-тӧ);
• Чулалӧм да локтан кадын куимӧт мортінлісь унасялӧмсӧ мыччалӧ содтас -ö (муніс-ӧ, петас-ӧ);
• Куимӧт мортіна нимвежлассэзлӧн формаэз лоӧны сія, нія, а аккузативын – сійӧ, нійӧ;
• Тӧдчанним да лыдним аккузативын босьтӧны -ö содтас (ыджыт-ӧ, кык-ӧ)
• Лыдниммез мӧд дассянь аркмӧны ӧткодь тудӧттэз сьӧрті: (кыкдас, куимдас да с.о.).
• Эмӧсь унакодь торья шуаннэз, кӧдна абуӧсь зыряналӧн лыддьӧтан кылын (бытшӧм, говк, юскыны), нето видзӧны сэтчин мӧдік вежӧртас (горзыны кывсӧ зыряна вежӧртасӧ кыдз “ыксыны”, а ‘горзыны’ вежӧртасын шуасӧ бӧрдны; веськавны шуансӧ зыряна вежӧртасӧ кыдз ‘сюрны, шедны, инмыны’, а ‘веськавны’ вежӧртас ны шуанӧн лоӧ бурдны).

Но сё жӧ унажык кыввез, формаэз да структураэз кыкнан лыддьӧтан коми кылын ӧткодьӧсь.

История

Унажык сы йылісь видзӧт: Перем комиэзлӧн история

Перем коми отирлӧн вужжес

Перем комиэз, кыдз и быдсӧн коми отир, петӧмась финн-йӧгра вужись. Этійӧ позьӧ вежӧртны, кӧр мийӧ ордчӧн видзӧтам коми кыв да кыввез финнэзлісь, эсттэзлсіь, мордвалісь, мариэзлісь, йӧгралісь нето мадьяррезлісь. Медся матынӧсь коми отир дынӧ кыв сьӧрті лоӧны удмурттэз, кӧдна олӧны перем комиэзсянь лун-рытвылын.

Археологияӧн адззалӧм коляссэз сьӧрті медодзза отирӧн, кӧдӧ мийӧ вермам лыддьыны перем коми йӧзлӧ важся ай-маммез туйӧ, вӧлісӧ ананьина культура видзиссез.

Архелогия культураэз петӧны сьӧрсьӧн-бӧрсьӧн сідз:

• Ананьинса культура
• Гляденса культура (м.э.о. II вексянь м.э. III векӧдз)
• Ломоватовса культура (IV-IX веккезӧ)
• Родановса культура (IX-XV веккезӧ)

Родановсаыс и вӧлӧмась ни перем коми увтыррез.

Ыджыт Перем

Унажык сы кылісь видзӧт: Ыджыт Перем

XV векӧ перем комиэзлӧн аркмӧ асланыс канму – Ыджыт Перем, кытчӧ юравны корӧмась Вереяись роч ӧксуэсӧ. Медодзза ӧксунас вӧлі Михаил Ермолаич. Коми канму мынтӧма вот Мӧсквалӧ да Ыджыт Новгортлӧ. Канкар вӧлі Чердын. 1455 годӧ зыряна ладорсянь корӧмась епископ Питиримӧс, медбы сія пыртіс Ыджыт Перемись коми отирсӧ. Но татісь комиэз унаӧн эзӧ мӧдӧ вунӧтны чучкӧй веранысӧ, сійӧн 1462 годӧ виль епископ Иона бӧра пыртӧ коми отирсӧ Ыджыт Перемын.

Сія жӧ кадӧ перем коми муэсӧ пондісӧ босьтны роччез. Сідз, Вологда муэзісь локтӧм Калинниковвез сувтӧтӧны сов пуаннэз Камаӧ усян Борва ю пӧлӧн. 1430 во гӧгӧр Камаӧ усян Усолка ю вылын вӧлі сувтӧтӧм Соль Камскӧй кар, ӧні — Совкар (Соликамск). Роччез пондасӧ кыскыны совсӧ сэтісь, кытӧн одзжык олісӧ родан культураа коми отир. Нія дзескӧтісӧ комиэсӧ сэтісь умӧльжык муэзӧ.

1471 годӧ, Новгортсаэзӧс пӧдтӧм бӧрын, Мӧскваись ӧксу III Иван ыстіс тышкасян выннэз и Ыджыт Премӧ. Чукӧрнас веськӧтліс Стародубись Сера Пёдор нима ӧксу, кӧда ассис лӧгсӧ мыччаліс ни новгортсакӧт Шелонь дорын пессикӧ.

Сьӧкыт пессьӧммэз, уна отир вийӧм да ыджытжык каррез босьтӧм бӧрын Сера Пёдорлӧн чукӧррес тулыснас 1472 годӧ пантасисӧ Покчаын, «тшуписӧ-сувтӧтісӧ сэтӧн кар, пуксисӧ сэтчӧ овны да быдӧс сійӧ мусӧ вайисӧ ыджыт ӧксу увтӧ». Михаил ӧксу сетчас. Cійӧ, отирлісь мырддьӧм дӧс берсянас, ыстӧмась Москваӧ. Капитуляция кырымалӧм бӧрын Иван лэдзис Михаилсӧ бӧр Ыджыт Перемӧ веськӧтлыны ыджыт ӧксу нимянь.

Татӧн Михаил ӧксу веськӧтліс 1481 воӧдз, кӧр сія вӧлі вийӧм Пелым дорись вогуллэзкӧт (манси) пессикӧ. Михаилыс бӧрын Ыджыт Перем муэзын пондіс веськӧтлыны сылӧн Матвей нима зоныс, но 1505 годӧ Мӧскваись виль ыджыт ӧксу III Василий вештӧ сійӧ юралӧмсис, абу кывзісьӧм да.

Перем комиэз роч саррез дырни

1505 годӧ III Василий иньдӧтӧ Ыджыт Перемӧ веськӧтлісьӧн наместникӧс, Ковёр Василий нимаӧс. Сія вайис сьӧрас коми отир понда тодильнӧй Уставӧн грамота. Сёрӧнжык Чердын карись веськӧтліссесӧ вежасӧ воеводаэзӧн, кӧдна лоасӧ Новгорт приказлӧн кипод увтын.

1558 годӧ Гым Иван сар, мед ёнжыка видзны асыввыв муэсӧ ас кипод увтын, козьналӧ муэз Кама ю пӧлӧн Совкарсянь Чусва ю дынӧдз Строгановвезлӧ, кӧдна вӧлӧмась сэк Сольвычегодскын промысёллэз да му видзиссезӧн.

Строгановвес чожа озыртчасӧ-богатсяласӧ сов судзӧтӧмӧн да Сибирись йӧзкӧт вузасьӧм-босьтасьӧм пыр. Одзлань нылӧн вотчина дынӧ ӧтлаӧтасӧ Камаӧ усян юэз пӧлӧн коми муэсӧ. Эна муэзын нія веськӧтлӧмась сідз, кыдз гажныс петас: асьныс веськӧтлісӧ уджӧн, вайӧтісӧ му вылын уджалісь отирӧс да лэбтісӧ гӧрӧм му, кыскисӧ сов да кыйисӧ чери, кӧдзисӧ шогді, кыскисӧ муись гӧрд из (руда) да керисӧ кӧрт, лэбтісӧ дозоритан каррэз. Строгановвез немымда абу кывзӧмась уездӧн веськӧтліссесӧ. Быдӧс веськӧтлӧм-мыжйӧмыс мунис Мӧсква пыр.

Строгановвеслӧн муэс унажыксӧ вӧлісӧ Совкар уездын. Чердын уездын комиэс вештӧмась вотсӧ-налогсӧ веськыта каныслӧ (государстволӧ). Визир дозорись крестьяна моз, Сибирьсӧ босьтӧм бӧрын, комиэс уджалӧмась Мӧскваись юраліссез вылӧ: асланыс вӧввез вылын кыскалісӧ нянь, муэз дорйись отирӧс, лӧсьӧтісӧ ыджыт туй Сибирланьӧ, быд во лӧсьӧтісӧ пыжжез да иньдӧтлісӧ ассиныс отирсӧ пыжжез вылын, мед ыстыны быдкодь ветлісьӧс да лыйсиссезӧс Сибирьӧ дзескытінӧ пуксьӧтӧм отирӧс нуӧтӧм понда.

Шӧрӧт Уралас, Ыджыт Перем муэзын, пондасӧ овны пышшӧм роч крестьяна. XVII веклӧн шӧрӧт воэзӧ роччез тӧдчӧмӧн пондасӧ йывны Кама катытын. Сэк и Строгановвез нійӧ корӧмӧн корӧмась. Ыджыт Перемын этнокультура серпасыс лёка вежсяс, комиэз ас муын лоасӧ сё етшажык.

XVIII сугӧдӧ Роч муас перыта зорамӧма берсяторрез керӧтӧм, кӧда пуктас Чердын уездісь коми отир вылӧ ассис пас. Нія лыддисисӧ канлӧн, но 1760 во кежӧ нійӧ быдӧннысӧ гижӧтасӧ Урал сайись ыргӧн сылӧтан асторья заводдэз дынӧ. 1760-1764 годдэзӧ лэбтісьлӧмась ыджыт зыккез. Комиэз норасисӧ Мӧскваӧ, уськӧтчывлісӧ чиновниккез вылӧ, эзӧ ветлӧ уджавны заводдэзӧ. Мукӧдлаас отирыс петавлӧмась и лыйсяннэзӧн. Ӧвны коми отирсӧ ыстасӧ Вяземскӧй ӧксулісь тышкасян вын, кӧда чожа ӧлас отирсӧ. Пондӧтчиссесӧ вартласӧ, но гижӧтнытӧ сё жӧ дугдасӧ нёль год кежӧ.

Мӧдпырся Чердын ладорись комиэс пондылӧмась дорйыны асьнысӧ 1767 годӧ, кӧр вӧлі Емельян Пугачёвлӧн лэбтісьӧм. Раммӧтны отирсӧ бӧра ыстасӧ тышкасян вын. Комиэсӧ лёка ӧлӧмась. Пондӧтчиссесӧ дорӧмӧн иньдӧтасӧ Сибирьӧ, мӧддэсӧ — ӧтікӧ дас морт коласісь — «вартласӧ ньӧррезӧн». Быдӧссӧ вийӧмась да вартлӧмась вит сюрс гӧгӧр морт. Сідз коми отирсӧ «сувтӧтӧмась пидзӧс вылӧ». Сэсся нія тӧвбыт кежӧ пондасӧ вӧввезӧн ветлыны Урал керӧссэз сайӧ, заптыны вӧр, сотны сійӧ шомӧ да ваявны заводдэзӧ, гарйыны да новйыны гӧрд из (руда). Отирыс вештӧмась каныслӧ и вот. Комиэс пышшалӧмась завод уджсянь, абу и полӧмась вартлӧмись. Заводын уджыс нылӧ нем эз сет. Сыбӧрын коми отирыс паськыта лэбтылӧмась зыксӧ 1824, 1832, 1850, 1851 воэзӧ.

Культура

Унажык сы йылісь видзӧт: Перем комиэзлӧн культура

Религия

Унажык сы йылісь видзӧт: Перем комиэзлӧн религия

Видзӧт сідзжӧ

• Коми зыряна
• Перем ладорись Коми кытш
• Коми отирлӧн сёян-юан
• Перем комиэзлӧн гишшаннэз (фамиллёэз)
• Важ коми ниммез

Ӧшмӧссэз

• Дерябин В.С. Коми-пермяки: тенденции этнокультурного развития // Этнические проблемы регионов России. Пермская область. М.: Старый сад, 1998.
• Климов В.В., Чагин Г.Н. Круглый год праздников, обрядов и обычаев коми-пермяков. Кудымкар, 2005. ISBN 5-87901-081-3
• Коми-пермяцкий язык. Кудымкар, 1962.
• Коньшин А.Е. История коми-пермяцкого народа. Кудымкар. 2007.
• Коми-пермяккез. Кудымкар, 2008. ISBN 978-963-9876-09-05.
• Мальцев Г.И. Народная медицина коми-пермяков конца XIX — начала ХХвв.// Историко-этнографический аспект. Ижевск, 2000. ISBN 5-900894-21-5
• Черных А.В. Народы Пермского края. История и этнография. Пермь, 2007. ISBN 978-5-98799-009-2